भांगरभूंय | प्रतिनिधी
एका काळार आमकां फकत दिल्ली वा हेर वाठारांनी बायलांचेर अत्याचार जाल्यात हें दिसाळ्यांनी वाचपाक मेळटालें, पूण आयज
पुराय संवसारांतले लोक गोंय राज्याक तशेंच गोंयकारांक ‘सुशेगाद लोक’ म्हूण वळखतात. शांतिप्रिय, पासिंयेंस आशिल्ले, राग बेगीन येनाशिल्ले लोक म्हूण आमकां वळखतात. पूण आयज जें किदें गोंयात चालू आसा तें पळयलार गोंयचें हें खाशेलपण शेणलां, अशेंच म्हणचें पडटलें. गोंयचें सैम, भौस, परंपरा, वागणूक आयज सगळें बदल्लां. तें पयलींचे दीस हे फकत आमकां यादींनी आयकुपाक मेळटात. पूण प्रत्यक्षांत हीं परिस्थिती बदलल्या आनी हाका जापसालदार आमीच.
आयज दरेका गजाली लागून आंदोलनां, धरणें चालू जाल्यांत. जावं तो आमचें सैम वांचोवपाक , एका सान चलयेचेर जाल्लो अत्याचार वा नोकरेच्या संदर्भांत आसूं, गोंयच्या दरेका वाठारांत आनी मळारांचेर दृश्य- अदृश्य आंदोलनां जातना आमकां दिसतात. जे कायद्याचे रक्षक आसात तेच लोक सत्तेच्या चेपणांत वा आपल्याचेर नकळटां अरिश्ट येतलें अशें मानून गुन्यांवां आड कांयच हालचाल करीनात. देखून आयज आमचेर ही पाळी आयल्या. आपलेच जल्मभूंयेक वा जमनीक वांटोवपाक आयज आमकां कायदे बदलात अशें सांगचें पडटा.
जें सत्ताधारी लोक कायदे पंडित म्हूण वावुरतात तांकां ना धड कायदाचे गिन्यान ना धड त्या मळारातलें गिन्यान. जे कोण सल्लो दिता तांचो सल्लोय घेवपाचीय बुद्द ह्या लोकांक आसना. आपल्याक जाय तशें कायदे तयार करून सुवार्थी वृत्तीन वागप इतलेंच तांकां कळटा…. आनी जर कोण तांच्या आड गेले जाल्यार भर सभेंत तांकां अटक करा अशेंय सांगपी सत्ताधारी हांगा आसात. देखून एका जाग्या वयल्या लोकांनी जर खंयच्याय प्रकल्पाक विरोध केलो जाल्यार तो थंय करप ना असो निर्णय घेवप आनी दुसरीकडे व्हरप, पूण तो प्रोजेक्ट आमी कसोच बंद करचेनात अशें सांगपीय आसात. अशें जर केलें ना जाल्यार लोकांक कशें कळटलें ह्या सत्ताधाऱ्यांनी उदरगत केल्या ती. कांयजाण मागीर बोल्सां कशीं भरपाचीं ताची वेवस्था करतात, तातूंत कांयच दुबाव ना.
एका काळार आमकां फकत दिल्ली वा हेर वाठारांनी बायलांचेर अत्याचार जाल्यात हें दिसाळ्यांनी वाचपाक मेळटालें, पूण आयज परिस्थिती इतलीं बदलल्या की, ह्यो गजाली सरार्सपणान आमच्या शांत, सुशेगाद गोंयांत जातना दिश्टी पडटात. बायलांचेर, सान चली भुरग्यांचेर अत्याचार जातात, पूण ताची कागाळ करपाक कोण मुखार सरताच अशें ना. हो अमक्यालो भुरगो, तो तमक्यालो बापूय अशें म्हणत लोकांच्या आनी पुलिसांच्या मनांतूय भंय निर्माण करून वता. बरेच जाण अन्याय जाता तो मोन्यानी सोंसून घेतात. शेवटाक न्याय मेळोवपाक लोकांक एकठांय जावन पुलीस स्टेशनार वच्चें पडटा.
आयज नोकरेचे बाबतींत ह्योच गजालीं मुखार येतात. पारदर्शकताय आसा म्हणटात; पूण खऱ्यांनीच ती आसा? आयज खुबश्या खात्यांनी उच्च पदांचेर लोक आसात; पूण तांका त्या पदाचें म्हत्व आनी त्या पदाचें गिन्यान खऱ्यांनीच आसा असो मोठो प्रस्न उप्रासता. सरकारी नोकरे भितर जर कोणी वरिश्ट अधिकारी म्हूण पदांचेर आसा तांणी सगळ्यांनीच त्या- त्या पदां खातीर आशिल्ल्यो परिक्षा प्रामाणीकपणान दिल्यात कांय फावोराचेर ते पास जाल्यात, नोकरेक लागल्यात हेंय कळना. प्रत्येक पदा खातीर नेमणूक करपाची एक नेमावली आसता; पूण आयज मेरेन ह्या नेमांचो उपेग केला? कांय तो मनीस आपलो अमूक लागता ह्या एका वाक्याचेर कामां जातात? आयज गोंयात दोन आयोग आसात, जें सरकारी नोकरेची संद दितात. उमेदवार दोनूयकडें अर्ज भरतात. पासूय जातात; एक, दोन उमेदवार दोनूय कडेन पास जाता जाल्यार योगायोग म्हणू येता. पूण सगळेंच जर दोनूय परिक्षांक पास जाता जाल्यार ‘दया कुछ तो गडबड है’ हो डायलॉग मनांत आयलें बगर रावंक ना. थोडे एका पेपरांत 35 टक्के घेतात, तर दुसऱ्या पेपरांत 90 टक्के, हें कशें?
शेवटाक सांगपाचे म्हणल्यार, गोंयकारांनो आतां उठपाक जाय. आनी हें जें कितें चल्लां ताका आळो घालपाक जाय. वेंचणुकेच्या वेळार मत मागपाक येता तेन्ना तांकां तांणी केल्ल्यो चुको दाखोवन दिवंक जाय तशेंच पयशांचे आशेन चुकीच्या मनशांक मत घालपाचें बंद करूंक जाय. तेन्नाच गोंय सुदारतलें आनी सुरक्षीत जातलें.
आकृती अशोक नायक
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
