भांगरभूंय | प्रतिनिधी
पणजी: आंतरराष्ट्रीय पोस्टान विदेशांतल्यान पार्सला वरवीं ड्रग्स मागयिल्ल्या प्रकरणांत मुंबय कस्टमाच्या स्पेशल इंटिलिजेंस अॅण्ड इन्व्हेस्टिगेशन ब्रँचीच्या (एसआयआयबी) अधिकाऱ्यांनी केपेंचो अक्षय कवळेंकार ह्या तरणाट्याक अटक केल्या. ह्या प्रकरणांत हाचे पयलीं एसआयआयबीन अवेडें- पारोडेंचो अॅडवीन डिकॉस्टा ह्या तरणाट्याक अटक केल्ली.
आंतरराष्ट्रीय पोस्टा वतीन विदेशांतल्यान पार्सला वरवीं घुंवळे वखदांची तस्करी जायत आशिल्ल्याची म्हायती एसआयआयबी पंगडाक मेळिल्ली. तेप्रमाण मुंबय विमानतळाच्या पोस्टांत विदेशांतल्यान आयिल्लें एक पार्सल दुबावाचें दिशिल्ल्यान एसआयआयबी अधिकाऱ्यांनी ताची तपासणी केली.
तपासणी वेळार त्या पार्सलांत एक कील गांजो सांपडलो. ह्या प्रकरणांत गुन्यांव दाखल करून कारवाय सुरू केली. ह्याच वेळार अधिकाऱ्यांनी बनावट पार्सल सदर नाम्यार गोंयांत धाडलें. तशेंच अधिकारी गोंयांत आयले आनी पार्सल व्हरपा खातीर आयिल्लो दुबावीत अॅडवीन डिकॉस्टा (अवेडें- पारोडा) हाका केपें पुलिसांचे मजतीन ताब्यांत घेतलो.
उपरांत ताच्या घरा धाड घाली. हे धाडीत आनीक दोन कील गांजो जप्त केलो. फुडले चवकशे खातीर अॅडवीन डिकॉस्टाक मुंंबय व्हेला.
मजगतीं, गोंयच्या थळाव्या कस्टम अधिकाऱ्यांनी ह्या प्रकरणांत वांटेकार आशिल्ल्या अक्षय कवळेंकार हाका ताब्यांत घेवन कारवाय केली. ताकाय मुंबय व्हेला. ह्या प्रकरणाची फुडली कारवाय मुंबयंतल्या एसआयआयबी कडल्यान सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
