भांगरभूंय | प्रतिनिधी
पणजी : राज्यांतल्या ८० टक्के थळाव्या काजू उत्पादकांनी जीआय टॅग घालून आपलीं उत्पादनां बाजारांत हाडचीं. अशें जालें जाल्यार सध्या बाजारांत आशिल्ल्या उण्या दर्ज्याच्या काजूचे विक्रीचेर कांय प्रमाणांत आळाबंद हाडूं येता अशें राज्य विज्ञान आनी तंत्रज्ञान मंडळाचे नोडल अधिकारी दीपक परब हांणी सांगलें. काजू महोत्सवाच्या तंत्रीक परिसंवादांत ते उलयताले. ह्या वेळार अन्न आनी वखदां प्रशासनाचे रिचर्ड नोरोन्हा, उद्देजक हेंझल वाज, रोहित झांटये, केशव प्रकाश हाजीर आशिल्ले.
हेर काजुचे तुळेंत गोंयच्या काजुची रुच वेगळी आनी बरी आसा. हाकाच लागून गोंयचे काजू आनी ताचे संबंदीत उत्पादन संवसारभर फामाद जाल्यात. पूण सध्या राज्या भायल्यान हाडिल्ले उण्या दर्जाचे काजू गोंयच्या काजूच्या नांवान विकपाक लागल्यात. ते खातीर जीआय टॅग आशिल्ले थळावे काजू बाजारांत हाडचे. अशा उत्पादनांचेरूय योग्य रितीन ब्रँडींग जावपाक जाय. उत्पादनांचेर जीआय टॅग आसल्यार काजू शेतकार, उत्पादक आनी गिरायकांक फायदो जातलो, अशें परब हांणी सांगलें.
थळाव्या काजू आनी संबंदीत उत्पादनांची राखण करपा खातीर राज्य सरकारान कांय नेम चालीक लायल्यात. पूण थळाव्या उत्पादकांचो सहकार्य मेळप गरजेचें. राज्यांत सध्या एका फेणी उत्पादनान आनी वनविकास महामंडळाच्या काजूक जीआय टॅग मेळ्ळा. हेर थळाव्या उत्पादकांकय जीआय टॅग मेळपाक जाय. हे प्रक्रियेंत खंयचे प्रस्न आसात तें आमी समजून घेवपाक सोदतात. तशेंच ही प्रक्रिया सोपी करपा खातीर नेमांत गरजेचे बदल करपाक आमी तयार आसात, अशें परब हांणी म्हणलें.
रोहित झांट्ये हांणी, २००५ उपरांत गोंयांत देशी पर्यटकांची संख्या वाडल्या. सर्त वाडिल्ल्यान काजूच्या उत्पादनांची विक्री करतना कांय अनियमितताय निर्माण जाली. मुखेलपणान दर्यादेगेवेल्या वाठारांनी नकली काजू गोंयचे काजू म्हणून विकपाक लागल्या. हाका लागून गोंयच्या काजूचें नांव कलंकीत जावपाक लागलां. फकत जीआय टॅग आशिल्लीं उत्पादनां विकप हो हाचेर एक उपाय. गोवा काजू उत्पादक संघटणेन आपल्या वांगड्यांक २०२६ सावन फकत जीआय काजू विकपाची शिफारस केल्या. हाची अंमलबजावणी केल्यार नकली काजूची विक्री उणी जातली, अशें रोहित झांटये हांणी सांगलें.
सरकारान तेंको दिवचो
फेणी हें उत्पादन संवसारीक पांवड्यावेल्या हेर सोर्यां कडेन सर्त करपाक शकता.पूण हे खातीर सरकारान फेनी उत्पादकांक तेंको दिवचो पडटलो. मेक्सिकन सरकारान टकीलाक तेंको दिलो. तेच प्रमाण केंद्र आनी राज्य सरकारांनी हांगा फेणीचो प्रचार करचो, अशें हेंझेल वाज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
