भांगरभूंय | प्रतिनिधी
सोशल मिडियाक लागून भुरगीं मैदाना वेले खेळ विसरल्यात. सोशल मिडियाक लागून भुरग्यां मदलो संवाद सोंपला. भुरगीं एकटींच रावंक लागल्यांत.
सोशल मिडिया आयच एक चर्चेचो विशय जाला. आयचें यूग सोशल मिडियाचें यूग अशें म्हणत जाल्यार चुकीचें थारचें ना. कारण सोशल मिडिया आयज जिणेची गरज जाल्या. ल्हाना सावन व्हडा मेरेन सगलेच जाण सोल मिडियाचेर सक्रीय आसात. आयज दरेकाच्या हातांत स्मार्ट फोन आसा आनी ह्या स्मार्ट फोनांत व्हॉट्सअप, फेसबूक, ट्विटर, इंस्टाग्राम, शेर चाट, स्नॅप चाट, यू ट्यूब अश्यो खूबश्यो सोशल मिडियाचेर सायटी आसात. ह्या सायटींचेर सेगीत सक्रीय रावन आमी कितले सोशल आसात हें दाखोवपा खातीर जो तो मनीस धडपड करीत आसता. चड करून किशोर पिराय आनी तरणाटे हांचे मदीं ह्यो सोशल मिडिया सायटी लोकप्रीय आसात. आयची तरणाटी पिळगी आपलो सगल्यांत चड वेळ सोशल मिडियाचेर घालयतात.
एका सर्वेक्षणा प्रमाण भारतांतलीं भुरगीं दीसपट्टी सरासरी पांच वरां सोशल मिडियाचेर घालयतात. हाचोच अर्थ आमचीं भुरगीं सोशल मिडियाच्या आहारी गेल्यात. हीं भुरगीं दीसभर उपाशी रावतलीं पूण सोशल मिडिया पसून पयस रावचीं नात. विशेश म्हणल्यार फक्त तरणाटेच न्हय जाल्यार शाळेंतली भुरगीं लेगीत सोशल मिडियाच्या आहारी गेल्यात. तंत्रज्ञानाचे जितले फायदे आसात तितलेंच लुकसाणूय आसा. तज्ञांनी खूबशे फावटी शिटकावणी दिवन लेगीत ताचो वापर उणो जाल्लो ना. उरफाटें वाडतूच चल्लां. सोशल मिडियाक लागून ताचो वापर उच्चांकी पातळेर पावला. ताचे दुश्परिणामूय मुखार येत आसात. सोशल मिडियाच्या अती वापराक लागून भुरग्यांच्या मानसीक भलायकेचेर परिणाम जायत आसा. सोशल मिडियाक लागून भुरगीं हिंसक जावंक लागल्यांत. सोशल मिडियाक लागून भुरग्यां मदीं तणाव वाडला. भुरग्यांच्या दोळ्यांच्यो कागाळी वाडूंक लागल्यात. खूबशा भुरग्यांक ल्हान पिरायेंतूच वक्ल लागलां. सोशल मिडियाक लागून भुरगीं मैदाना वेले खेळ विसरल्यात. सोशल मिडियाक लागून भुरग्यां मदलो संवाद सोंपला. भुरगीं एकटींच रावंक लागल्यांत. सगल्यांत म्हत्वाचें म्हणल्यार सोशल मिडियाक लागून भुरग्यांच्या अभ्यासाचेर परिणाम जावंक लागला. भुरग्याची एकाग्रताय भंग जाल्या. भुरगीं रागिश्ट जावंक लागल्यात. उण्यांत उणें शाळेंतल्या भुरग्यांक तरी सोशल मिडिया पसून पयस दवरचें अशें तज्ञ सांगतात. ताका लागून खूबशा शाळांनी भुरग्यांक शाळेंत मोबायल वापरपाक बंदी घाल्या. पूण शाळा सुटले उपरांत भुरगीं सोशल मिडियाचो वापर करतात म्हूण भुरग्यांक सोशल मिडिया वापराचेर कायद्यानूच बंदी घालची अशी मागणी जावंक लागल्यात.
भारत सरकारान अजून तरी शाळेंतल्या भुरग्यांच्या सोशल मिडिया वापराचेर बंदी हाडूंक नासली तरी कर्नाटक सरकारान मात हे संबंदी सकारात्मक पावल घालून 16 वर्सां सकयल्या भुरग्यांच्या सोशल मिडिया वापराचेर बंदीचो प्रस्ताव मांडला. ल्हान भुरगीं सोशल मिडियाच्या आहारी वच्ची न्हय, तशेंच ल्हान भुरग्यांची ऑनलायन सुरक्षा आनी वाडट्या स्क्रीन टायम पसून भुरग्यांक वाटावपा खातीर कर्नाटक सरकारान हो निर्णय घेतला. अशे तरेन बंदीचो प्रस्ताव हाडपी कर्नाटक हें देशांतलें पयलें राज्य थारलां. कर्नाटक सरकाराची जितली तोखणाय करची तितलीच उणीच. कर्नाटक सरकाराच्या ह्या निर्णयाचेर आंध्र प्रदेश आनी गोंय सरकारानूय अनुकरण करपाचें थारयलां आनी हीं राज्यांय रोखडींच ल्हान भुरग्यांच्या सोशल मिडिया वापराचेर बंदी हाडटलीं. देशांत ल्हान भुरग्यांच्या सोशल मिडिया वापराचेर बंदी घालपा संबंदी आतां पावलां उबारूंक लागल्यांत. पूण जगांतल्या खूबशा देशांनी हाचे आदींच ल्हान भुरग्यांच्या सोशल मिडिया वापराचेर बंदी घाल्या. दोन वर्सां पयलीं अमेरिकेंतल्या फ्लोरिडा प्रांतात शाळेंतल्या भुरग्यांक सोशल मिडिया वापराचेर बंदी हाडली. तांणी तसो कायदोच केला. फ्लोरिडा प्रांताचेर गव्हर्नर रॉन डी सेंटीस हांणी तसो कायदोच मंजूर करून घेतला.
ऑस्ट्रेलियांतूय 16 वर्सां पिराये सकयल्या भुरग्यांक सोशल मिडियाचो वापर करपाक बंदी घाल्या. आतां भारतांतूय ते संबंदी पावलां उबारूंक लागल्यांत. ही एक सकारात्मक गजाल आसा. पूण प्रत्येक राज्य सरकारान आपल्या राज्या पुरतो असो निर्णय घेवपा बदला जर केंद्र सरकारान संसदेंत तसो कायदो केलो जाल्यार तो पुराय देशांत एकाच वेळा ही बंदी लागू जातली. ताका लागून केंद्र सरकाराकूच विनंती आसा की तांणी संसदेंत तसो कायदो करचो. अर्थांत कायद्यानूच भुरग्यांचे सोशल मिडियाचें वेसन सुट्टलें अशें न्हय जाल्यार कायद्याक प्रबोधनाचीय जोड दिवची पडटली. कायद्या बराबरच भुरग्यांचें प्रबोधन केलें, भुरग्यांक सोशल मिडियाचे दुश्पपरिणाम समजावन सांगलें ते खातीर शाळेंत चर्चासत्रां आयोजीत केलीं जाल्यार भुरग्यांचें सोशल मिडियाचे वेसन सुटपाक नक्कीच मजत जातली. कायद्यान आसूं वा प्रबोधनान भुरग्यांचें सोशल मिडियाचें वेसन सुटप म्हत्वाचें आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
