भांगरभूंय | प्रतिनिधी
भांगरभूंय । प्रतिनिधी
मडगांवः लेखक आनी शिक्षक डॉ. तन्वी कामत बांबोळकार हांच्या 4 पुस्तकांचें प्रकाशन मुखेल सोयरे नामनेचे लेखक आनी नाटककार शफाअत खान हांचे हस्तुकीं मडगांवां रवींद्र भवनाच्या कॉन्फरन्स सभाघरांत जालें.ह्या पुस्तकां मदीं ‘पांवळी’ हें कवितांचें पुस्तक, ‘शॉर्ट्स’ हें कथांचें जाल्यार ‘लॉगआवट’ आनी ‘अनवाणी’ ह्या दोन नाटकांच्या पुस्तकांचो आस्पाव आसलो.
खान हांणी ह्या वेळार उलयताना सांगलें, डॉ. तन्वी कामत बांबोळककार हांणी चारुय पुस्तकां बरे तरेन हाताळल्यांत. कविता, कथा आनी नाटक अशें प्रकार बरयतना उतरांचो वापर वेगळे तरेन करचो पडटा आनी तें काम डॉ. तन्वी कामत हाणी बरे तरेन केलां. कोविड 19 वेळार घडिल्ले प्रसंग नाटकांतल्यान लोकां मुखार हाडप तशी सोपी गजाल न्हय, मात ती तांणी खूप बरे तरेन हाताळल्यात. मनीस मोग करपाक विसरलो जाल्यार देशाचो विनाश निश्चीत आसा, अशें नाटकांत स्पश्टपणान दिसता. तर कोविड 19 वेळार स्थलांतरीत कामगार कशे तरेन अनवाणी आपल्या गावांनी वताले, तें नाटकांतल्यान बरे तरेन मांडलां, अशें खान हांणी सांगलें.
लेखिका डॉ. योगिनी आचार्य, कोंकणी भाशा मंडळाची अध्यक्ष अन्वेषा सिंगबाळ आनी नाटककार गौतम गावडे हांणी पुस्तकांचेर उलोवप केलें. प्रकाशक संजना पब्लिकेशन्सनान हीं चारुय पुस्तकां प्रकाशीत केल्यांत.
हृषिकेश कदम हांणी येवकार दिलो जाल्यार लेखिका डॉ. तन्वी कामत बांबोळकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
