भांगरभूंय | प्रतिनिधी
खण खात्याची कारवाय; जमीन धनया आड गुन्यांव दाखल करपाची अधिकाऱ्यांची शिफारस
भांगरभूंय । प्रतिनिधी
वाळपयः सत्तरी म्हालांतल्या पिसुर्ले वाठारांत सुरू आशिल्ल्या बेकायदो चिऱ्याखणीचेर खाण खात्याच्या अधिकाऱ्यांनी धाड घातली. मात कसलेंच सामान जप्त करूंक ना. जमीन धनया आड गुन्यांव दाखल करपाची शिफारस वाळपय पुलीस अधिकाऱ्यां कडेन केल्या.
मेळिल्ले म्हायती प्रमाण दोन दिसां आदीं पिसुर्ले वाठारांत सुरू आशिल्ल्या बेकायदो चिऱ्याखणीचेर खाण खात्याच्या अधिकाऱ्यांनी धाड घातिल्ली. ज्या वेळार धाड घातिल्ली त्या वेळार ते खणी वयलें काम पुराय बंद आशिल्लें. ताका लागून मशिनां आनी सामान जप्त करपाक मेळूंक ना. मात जे सुवातेचेर धाड घातली तेन्ना थंय नव्यान चिरेखणीचो वेवसाय सुरू केल्ल्याचें स्पश्ट जालें. ताका लागून त्या वाठारांतले जमनीच्या धनया आड गुन्यांव दाखल करचो आनी ताचेर खर कारवाय करची अशी शिफारस खण खात्याच्या अधिकाऱ्यांनी वाळपयच्या पुलीस अधिकाऱ्यांक केल्या. हाका लागून त्या जमीन धनया आड गुन्यांव दाखल जावपाची शक्यताय वाडल्या.
सत्तरी म्हालांत 50 परस अदीक कडेन बेकायदो चिरेखणींचो वेवसाय सुरू आसा. फाटल्या 10 वर्सां सावन हो वेवसाय व्हड प्रमाणांत वाडला. चिरेखणींक लागून व्हड प्रमाणांत रानां मारतात. पर्यावरण रक्षणाची मार्गदर्शक तत्वांक मातूय पाळो दिसनात. ताका लागून पर्यावरणाचें व्हड प्रमाणांत लुकसाण जाता. हे संबंदांत कारवाय करची अशी ह्या वाठारांतल्या लोकांनी खूब खेपे केल्या. मात दर खेपे कागाळ करप्यां आड चिऱ्याखण धनी धमकी दितात, अशें थळाव्या लोकांचें म्हणणें आसा.
सध्या दक्षीण गोंयांत एके कडेन बेकायदो चिरेखणीचो वेव्हार खूब गाजता. हे संबंदांत मुंबयच्या गोंय खंडपिठांत खटलो सुरू आसा. ताका लागून खण खात्याची व्हड प्रमाणांत पत गेल्या. ताका लागून तांणी आतां सत्तरी म्हालांतल्या बेकायदो चिरेखणीच्या वेवसाया कडेन लक्ष केंद्रीत केलां. हे फुडें बेकायदो चिरेखणीचो वेवसाय कशेच भोगसुचे नात, अशें अधिकाऱ्यांचें म्हणणें आसा. हे फुडें बेकायदो चिरेखणींचेर कारवाय जातलीच, कोणाकूच सोडचे नात, अशी शिटकावणी खण खात्याच्या अधिकाऱ्यांनी दिल्या.
मजगतीं, मेळिल्ले अदीक म्हायती प्रमाण ह्या वाठारांतले समाज वावुरपी हनुमंत परब हांणी हे संबंदांत खूब खेपे खण खातें, सत्तरी म्हालाचे मामलेदार, सत्तरी म्हालाचे उपजिल्होधिकारी, वाळपय पुलीस स्टेशनाचेर कागाळी केल्यात. मात त्या कागाळींची अजून मेरेन कसलीच दखल घेवंक ना, अशें कळ्ळां. पिसुर्ले वाठारांतल्या बेकायदो चिरेखणींचें प्रकरण मुंबय उच्च न्यायालयाच्या गोंय खंडपिठांत दाखल करतले, अशी म्हायती मेळ्ळ्या. हें प्रकरण न्यायालयांत पावलें जाल्यार खण खात्याचे अधिकारी, उपजिल्होधिकारी, मामलेदार आनी पुलीस अधिकाऱ्यांची आनीक लज वतली हें निश्चीत, अशें थळावे लोक उलयतात.
अधिकारी आपलो अधिकार वापरिनात…
कागाळ केले उपरांत हे आदीं खण खात्याचे अधिकारी चिऱ्याखणीचेर धाड घालताले. हे कारवायेची भिरांत बाळगून दोन दीस चिरेखणी वयलो वेवसाय बंद जातालो, मात तिसऱ्या दिसा हो वेवसाय परतून नेटान सुरू जातालो. हाका लागून खण खात्याच्या अधिकाऱ्यांचे धाडी विशीं लोक दुबाव उक्तायताले. मेळिल्ले म्हायती प्रमाण सत्तरी म्हालाचे मामलेदार आनी पुलिसांक कारवाय करपाचे पुराय अधिकार आसात. मात त्या अधिकाराचो वापर जायना, अशें चित्र दिसता. म्हत्वाचें म्हणल्यार होंडा वाठारांत आशिल्ले पुलीस चौकी मुखारून व्हड प्रमाणांत बेकायदो चिरेखणीची येरादारी जाता, मात तांचेर कारवाय करपाचें धाडस अजून मेरेन तरी पुलिसांनी दाखोवंक ना. हाका लागून खंय कितें तरी आसा, असो दुबाव थळाव्या लोकांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
