आर्चबिशप फिलीप नेरी फेर्रांव जाले कार्डिनल

भांगरभूंय | प्रतिनिधी

हैदराबादचे आर्चबिशप एन्थनी पुला हांकांय कार्डिनल म्हूण बडटी

खबरां संस्था
रोम : हांगाचे सेंट पीटर बासिलिकांत काल जाल्ल्या एका खाशेल्या सुवाळ्यांत गोंय आनी दमणाचे आर्चबिशप फिलीप नेरी फेर्रांव (69) हांकां कार्डिनल म्हूण बडटी दिली. ख्रिश्चन धर्माचे सर्वोच्च धर्मगुरू पोप फ्रान्सीस हांचे हस्तुकीं 19 जाणांक हो भोवमान फावो जालो. तातूंत आर्चबिशप फेर्रांव आनी हैदराबादाचे आर्चबिशप एन्थनी पुला हे दोग भारतीय नागरीक आसात.
फेर्रांव हे कार्डिनल जावपी सवे गोंयकार. आर्चबिशप पुला हे कार्डिनल जावपी अनुसूचीत जातींतली पयलीच व्यक्ती. संवसारभरांतले हे नवे 19 कार्डिनल पोपसायबाचे आघाडेचे सल्लागार आनी प्रशासक म्हूण काम करतले. गरज पडल्यार 80 वर्सां सकयल्या हेर कार्डिनला वांगडा नवो पोपसायब वेंचून काडटले.
गोंय, दमण आर्चडायोसिसाच्या 465 वर्सांच्या इतिहासांत कार्डिनल म्हूण बडटी मेळिल्ले फेर्रांव हे पयले गोंयकार आर्चबिशप. हें आर्चडायोसीस 1557 वर्सा स्थापन केल्लें. आर्चबिशप फेर्रांव कार्डिनल जाल्ल्यान आतां गोंयांक आॅक्झिलरी बिशप वा नवो आर्चबिशप मेळपाक शकता.
कार्डिनल फिलीप नेरी फेर्रांव 15 सप्टेंबराक रोमांतल्यान येतकच पोरण्यां गोंयच्या से कॅथेड्रलांत खास प्रार्थना सभा आयोजित करतले. ते कार्डिनल जाल्ल्यान गोंयकार ख्रिस्ती समाजांत खोशेचें ल्हार पातळ्ळां.

2004 त जाल्ले आर्चबिशप

फिलीप नेरी आंतोनियो सेबेस्तियांव दो रोझारियो फेर्रांव हांचो जल्म 20 जानेवारी 1953 दिसा म्हापश्यां जालो. तीन भुरग्यां मदलें ते सगल्यांत ल्हान. साळगांव आनी पुणेंचे सेमिनारींत तांचें शिक्षण जालें. 28 आॅक्टोबर 1979 दिसा ते धर्मगुरू जाले. साल्वादोर द मुंद हांगां 1979 तर चिंचणी 1981 ते 1984 मेरेन ते धर्मगुरू आशिल्ले. मागीर साळगांवचे सेमिनारींत ते व्हाॅकेशन कमिशनाचेर संचालक आशिल्ले. 25 जानेवारी 1994 ते आॅक्झिलरी बिशप जाले. 16 जानेवारी 2004 क तांकां पोपसायबान आर्चबिशप नेमले. 21 मार्चाक ते आर्चबिशप जाले.