भांगरभूंय | प्रतिनिधी
गोंयांत हिप्पी संस्कृताय सुरु जाली, ती 1970 च्या दशकांत. तेन्ना गोंय शांत. भोवतेक दर्यावेळांचेर फक्त मे म्हयन्यांत वा आयतार, सुटयेच्या दिसांनी गोंयकारांची गजबज आसताली. दिसपट्टे जिणेक विटिल्ले, निर्शेल्ले, शांतीकायेच्या सोदांत आशिल्ले विदेशी नागरिक ह्या दर्यां वेळांचेर येवपाक लागले. तातूंतले कांय जाण घुंवळे वखदां घेताले आनी आपल्याच विश्वांत गुल्ल आसताले. तांचे जिणेशैलीची चटक मागीर आमच्या कांय आधुनिक भारतीयांक लागली. आपूण हेरां परस वेगळो हें दाखोवंक, जिवितांत कितेंतरी थ्रील आसचें हे खातीर कांय लोक प्रवाहा आड पेंवपाक सोदतात. तातूंत तांचें हांशें जाता वा तांचें फाटल्यान लोकांचें भिरेंय लागता. ते देव जातात. हांगां चार बोडकां तगतात… उरिल्लीं बुडटात . हिप्पी संस्कृतायेचें अनुकरण करप्यांचे बाबतींतूय तशेंच जालां. घुंवळे वखदां विकून फायदो आसा, तें पळोवन कांय सैतानी वृत्तीचे लोक ह्या हिप्पीं वांगडा नाचपाक लागले आनी ल्हवू ल्हवू करून ताका धंद्याचें स्वरुप आयलें. आयज घुंवळे वखदां विकून कोट्यांनी रुपयांच्या राशींचेर लोळपी लोक आसतले. समाजाच्या सगल्या थरां वयले, वेवसायांतले लोक!! हाका धरलो, ताका अटक केली, ड्रग्स जप्त केलें, अश्यो खबरो दिसाळ्यांनी येतात. आमच्या गोंयांत तर म्हयन्याक उण्योच पंचवीस. ‘हे विकपी सगले भायले. गोंयकार असलें काम केन्नाच करीनात’, अशें आमी हड्डें मुखार काडून सांगतात. मात टिकटाॅक स्टार, भाजपा फुडारी सोनाली फोगाट हांच्या मरणान आमच्या म्होंवाळ्याच्यो तिस्त्यो वादऱ्यो जाल्यात. (अर्थांत कांय गोंयकारांक भितरल्यो बारीकसारीक गजाली फाटल्या बऱ्याच वर्सां सावन खबर आसतल्यो.) हातूंत कांय नीज गोंयकारांक अटक जाल्या. चवकशी नेटान मुखार सरली जाल्यार आनीकूय धक्को दिवपी सत्य सामकार येवं येता. मुख्यमंत्री डाॅ. प्रमोद सावंत हांणी गरज पडल्यार हें फोगाट प्रकरण सीबीआय कडेन दिवपाची घोशणा केल्याच. पळोवया.
जगपा खातीर जाय तितलो पयसो मेळ्ळो तरी कांय लोकांचें समाधान जायना. गोंयच्या दर्यादेगांचेर जें चल्लां आनी जे लोक तातूंत घुस्पल्यात, तांकां घडये, स म्हयन्यां भितर अब्जाधीश जावपाचें आसतलें. पूण हरामाचो पयसो निमणो मातयेंत वता हें तांकां खबर नासतलें. पोतीभर ड्रग्सांचो साकभर पयसो, म्हणटकच जो तो आतां त्या धंद्यांत घुसपाक पळयता. दर्यादेगांचेर रावप्यांक ही परिस्थिती कितली भिरांकुळ आसा, ताची बेसबरी खबर आसतली. सांजवेळा साता उपरांत बायलांक एकटें भायर भोवप कठीण जालां, कोण गुन्यांवकार येवन आगळीक करीत सांगपाक येना, अशें कांय वर्सां पयलीं म्हणटाले. तें खरें आसुये. गोंयची दिसानदीस बदनामी जायत आसा. हांगा खास घुंवळे वखदां खातीर भायले लोक येतात. तातूंत तरणाटे चड. हांगा येवप, वांगडा चली वा इश्ट, खावप, पिवप, ड्रग्स घेवप, नाचप, वेगान गाडी चलोवप… जिवाचो गोवा करप. प्रमाणांत आसा, तो मेरेन सगलें बरें. नाजाल्यार राम नाम सत्य है. एके सरकारी आंकडेवारी प्रमाण, देशांत घुंवळे वखदां घेवन दरवर्सा अडेच हजारां वयर लोक मरतात. हातूंत गोंयचो एक पसून ना, अशें आमकां म्हणपाक मेळचें ना.
कोणे वायट धरचें न्हय, पूण थ्रील, मुक्त विचार, आधुनिकतायेच्या नांवांन दर सप्तकाक रातीं 12 मेरेन वा फांतोड जाय मेरेन धुडगूस घालपाचें प्रमाण गोंयांत वाडलां. इश्ट, इश्टीणी वांगडां वाडदीस वा सिलेब्रेशनाच्या नांवांन नेमान पबांनी वा कोणाच्या फ्लॅटार वचप, मागीर थंय इश्टान वा इश्टीणीन कितें आगळीक केली वा कितें वायट घडलें जाल्यार, सगलो दोश सरकारी यंत्रणेक दिवप. आचार- विचार स्वातंत्र्य ह्या असल्या कामां खातीर वापरपाचें आसता? गोंयांत मुक्त वातावरण आसा, बंधना नात म्हूण फांतोड मेरेन भोवप योग्य काय अयोग्य ताचो विचार करपाचो आतां वेळ आयला. ड्रग्स हे फक्त दर्यावेळांचेर मेळना, तर ते शाळां लागसार पावलां, हाॅस्टेलांनी घुसलां. एक कळना, ‘लेट अस एन्जोय’ म्हणटकच ड्रग्स, सोरो, वेगान गाडी चलोवप, दर्यावेळेर मध्यानरातीं हेडप, नशेंत उदकांत उडक्यो मारप इतलेंच आमकां कित्याक याद जाता? शांतपणान कितें एन्जोय करप शक्य ना?
गोंयांत ड्रग्सांचो असो हुंवार येत रावलो, खून- मारामारी जायतूच रावल्यो जाल्यार उंवाळून उडयिल्ले संवसारभरांतले अंडरवर्ल्ड डाॅन, ड्रग्स माफिया आनी हेर खांपे गुन्यांवकार गोंयां रावपाक येवं येतात आनी मागीर…..
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
