भांगरभूंय | प्रतिनिधी
क्रिकेट, फुटबाॅल, हाॅकींत आंतरराष्ट्रीय पांवड्यार खेळपी गोंयकार तशे उणेच. गोंय मुक्ती पयलीं जायते गोंयकार, मूळ गोंयकार आॅलिंपिकांत खेळ्ळ्यात. क्रिकेटींत दिलीप सरदेसाय, पारस म्हांबरे सोडल्यार दुसरो कोण नासतलो. तेंडुलकार आनी गावस्कार दोगांयचो कुळदेव गोंयांत. पूण, तांकां तशे गोंयकार म्हणपाक मेळचें ना. बुद्दीबळ, सर्फिंगांत गोंयकार खेळगडे आंतरराष्ट्रीय मळाचेर गाजल्यात. पूण, आॅलिंपिक, राष्ट्रकूल, एशियाड सर्ती गाजोवपी भारतीय कुस्तीपटू, नेमबाज, वेटलिफ्टर, बाॅक्सर हांचे सारकें आमी सरसकट आंतरराष्ट्रीय खेळां मळ गाजोवंक ना, हें मान्य करचेंच पडटलें. मात, यत्न केल्यार आमी थंय नांव जोडपाक शकतात. गोंय सरकारान पयरुच नामनेची बुद्दीबळपटू भक्ती कुलकर्णीचो भोवमान केलो, त्या वेळार एक म्हत्वाची घोशणा केली, ती म्हणल्यार आंतरराष्ट्रीय खेळां सर्तींत पदक मेळोवपी जैतवंतांक सरकारी नोकरी दितले! पयली नोकरी भक्तीक गोंय खेळां प्राधिकरणांत मेळटली. नोकरी दिवपाचो निर्णय बरो आसा, मात ते खातीर आंतरराष्ट्रीय पावतले अशे कुवतीचे खेळगडे जाय. तांकां तासां घालपी कुशळ प्रशिक्षक जाय. हो म्होंवा योग जेन्ना जुळटलो, तेन्नाच गोंयकारांक आंतरराष्ट्रीय खेळांनी पदकां मेळटलीं.
खेळगड्यांक सरकारी नोकरी दिवपाची परंपरा नवी न्हय. भारत स्वतंत्र जायत सावन रेल्वे आनी भौशीक मळा वयल्यो हेर सरकारी कंपनी तांकां नोकरी दित आयल्यात. तातूंत जायते गोंयकारूय आसात. ह्या सरकारी कंपन्यांचे खेळा पंगड त्या काळार देशांत आघाडेचेर आशिल्ले. हेच खेळगडे मागीर देशा खातीर खेळटाले. जायत्या उद्देगपतींनी, फुडाऱ्यांनी खेळां संस्कृताय जिती दवरपाचें काम केलां. गोंयांत साळगांवकार, धेंपो, चर्चील ब्रदर्स, सेसा गोवा अशा फुटबाॅल पंगडांनी नांव जोडलां. खेळाक लागून काय जायना, देशभरांत खेळगड्यांची जीण थीर जाल्या, हें मानून घेवचेंच पडटलें. तातूंतले भोवतेक गरीब, मध्यमवर्गीय घराब्यांतल्यान आयल्यात. वादग्रस्त आयपीएल क्रिकेट सर्तीचें उदाहरण घेयात. खेड्यांतले कितलेशेच भुरगे लाखांनी जोडपाक पावले, राष्ट्रीय पंगडांत खेळ्ळे, ते आयपीएलांतले बरे कामगिरी खातीरूच. सरकारान आंतरराष्ट्रीय मळाचेर बरी कामगिरी करप्यांक नोकरी दिवचीच, पूण राष्ट्रीय सर्तींनी बरी कामगिरी करपी गोंयकारां कडेन आडनदर करची न्हय. खेळगड्यांक शिक्षण पूर्ण करतना ग्रेस गुण मेळटात. सरकारी नोकरेंत प्राधान्यूय मेळटा. पूण, थारावीक खात्यां पुरतेंच. आतां हेर खात्यांनीय तांकां घेवपाचो विचार चलता.
चडांत चड खेळगडे तयार जातले जाल्यार गोंयां सयत सगल्या सरकारांक ल्हान भुरग्यांक प्राधान्य दिवचें पडटलें. भुरगीं स्वताच्या बळग्याचेर वयर सरतात, सर्तींनी पदकां मेळयतात. मागीर तांच्या येशाचें स्रय घेवपाक वा तांकां माथ्यार घेवन नाचपाक बरेच जाण मुखार येतात. अशें जावंक फावना. थळाव्या खेळगड्यांक सगली मजत करतले, अशें आमच्या खेळां मंत्र्यान जाहीर केलां. ताका पालव दिवचो. गोंयांतले प्रत्येक शाळे मुखार पाचवेंचार मैदान ही पयली गरज. मागीर खेळाचें प्रशिक्षण घेवपाक अर्थीक मजत, इनामां (घोशणा जातकच एका म्हयन्यां भितर तें बँकेंत जमा जावपाक जाय.), सरकारी नोकरी दिवपाक जाय. 14, 16 वर्सां सकयल्यो सर्ती गाजयतना ताका बऱ्या पगाराची नोकरी मेळटली हो विस्वास कोण दीत जाल्यार मुखार कितें, हो हुस्को आसचोना. हाचो ताचे कामगिरीचेरुय बरो परिणाम जातलो.
आयज सगल्यांत चड आकर्शण आसा तें क्रिकेटीचें. कारण तातूंत नांव आनी भरपूर पयसो मेळटलो ही आशा आसता. हेर खेळांनीय नांव, पयसो मेळटा, हाची खात्री दरेका तरणाट्याक पटत जाल्यार देशी खेळांच्या प्रशिक्षण शिबिरां, केंद्रां भायर रांको लागतल्यो. आमी खेळां मळार ल्हान- ल्हान देशां परस फाटल्यान आसात, हाचे फाटलें कारण फुडाऱ्यांनी, तांच्या घरच्यांनी समित्यांक घाल्लो वेटाळो. सगलेच अशें उलयतात. फाटीं अमूक राष्ट्रीय, आंतरराष्ट्रीय मॅची खेळिल्ल्यांकूच खेळां समित्यांचेर घेवपाचें थारिल्लें. हो नेम कित्याक चालीक लागना?
पयलीं खेळगडे घडोवपाची गरज आसा. ते खातीर राष्ट्रीय सर्त, राज्य पांवड्या वयल्यो सर्ती नेमान जावप गरजेचें. कांय कारणाक लागून आमकां फाटली राष्ट्रीय सर्त घेवप शक्य जावंक ना. कांय तालुक्यांनी सरकारी व्यायाम शाळा, मैदानां, पेंवपाचे तलाव आसात. मात, थंय येवपी खेळगड्यांचो आंकडो उणो आसा. सरकारी प्रशिक्षूय दांडी मारतात, अशेंय आयकूंक येता. नवे खेळगडे तयार जावपाक कितें अडचणीं आसात, तेंय पळोवंक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
