संवसारीक भलायकी दीस

भांगरभूंय | प्रतिनिधी

जिणेशैली बदलप शक्य नासली तरी, आहार आनी व्यायाम हातूंत गरजेचे बदल करून बरी भलायकी राखात.

आरोग्य धन संपदा, अशें आमी म्हणटात. आमची भलायकी बरी उरत जाल्यार आमचे जिणेंतली मोख आमी साध्य करूंक शकतात. भलायकी म्हणल्यार दुयेंसां पसून मुक्तताय न्हय तर शारिरीक, मानसीक समाजीक स्वास्थ आसप हाका आमी भलायकी अशें म्हणटात. आतांच्या धांवपळीच्या जगांत आमकां तरांतरांचीं दुयेंसां जावपाक लागल्यांत. पयलींचे लोक खूब काम करताले, एका गांवातल्यान दुसऱ्या गांवांत नाजाल्यार बाजार करपाक चलत वताले. वायनाचेर वाटपाचे काम करताले, कुळागरांत, भाटांत काम करताले, बांयचें उदक काडून, दात्यांचेर धान्य दळून आपले आपूणच कुडीक व्यायाम जातालो. आतां आमी भलायकी बरी उरपाक मोर्नींग, इविनींग वॉकींग करतात. घरा कडल्यान दोन चाकी नाजाल्यार चारचाकी घेवन वॉकींग करपाक येतात. हाका खरो व्यायाम म्हणूं येता काय? होय बी एक व्हड दुबावूच आसा.
आयज संवसारीक भलायकी दीस आसा. दरवर्सा ‘वर्ल्ड हेल्थ ऑर्गनायझेशन’ सात एप्रील हो दीस मनयता. संवसारांतल्या लोकांक भलायके विशीं जागरूक करपाक आनी भलायकीच ही सर्वस्व आसा, हें समजावपा खातीर हो दीस मनयतात.
मनशाची संख्या इतले गतीन वाडत आसा की, तांकां लागपी नितळ उदक, सकस अन्न आनी तांच्या मलमूत्र विसर्जनाची भलायकीची वेवस्था हाचो खंयच पत्तो दिश्टी पडना. फाटल्या कांय वर्सांत संवसाराच्या खांची कोनश्यांनी प्रदुशणान शिमो गांठल्यात. हवा, उदक आनी अन्न हांची पवित्रताय पार इबाडून गेल्या. परिणामी, फक्त ह्या प्रदुशणाक लागून दुयेंसां सुमारा भायर वाडल्यात. प्रगतीच्या नांवा खाला फाटल्या पन्नास वर्सांत मनशान सैमाचेर प्रचंड आक्रमण केलें. जीं झाडां-रानां सांबाळून दवरपाक जाय आशिल्लीं तीं मारून उडयिल्ल्यान आनी उदकाच्या सैमीक प्रवाहाक आडखळी हाडिल्ल्यान वा पुरयिल्ल्यान सेगीत हुंवाराची परिस्थिती निर्माण जाता.
भलायकी हीच खरी संवसारीक गिरेस्तकाय. आपले भलायकीची राखण करप हें आपल्या हातांत आसा. दर दिसा योग्य आहार आनी व्यायाम करीत जाल्यार खंयचेंच दुयेंस लागीं येवचें ना. पूण जर तुमी व्यायाम, सकस आनी पौश्टीक आहाराक टाळटात, जाल्यार तुमी दुयेंसाक आपोवणें दितात. हे खातीर चुकीच्या संवयीं कडल्यान शारिरीक दुयेंसांक आपोवणें दिनासतना निरोगी जिणेशैलीक पाळो दियात.
जिणेशैली बदलप शक्य नासली तरी, आहार आनी व्यायाम हातूंत गरजेचे बदल करून बरी भलायकी राखात.
संवासरीक भलायकी संघटणेच्या (WHO) वतीन हो दीस मनोवपाचो मुखेल उद्देश लोकां भितर भलायकी विशीं जागृताय (Awareness) निर्माण करप हो आसा. ह्या दिसा, WHO आनी संवसारभरचे हेर थळावे भलायकी संस्था सेमिनार, नाटकां आनी हेर माध्यमांतल्यान लोकांक निरोगी रावपाचें म्हत्व समजावन दितात.
हाचे भायर, संवसारीक भलायकी दिसा निमतान WHO लोकांक संवसारांत पातळपी नवीं दुयेंसां, तांचेर उपचार आनी दुयेंसाच्या कारणां विशीं म्हायती दितात. तशेंच, वैजकी मळार (Medical Field) नवे सोद, नवी वखदां (Medicines) आनी नवीं वाशिनां (Vaccines) हांचे विशीं लोकां भितर जागृताय करपा खातीर संवसारीक भलायकी दीस मनयतात.
उदरगतीच्या नांवान आमी रानां मारूंक लागल्यांत ताका लागून वाडत चालिल्ल्या हवेच्या प्रदुशणांक लागून जगांत तापमान वाडत आसा. हाका लागून झेलाचे दोंगर वितळून दर्याच्या उदकाची पातळी वाडपाची शक्यताय आसा, हुंवाराक लागून परतून डेंग्यु, चिकनगुनिया, मलेरिया, टॉयफॉयड, सारकीं दुयेंसां परतून येवपाची शक्यताय आसा.
कोरोना बगर आयजूय जगभरातले लाखांनी लोक जायत्या जीवघेण्या पिडां कडेन झूज दिवन आसात. हातूंत मलेरिया, पटकी (हैजा), क्षयरोग (टीबी), पोलियो, कोड (कुष्ठरोग), कॅन्सर आनी एचआयव्ही एड्स सारक्या पिडांचो आस्पाव जाता. जगभरातल्या लोकांक समाजीक, शारिरीक आनी मानसीक नदरेन भलायकेवंत करप आनी तांचे मदीं जागृताय निर्माण करप, हो ‘संवसारीक भलायकी दीस’ (World Health Day) मनोवपा फाटलो मुखेल उद्देश आसा.
सजीव सृश्टी आशिल्ली आमची एकच धरतरी आसा. तिचें आरोग्य सांबाळपाक जाय. तिचें आरोग्य बरें उरत जाल्यारूच आमची भलायकी बरी उरतली.

प्रा. किशोर वासुदेव वझे
नागेशीं