भांगरभूंय | प्रतिनिधी
इझी मनी खातीर बरेच लोक ह्या मळाचेर आसतले. पर्यटकांक हें मागयिल्लें ड्रग्स विकतातूय आसतले.
चिमटीभर ड्रग्स हजारभर मोलाचें आसता. ताच्या जिवार घराक भांगराचे नळे घालपी शेंकड्यांनी लोक संवसारांत आसात. तातूंत आमचे कांय गोंयकार भाव आसात, ही धपको दिवपी गजाल. तेलंगणच्या पुलिसांनी दोन वर्सांचे मेहनती उपरांत एक आंतरराष्ट्रीय घुंवळे वखदांची टोळी उद्ध्वस्त केल्या. कुरियर, पोस्ट पार्सलांतल्यान ते भारतांत ड्रग्स आयात करताले. तें मागीर महानगरांनी धाडटाले. तातूंत गोंय राज्याचोय आसपाव आसा. गोंयचें पांच जाण हातूंत घुस्पल्यात, असो पुलिसांक दुबाव आसा. मात तांचीं नांवां जाहीर जावंक नात. केप्यां काल लंडनांतल्यान पोस्टान आयिल्ल्या पार्सलांत ड्रग्स सांपडिल्ल्यान अक्षय नांवाच्या तरणाट्याक धरला. तो मुखेल सुत्रधार काय कमिशन मेळटा म्हूण काम करतालो, ताचो पुलीस सोद घेतात. तेलंगणांत धरलां त्या रॅकेटाचो तो वांगडी न्हय मूं? दरेका राज्यांत असले 5- 10 जाणांक आसूं येतात.
हें ड्रग्स बेल्जियम, फ्रान्स आनी हेर युरोपी देशांतल्यान पार्सलांतल्यान येतालें. भितर कपडे, वस्तू आसात, अशें दिसलें तरी प्रत्यक्षांत कोकेन आनी हेर घुंवळे वखदां आसतालीं. ही टोळी फक्त भारता पुरती मर्यादीत आसची ना. भारतांत हजारांनी कील ड्रग्स येता. 2025 त 1 लाख 30 हजार कील ड्रग्स जप्त केल्लें. फक्त 10 ते 20 टक्केच जप्त जाता, अशें जाणकारांचें मत. प्रत्यक्षात 5 ते 10 लाख कील ड्रग्स येता आसतलें, असोय तांचो दावो. हे खातीर ते सगले मार्ग वापरतात. ड्रोनाचो पसून वापर जाता. 2024 त 27 हजार कोटींचें ड्रग्स जप्त केल्लें. हो सरकारी आंकडो. जप्त करूंक नाशिल्लें कितलें आसतले? म्हणजे तपास यंत्रणेची नदर चुकोवन भारतांत पातळिल्लें! 1 कील गांजो 1 लाखाचो आसता, तर कोकेन, एमडीएमएचे मोल किला फाटल्यान 1 कोटी रुपयां वयर. दर्यावेळांचेर भायले ओगीच ड्रग्स विकपाक भोवनात!!
तेलंगणांतले टोळयेचो मुखेली नायजेरियन. कुरियरांतल्यान ल्हान पार्सलांनी ड्रग्स हाडल्यार कोणाक दुबाव येतलो? पूण वायट कामां केन्ना ना केन्ना भायर सरतातूच. हो चडसो वेव्हार डार्क वेब वरवीं जाता. तें गुगलांत दिसना. खास साॅफ्टवेअर वापरचें पडटा. गुगल, युट्यूब हें सर्फेस वेब, पासवर्ड आसता तें सगलें डीप वेब आनी लिपिल्लें, विशेश प्रवेश करचो पडटा तें डार्क वेब. हाका खाशेलो ब्रावझर लागता. तुमची वळख लिपोवं येता. डार्क वेब हें बेकायदेशीर, गुन्यांवकारी कामां खातिरूच चड प्रसिद्ध आसा. ड्रग्स विकप, शस्त्रांचो वेव्हार, हॅकींग, डेटा चोरी, बोगस कागदपत्रां, नवो सिनेमा लीक जावप… असले प्रकार हांगा चलतात. कांय आंदोलक, चळवळी करपी गुपीत संवादा खातीर डार्क वेब वापरतात. सरकारी सेन्साॅरशिपी पसून स्वताक वांचोवपाक थोडे डार्क वेब वापरतात. केप्यां धरलां तें पार्सल उक्तेपणी मागयलां आसतलें. गोंय हें वितरण आनी ग्राहक केंद्र जालां. इझी मनी खातीर बरेच लोक ह्या मळाचेर आसतले. पर्यटकांक हें मागयिल्लें ड्रग्स विकतातूय आसतले. तपासा उपरांत सरतलें भायर.
झटपट पयसो, बेकारी, क्रिप्टो पेमेंट, पार्टी संस्कृताय हाका लागून घुंवळे वखदांचें चरतें पातळत आसा. तें फक्त दर्यावेळां पुरतें मर्यादीत उरूंक ना. कुरियर स्कॅनींग करप, ड्रोना वरवीं वखदांचो वेपार, सेवन हाचेर देखरेख दवरप, डार्क वेब निरिक्षण, कायदे खरपणान चालीक लावप, इंटरपोलाचो पालव घेवप, जनजागृताय अशे कांय उपाय घेवं येतात. जांकां धरतात, तांकां कितल्या दिसांनी जामीन मेळटा? दोशी सिद्ध जाल्यार कितलीं वर्सां खास्त जाता? तेलंगण प्रकरणाचें गोंयां कडेन कनेक्शन आसा व्हय? हाचो खोलायेन तपास जातलो आनी मुखेल सुत्रधारांक ख्यास्त जातली, अशी आस्त बाळगुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
