भांगरभूंय | प्रतिनिधी
कुडचडें लैंगीक अत्याचार प्रकरण
पणजी: कुडचडें लैंगीक अत्याचार प्रकरणांतल्या दोन पिडीत चलयांची जबानी न्यायदंडाधिकाऱ्यां मुखार नोंद केली. फुडल्या एक ते दोन दिसांत एका पिडीत चलयेची जबानी नोंद करतले. मजगतीं, दुबावीत सोहम नायक गुन्यांव फांट्याचे कोठयेंत आसा.
कुडचडें लैंगीक अत्याचार प्रकरण मुखार आयले उपरांत दुबावीत सोहम नायक हाचे आड चार पिडितांनी कागाळी दाखल केल्यात. तातूंतले दोन गुन्यांव कुडचडें पुलिसांनी दाखल करून गुन्यांव फांट्या कडेन वर्ग केल्ले. हातूंतले एके पिडितेचेर ती 14 वर्सांची आसतना तिचेर लैंगीक अत्याचार केले. जाल्यार दुसरे पिडितेक लैंगीक छळ करून तिका धमकी दिल्ल्याचो दावो कागाळेंत केला. ह्या दोनूय प्रकरणांतल्या पिडितांची न्यायदंडाधिकाऱ्यां मुखार जबानी नोंद जाल्ल्याचें मुखार आयलां. जाल्यार वयलें प्रकरण गुन्यांव फांट्या कडेन वर्ग केले उपरांत 14 वर्सा पिरायेचे चलयेन सोहम हाचे आड कागाळ दाखल केली.
तातूंत पिडीत चलये कडेन दुबावीत सोहमान इश्टागातीचे संबंद प्रस्थापीत केले. उपरांत तिचेर लैंगीक अत्याचार केले. हे घडणुकेचो मोबायल फोनाचेर चित्रीकरण करून प्रसारीत केल्ल्याचें कागाळींत म्हणलां. हाची दखल घेवन महिला पुलीस उपनिरिक्षक संध्या गुप्ता हांणी सोहमा आड पॉक्सो आनी गोंय बाल कायद्या खाला गुन्यांव दाखल करून कारवाय सुरू केल्या.
ह्या प्रकरणांत बाल न्यायालया कडल्यान मंजुरी मेळ्ळे उपरांत सोहमाक सद्या अटक केल्या. तशेंच केपेंच्या पयलो वर्ग न्यायालयान सोहमाक स दिसांची पुलीस कोठी दिल्या, ती सोमारा सोंपता. मजगतीं ह्या प्रकरणांत गुन्यांव फांट्यान कुडचडेंच्या एका फ्लॅटाचो पंचनामो केला.
ह्याच वेळार सोहमा आड सोमारा 30 मार्च दिसा गुन्यांव फांट्यांत 19 वर्सा पिरायेचे चलयेन कागाळ दाखल केल्ली. तातूंत दुबावीत सोहम नायकान जुलय 2025 ते 9 मार्च 2026 मजगतीं, पिडीत तरणाटे कडेन सोशल मिडियाच्या माध्यमांतल्यान इश्टागतीचे संबंद प्रस्थापीत करून लग्नाचें आस्वासन दिल्लें. तशेंच केपें म्हालांतल्या एका घसघशाचेर तशेंच हेर सुवातांनी व्हरून तिचेर लैंगीक अत्याचार केले. ही घडणूक मोबायलाचेर चित्रीकरण करून ते व्हायरल केल्ल्याचें कागाळींत म्हणलां.
ह्या कागाळीची दखल घेवन गुन्यांव फांट्यान दुबावीत सोहम नायका आड भारतीय न्याय संहितेच्या कलम 65 आनी म्हायती आनी तंत्रज्ञान कायद्याचें कलम 67 ए खाला गुन्यांव दाखल केला.
मजगतीं, ह्या प्रकरणांतले 19 वर्सां पिरायेचे चलयेन वैचकी चांचणी करपाक न्हयकार दिला. वयल्या दोनूय प्रकरणांतल्या पिडितांची अजून न्यायदंडाधिकाऱ्यां मुखार जबाब नोंद केल्लो ना. फुडल्या एक ते दोन दिसांत जबाब नोंद करतले अशी म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
