भांगरभूंय | प्रतिनिधी
वाग वाठारांतल्या गांवांचे सक्तीन न्हय जाल्यार स्वेच्छेन स्थलांतरण करचें
पणजी : केंद्रीय तज्ञ मंडळाच्या शिफारशी प्रमाण राज्यांत वाग वाठार जालोच जाल्यार पयले पांवड्यार खोतीगांव आनी नेत्रावळी ह्या गांवांचेर स्वेच्छा स्थलांतरणाचें संकश्ट येतले. मात हे स्थलांतरण सक्तीन जावचें ना, हे राना जीव मंडळाच्या शिफारशी वेल्यान स्पश्ट जालां. वाग वाठारांत जी गांवां येतात, तांचे स्थलांतरण सक्तीन करचे न्हय जाल्यार स्वेच्छेन करचें, अशी शिफारस राना जीव मंडळान केल्या. वाग वाठारांतल्यान स्थलांतरणाच्या धोरणांत आतां बदल जातलो, हे आतां निश्चीत जालां.
राष्ट्रीय वाग जतनाय प्राधिकरणान (एनटीसीए) म्हादय वाठार वाग वाठार म्हूण अधिसूचीत करपाची शिफारस केल्ली. हाचे उपरांत एके याचिकेचेर मुंबय उच्च न्यायालयान म्हादय वाठार वाग वाठार म्हूण अधिसूचीत करपाचो आदेश दिल्या उपरांत स्थलांतरणाचे संकश्ट सत्तरी, सांंगें आनी काणकोण म्हालांतल्या काय गांवांचेर आयलें. उच्च न्यायालयाच्या आदेशाक गोंय सरकारान सर्वोच्च न्यायालयांत आव्हान दिले. सध्या सर्वोच्च न्यायालयांत हो विशय न्यायप्रवीश्ट आसा. सुनावणी वेळार सर्वोच्च न्यायालयान अभ्यासा खातीर तज्ञ समितीची नेमणूक केली. तज्ञ समितीन गोयांक भेट दिवन सुनावणी घेतली आनी अहवाल सादर केलो. हे अहवाला प्रमाण पयल्या पांवड्यार 296.70 चौखण किमीचो वाग वाठार जाल्यार 171.90 चौकण किमीचो बफर वाठार करपाची शिफारस तज्ञ समितीन केल्या. तज्ञ समितीन सर्वोच्च न्यायालयांत हो अहवाल सादर केला. पयल्या पांवड्यार म्हादयचो आस्पाव करूंक ना. हाका लागून प्रस्तावीत वाग वाठारांत येवपी सत्तरीतल्या गांवांचेर स्थलांतरणाचे संकश्ट ना. पयल्या पांवड्यार नेत्रावळी अभयारण्याचो 211.05 चौकण किमी जाल्यार खोतीगांव अभयारण्यांतल्या 85.65 चौखण किमी वाठाराचो आस्पाव आसा. हाका लागून ह्या दोन गांवांचेर शिफारशी प्रमाण स्वेच्छा स्थलांतरणाचें संकश्ट आसा. वाग वाठारा सयत भगवान महावीर पार्काचो (उत्तर वाठार) 171.90 चौखण किमी वाठार हो बफर वाठार करपाची शिफारस तज्ञ समितीन केल्या.
देशात जे वाग वाठार आसा तातुतली 298 गावां स्थलांतरीत जाल्या. आजून 730 गांवांचें स्थलांतरण जावंक ना. ज्या गावांचे स्थलांतरण जावपाचे आसा, तांचे स्थलांतरण स्वेच्छेन करचें. स्थलांतरणाची सक्ती करची न्हय, असो निर्णय राना जीव मंडळान बसकेत घेतला. म्हादय वाग वाठारा विशी आजून निर्णय जावंक नासले कारणान राज्यातल्या एकाय गावाचो हातूत आस्पाव ना. वाग वाठार जालो जाल्यार नेत्रावळी आनी खोतीगावचो आस्पाव जातलो.
तमीळनाडू आनी कर्नाटक राज्यातल्या काय वाठारांनी शेकड्यानी वर्सासावन आदिवासी लोक रावतात. आदिवासींचे वास्तव्य आसून लेगीत वागांचो आकडो वाडला. लोकांच्या वास्तव्या उपरान लेगीत वाग वाठारातले वाग सुरक्षीत उरो शकतात, हे हातुतल्यान सिद जाता, अशें मत रानां जीव मंडळाच्या बसकेत उक्तायले.
———————————–
वाग वाठारात प्रदूशणकारी आनी उदरगतीच्या प्रकल्पांचेर बंदी आसपाक जाय. लोकवसणूक आसली तरी वाग सुरक्षीत रावंक शकता, हो विचार हांवे तज्ञ समिती मुखार लेगीत मांडला. हे फाटभूंयेर स्वेच्छेन स्थलांतरण जाले जाल्यार ती बरी गजाल आसतली, अशें पर्यावरण वाठारातले कार्यकर्ते राजेंद्र केरकार हांणी म्हणला. वाग वाठाराक राजेंद्र केरकार हांणी तेंको दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
