भांगरभूंय | प्रतिनिधी
भांगरभूंय | प्रतिनिधी
पणजी : आठ वर्सां पयली वास्कोंतल्या सहारा इंडिया फायनान्सियल कॉर्पोरेश लिमिटेडांत नांवांन 6.69चो घोटाळो करून फरार जाल्लो ते कंपनीचो आदलो वेवस्थापक यमन्नावरनम रघुवीर हाका गोंयच्या अर्थीक गुन्यांव फांट्यान तेलंगणांत अटक केली. थंय तो देवळांत मुखेल पुजारी म्हूण वावुरतालो. ताणें आपणाक पुराय बदलून एक पक्को पुजारी, ज्योतिषी कसो रावतालो. तो मुखेल पुजारी म्हूण थंय आशिल्लो. ताच्या हाता खाला हेर 15 पुजारी आशिल्लें. ताका थंयच्यान उबारप सोंपें नाशिल्लें. पुलिसांनी थंय पुराय रेकी करून, खात्री जाल्या उपरांत ताका वेवस्थीत उखल्लो.
ह्या प्रकरणांत सहारा इंडियाचे मुखेल विभागीय अधिकारी ए. के. त्रिपाठी हांणी 17 फेब्रुवारी 2018 दिसा कागाळ दाखल केल्ली. ते प्रमाण सहारा इंडिया फायनान्शियल कॉर्पोरेशन लिमिटेडाच्या वास्को फांट्याचे कर्मचारी यमन्नावरनम राघुवीर शर्मा, कॅशियर के. वाय. शरीफ आनी झाकी खान हांणी 30 सप्टेंबर 2004 ते 6 नोव्हेंबर 2019 ह्या काळांत मेळून 7 कोटी 30 लाख 17 हजार 773 रुपयांचो घोटाळो केलो. तातूंतले 1,05,47,023 रुपया जमा जाल्ले. तिगूय दुबावितांनी 6 कोटी 69 लाख 66 हजार 77 रुपयांची अफरातफर करून फटयला म्हूण तांणी कागाळींत म्हणिल्लें. ह्या कागाळीची दखल घेवन ईओसीन दुबावितां आड गुन्यांव दाखल केलो. मजगतीं, गुन्यांव नोंद जावचे पयलींच दुबावीत यमन्नावरनम राघववीर शर्मा फरार जाल्लो. फुडें, ह्या प्रकरणाची चवकशी पुलीस निरिक्षक रझाशद शेख हांचे कडेन सोंपयल्ली.
इतलो तेंप पुलीस ताची म्हायती मेळटा जाल्यार पळयतालें. मजगतीं, मुखेल दुबावीत तेलंगणांत आशिल्ल्याची म्हायती इन्स्पेक्टर शेख हांकां मेळ्ळी. ते प्रमाण ईओसी अधिक्षक अर्शी आदील आनी उपअधिक्षक फ्रांसीस कोर्त हांच्या मार्गदर्शना खाला निरिक्षक रझाशद शेख, हवालदार रफीक मागोड आनी कॉन्स्टेबल दिप्तेश परब हे 26 मार्चाक तेलंगणाक वचपाक भायर सरले. हो पंगड 27 तारखेक थंय पावलो. तांणी तेलंगणांतल्या बीएचईएल हांगां आशिल्ल्या श्री वेदमाता गायत्री क्षेत्र वाठारांत चवकशी सुरू केली. ह्या वेळार दुबावीत त्या वाठारांतल्या सात देवळांचो मुखेल पुजारी आसा आनी च्या हाता खाला हेर 15 पुजारी काम करतात म्हूण तांकां पक्की म्हायती मेळ्ळी. पुलीस पंगड थंय पावलो तेन्ना थंय रामनवमीचे फाटभुंयेर मुखेल उत्सव चालू आशिल्लो. तशेंच पुजारी म्हूण वावुरपी यमन्नावरम रघुवीर शर्मा हांकां थंयचो लोक मानतात, अशेंय कळ्ळें.
थंय तो लग्न जुळटा कांय ना तें पळोवप, जल्म पत्रिका तयार करप, तशें भविश्य सांगप अशें कार्य करतालो. ताचें थंय खुबशे भक्त आसात, अशेंय दिसून आयलें. पंगडान पाशियेंस काडून दोन दीस हो तोच कांय म्हूण खात्री करून घेतली. 29 मार्चाक ताचे कडेन वचून ताच्या नांवान उलो मारलो, नांव घेना फुडें ताणें प्रतिसाद दिलो. ते वेळार ह्या पंगडान ताका ‘तुका अटक करपाक आयल्यात’ म्हूण सांगलें. चड शाणपण दाखयल्यार ताचे वायट परिणाम जातले, तुजी बदनामी जातली, तेन्ना वग्गी रावन आमच्या वांगडा यो म्हूण सांगून सोमारा रातीं ताका गोंयांत हाडलें. ते उपरांत ताका अटक केली.
मजगतीं, मंगळारा दुबावीत रघुवीर हाका वास्कोच्या प्रथम वर्ग न्यायालयांत हजर केलें, तेन्ना न्यायालयान ताका 14 दिसांची न्यायालयीन बंदखण फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
