भांगरभूंय | प्रतिनिधी
आंतरराष्ट्रीय ड्रग्स सिडिंकेट हाडली उजवाडा
मुंबय, गोंय आनी दिल्लींत पातळिल्लें ड्रग्साचें जाळें
हैदराबाद/पणजी: घुंवळे वखदांचे तस्करी आड झूज दिवपी तेलंगणाच्या ‘ईगल’ ह्या विशेश तपास पंगडान दोन वर्सांच्या खर कश्टा उपरांत एका व्हड आंतरराष्ट्रीय ड्रग सिंडिकेट उजवाडा हाडलां. फ्रान्स, बेल्जियम आनी नेदरलॅण्ड ह्या सारक्या युरोपी देशांतल्यान कुरियर सेवांचो वापर करून भारतांत कोकेन सारक्या म्हारग घुंवळी वखदांची तस्करी करपी एका व्हड टोळयेचें कारस्थान उजवाडा आयलां. हे कारवायेक लागून देशांतल्या मुंबय, दिल्ली आनी बंगळुरू ह्या सारक्या म्हानगरांनी तशेंच गोंयांत पातळिल्ल्या घुंवळे वखदांच्या काळ्या साम्राज्याक व्हड धपको बसला.
ह्या प्रकरणांत 22 जाणांचेर आरोपपत्र दाखल केल्यात आनी हातूंत गोंयांतल्या पांच जाणांचो आस्पाव आशिल्ल्याची धपको दिवपी म्हायती मुखार आयल्या. हातूंत दोन टॅक्सी वेवसायिकांचोय आस्पाव आसा. टॅक्सी वरवीं पार्सलाची हाड-व्हर जाताली अशीय म्हायती मुखार आयल्या.
ह्या पुराय प्रकरणाचो सुत्रधार इवाला उडोका स्टेनली नांवाचो नायजेरियन नागरीक आशिल्ल्याचें तपासांत निश्पन्न जालां. स्टेनलीक 2024 वर्सा अटक केल्ली, पूण तो सद्या जामीन मेळोवन भायर आसून ताचेर खटलो सुरू आसा. घुंवळे वखदां तस्करी विरोधांत कायद्याच्या अंमलबजावणी खातीर स्थापन केल्ल्या ‘ईगल’ (Elite Action Group for Drug Law Enforcement) ह्या पंगडान केल्ल्या तपासांत धक्को दिवपी म्हायती मुखार आयल्या. स्टेनली हो नेदरलॅण्डांतलो मुखेल सप्लायराच्या संपर्कांत आशिल्लो. फ्रान्स आनी बेल्जियमांतल्यान घुंवळे वखदांचे कंन्साइन्मेंट्स तो भारतांत धाडून दितालो. सादारणपणान बोटीतल्यान वा विमानान छुपे पद्दतीन तस्करी करपाचें टाळून हे टोळयेन कुरियर मार्गाचो आपणाव केल्लो, ही गजाल तपास यंत्रणां खातीर सामकी दुर्मीळ आनी आव्हानात्मक थारल्या.
तपास पंगडान ह्या ड्रग रॅकेटाचें वितरण जाळें फक्त व्हड शारां पुरतेंच मर्यादीत नाशिल्ल्याचें स्पश्ट केलां. हैद्राबाद, मुंबय, दिल्ली, बंगळुरू सारकीं शारां आनी गोंय सारक्या सुवाते बगर अहमदनगर, लुधियाना, जालंधर, वलसाड आनी बेळगांव ह्या सारक्या टायर-2 वाठारांतूय ह्या घुंवळे वखदांची पुरवण करताले. ह्या रॅकेटांत पुणेंच्या सौरभ नांवाच्या एका कोरिओग्राफराचोय आस्पाव आशिल्ल्याचें मुखार आयलां. स्टेनलीचो वांगडी राफेल हाणें सौरभाक चडांत चड कमिशनाचें हांयस दाखोवन ह्या वेवसायांत ओडिल्लो. आंतरराष्ट्रीय पार्सल स्विकारप आनी ते निर्देशा प्रमाण गोंय आनी हेर शारांतल्या संपर्का मेरेन पावोवप अशें काम सौरभाक दिल्लें. सौरभाच्या पुण्यांतल्या घरा कडेन उण्यांत उण्यो स फावटी कोकेनाच्या कंन्साइन्मेंट्स आयिल्ल्यो, हातूंत दरेक पार्सलांत सुमार तीन कील कोकेन आसतालें.
हें आंतरराष्ट्रीय ड्रग सिंडिकेट सामकें नियोजनबद्ध पद्दतीन काम करतालें. नायजेरियांत बशिल्लो हॅडलर्स स्टेनलीक सेगीत सुचोवणी दिताले. स्टेनलीन भारतांत 500 परस चड गिरायकांचें जाळें विणिल्लें. घुंवळे वखदांच्या येरादारी खातीर ताणें टॅक्सी चालकांचीय एक विशेश टीम तयार केल्ली. गोंयच्या बंदखणींत आशिल्ल्या कांय ड्रग पेडलर्सा कडल्यानूय तो म्हाल उबारीत आशिल्ल्याचें तपासांत उक्तें जालां. सौरभान पुलिसांक दिल्ले म्हायती प्रमाण म्हणलां की, ताका ह्या पार्सालांनी कपडे आशिल्ल्याचें सांगून ताका फटयिल्लो आनी गोंय बंगळुरू सारक्या शारांनी दरेक डिलिव्हरी खातीर ताका 30 ते 80 हजार रुपया दिताले. खूबशे फावटी स्टेनली स्वता गोंयांत येवन ही कंन्साइन्मेंट ताब्यांत घेतलो, ही गजाल गोंयांतल्या ड्रग पेडलिंगाच्या वाडट्या वेपाराचेर उजवाड घालपी आसा.
सद्या ‘ईगल’ पंगडान पंजाब गुट्टा पुलिसांचे मजतीन ह्या प्रकरणांत 22 जाणांचेर आरोपपत्र दाखल केल्यात आनी आतां मेरेन स जाणांक अटक केल्या. अजून खूबशे मुखेल आरोपी फरार आसून तांचो सोद घेवपा खातीर केंद्रीय तपास यंत्रणांक सतर्क केलां. कार्गो आनी कुरियर तपासणी आनीक खर करपाच्यो सुचोवण्यो दिल्यात. हें रॅकेट जे पद्दतीन कार्यरत आशिल्लें ताचे वेल्यान देशांतल्या घुंवळे वखदांचें संकश्ट कितलें खोल मेरेन पातळ्ळां हें स्पश्ट जाता. तरणाट्यांक कमिशनाचें हांयस दाखोवन ह्या दलदलीत ओडपी ही टोळी पुरायपणान नानपयत करपा खातीर आतां आंतरराष्ट्रीय पांवड्यारूय तपासाची चक्रां घुंवूंक लागल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
