भांगरभूंय | प्रतिनिधी
पणजीः केंद्र सरकारान हाडिल्ल्या ‘जन विश्वास’ विधेयकाक लागून वेगवेगळ्या क्षेत्रांत म्हत्वाची सुदारणा जावपाक लागल्या. हाका लागून राज्यांतल्या वेपार सुलभतायेंत खूब वाड जातली आनी विस्वासाचेर आदारिल्ल्या शासनाक चालना मेळटली. ह्या निर्णयाक लागून कायदेशीर नेम पाळपाचो भार उणो जातलो आनी राज्यांत वेवसायाक बरें वातावरण तयार जातलें अशें गोंय वाणिज्य आनी उद्देग मंडळान सांगलां. ह्या सुदारणांक चेंबरान येवकार दिला.
हे संबंदीं जन विश्वास विधेयकाचो मुखेल हेत म्हळ्यार ल्हान गुन्यांव गुन्यांवकारी करप, बंदखणी बदला अर्थीक दंडाची तजवीज करप आनी वाद बेगीन सोडोवपाची यंत्रणा तयार करप अशें चेंबरान सांगलां.
ह्या विधेयकाक लागून गोंयचे अर्थवेवस्थेक, खास करून ‘सूक्ष्म, ल्हान आनी मध्यम उद्देग’ (एमएसएमई) क्षेत्राक व्हड फायदो जातलो.
राज्याच्या एकूण देशांतल्या उत्पादनांत (जीडीपी) ‘एमएसएमई’ क्षेत्राचें योगदान खूब म्हत्वाचें आसा.
ह्या विधेयकाक लागून नियामक आडमेळीं उणीं जातलीं आनी उद्देजकतेक चालना मेळटली. हाका लागून राज्यांत अर्थीक वाड जातली आनी नव्या रोजगाराची संद निर्माण जातली. बारीकसारीक गुन्यांवांचें गुन्यांवकारी स्वरूप रद्द केल्ल्यान प्रशासकीय लालफीतशाही उणी जातली. ताका लागून नागरिकांक गोंयांत रावपाक आनी वेवसाय करपाक सोंपें जातलें. वेवसायांक अनुकूल अशें वातावरण राज्यांत चड गुंतवणूक आकर्शीत करतलें, जाका लागून उद्देग धंद्याचे वाड आनी उदरगतीक फायदो जातलो.
उद्देगीक क्षेत्राचे उदरगती वांगडा गोंय वेवसायांक चड आकर्शक जागो निर्माण जातलो. हाका लागून गुंतवणूक आनी कुशळ मनीसबळाचे नदरेन गोंयांक हेर राज्यां कडेन सर्त करपाक मेळटली. ह्या विधेयकाक लागून गरजे भायर न्यायालयीन खटले उणे जातले. लाखांनी ल्हान ल्हान प्रकरणांचो बेगोबेग निवाडो जाल्ल्यान देशभरांतल्या वेवस्थेचेर विस्वास वाडटलो. हें विधेयक गोंयचे अर्थवेवस्थे खातीर क्रांतीकारी बदल घडोवपी थारतलें. सगल्या नागरीक तशेंच उद्देजकांनी ह्या सुदारणांक आदार दिवपाचो उलो चेंबरान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
