भांगरभूंय | प्रतिनिधी
मुख्यमंंत्र्यांंची पुलिसांं सयत वरिश्ठ अधिकाऱ्यांं कडेन बसका
घुंंवळे वखदां विरोधी फांटो घटमूट करचो
पणजी : अभिनेत्री सोनाली फोगट खुना उपरांत कुडचड्यार रेंव माफियां मदीं जाल्ल्या फारपेटाक लागून गोंयांत कायदो सुवेवस्थी विशीं प्रस्न निर्माण जालां. काँग्रेस तशेंच आपान सरकाराचेर फोग काडिल्लो आसतानाच मुख्यमंंत्री डॉ. प्रमोद सावंंत हांंणी शुक्रारा पुलीस तशेंच प्रशासनांतल्या वरिश्ठ अधिकाऱ्यांं कडेन बसका घेतली. बसकेंत कायदो सुवेवस्थेचेर चर्चा जाली. गुन्यांंवां आड खर कारवाय करपा सयत घुंवळे वखदां विरोधी पंंगड घटमूट करपाचे आदेश मुख्यमंत्र्यांनी बसकेंत दिले.
मुखेल सचीव पुनीत कुमार गोएल, अॅडव्होकेट जनरल अॅड. देविदास पांंगम आनी पुलीस अधिकारी बसकेक हाजीर आशिल्ले.
गोंयांत घुंवळे वखदांचे प्रमाण वाडत आसा. सोनाली फोगट हिच्या खुनाचो संंबंध घुंवळे वखदांं कडेन संंबंंधीत आसपाची शक्यताय आसा. घुंवळे वखदां विरोधी फांटो आनीक घटमूट करचो, अशें मुख्यमंंत्र्यांनी बसकेंत सांंगलें.
कुडचड्यार रेंव माफिया मदीं फारपेट जावन एकल्याक मरण आयलां. हे घडणुके उपरांंत विरोधी काँग्रेस तशेंच आपान सरकाराचेर खर टिका केल्या. हे फांटभुंयेर मुख्यमंत्र्यांनी शुक्रारा बसका घेतली.
कुडचडे-बाणसाय हांंगा बुधवारा मध्यान रातीं बेकायदाे रेंव काडपी कामगारांचेर फारपेट जालो. अनवळखी मनशान हो फारपेट केलो. हे फारपेटीत युसूफ आलम ह्या झारखंडच्या कामगाराक मरण आयलें. आनीक एक कामगार जखमी जालो. गोंयांत चोरयो जातात, खून जातात. फारपेटीचे प्रकार मात जायनात. रेंव काडपी कामगारांंचेर रातीं कडेन फारपेट जावप ही घडणूक गंभीर आसा. हे घडणुकेन कुडचड्यारूच न्हय जाल्यार पुराय गोंयांत खवदळ निर्माण जाला. गोंयांत बांंदकाम वेवसायाक नेट आयला. घरनिर्माण वसणूक प्रकल्प तयार जायत आसा. ते भायर घरांं बांंदपाचें प्रमाण वाडलां. रेंव काडपाचेर बंदी आशिल्ल्या कारणान रेंवेचो उणाव आसा.
राज्यांतल्या न्हंयानी रेंव आसा. तरी कायदेशीर मार्गान ती काडपाक मेळना. हाका लागून रेंवे खातीर अदीं मदीं झगडीं जातात. चवथी दिसा कुडचड्यार फारपेट जालो. रेंवेक लागून फुडाराक कायदो सुवेवस्थेचो प्रस्न निर्माण जावपाची शक्यताय आसा. लिपचोरयां मार्गान रेंव काडप सुरूच आसा. वळवय, आमोणें, चोडणां, कुडचडें, तेरेखोल हांगा बेकायदाे रेंव काडपाचे प्रकार चलतात. अदीं मदीं खण खातें धाड घालून कारवाय करता. थोडे दिसां उपरांत परतून बेकायदाे रेंव काडप सुरू जाता. बेकायदाे रेंव काडपाच्या प्रकरणांत बिगर गोंंयकार कामगार लेगीत आसात. हाका लागून फुडाराक रेंव काडपा वयल्यान झगडीं जावप शक्य आसा.
रेंव काडपाक पर्यावरणी दाखले दिवपाचेर लेगीत बसकेंत चर्चा जाली. बसकेक कॅप्टन ऑफ पोर्ट तशेंच खण संचालक हाजीर आशिल्ले.
हैदराबाद – गोंय पुलिसां मदीं वाद
मुख्यमंंत्र्यांनी कायदो सुवेवस्थेचो नियाळ घेवपा खातीर बसका घेतली. घुंवळे वखदांंच्या प्रकरणांत हैदराबाद पुलीस आनी गोंंय पुलिसां मदीं वाद सुरू जाला. घुंंवळे वखदांंच्या तपासांत गोंंय पुलीस सहकार्य करिनात असो आरोप हैदराबादचे पुलीस आयुक्त सी. व्ही. आनंद हांंणी केला. पत्रक काडून गोंंय पुलिसांंनी ह्या आरोपाचें खंंडण केलांं.
एडवीन नुन्स हो हैदराबाद हांंगा घुंंवळे वखदांचो वेव्हार करतालो. ताचे आड गुन्याव नोंद जाल्ल्याची खबर गोंंय पुलिसांक मेळ्ळी. हैदराबाद पुलिसांं कडल्यान मात सहकार्या विशीं कसलीच मागणी जाली ना. एडवीन नुन्स हो गोंंय पुलिसांच्या ताब्यांत आसा. ताचे अटकेची म्हायती ओसमानिया विद्यापठ पुलिसांंक कळयल्या. सहकार्या विशीं कसलेंच पत्र हैदराबाद पुलिसां कडल्यान येवंंक ना अशे स्पश्टीकरण गोंंय पुलिसांंनी केलां.
———————–
बॉक्स
गोंयांत गुन्यांंवकारी घडणुको वाडत आसात. पुलिसांंनी रातची गस्त वाडोवची. गरज पडल्यार नाकाबंदी करून दुबावीत वाहनांंची तपासणी करची. चवथीक लागून सगल्याक उत्सवी वातावरण आसा. लोक गणपती कडेन तशेच सांंस्कृतीक कार्यावळींनी व्यस्त आसतात. हे संदीचो लाव घेवन चोरयो जावपाची भिरांंत आसा. घाळपणा परवडपा सारकी नात. पुलिसांंनी गुन्यांवांं आड खर कारवाय करची अशें मुख्यमंत्री डॉ. प्रमोद सावंत हांणी बसकेंत सांंगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
