भांगरभूंय | प्रतिनिधी
– स नगरपालिकांचो कार्यकाळ सोंपलो
-मे म्हयन्यांत नगरपालिका वेंचणूक जातली एकठांय
-दक्षिण गोंयांत आदर्श आचारसंहिता लागू
भांगरभूंय प्रतिनिधी
पणजीः राज्यांतल्या स नगरपालिकांचो कार्यकाळ सोंपलो. हाची दखल घेवन सरकारान दिवचल, कुडचडें – काकोडें, काणकोण, पेडणें, कुंकळ्ळी आनी वाळपय नगरपालिकांचेर प्रशासक नेमल्यात. जाल्यार एप्रीलांत आनीक एका पालिकेचो कार्यकाळ 26 मेक सोंपता. ते खातीर मे म्हयन्यांत राज्यांतली नगरपालिका वेंचणूक एकठांय जातली.
राज्यांतल्या दिवचल, पेडणें, वाळपय, कुंकळ्ळी, कुडचडें – काकोडें, काणकोण, म्हापशें, मुरगांव, मडगांव, सांगें आनी केपें ह्या 11 नगरपालिकांचो कार्यकाळ मे म्हयन्यांत सोंपतलो. हातूंतल्यान दिवचल, कुडचडें – काकोडें, काणकोण आनी पेडणें ह्या चार नगरपालिकांचो कार्यकाळ 31 मार्च 2026 दिसा सोंपता.जंय कुंकळ्ळी नगरपालिका 5 एप्रील 2026 आनी वाळपय नगरपालिका 8 एप्रील 2026 दिसा सोंपतली. हाची दखल घेवन सरकारान स नागरी सेवा अधिकाऱ्यांची प्रशासक म्हणून नेमणूक केल्या. ते प्रमाण अधिकारी अक्षय पोटेकर हांकां दिवचल पालिकेचो प्रशासक, सागर गावडे कुडचडें-काकोडें नगरपालिकेचो प्रशासक, शंकर गांवकार काणकोण नगरपालिकेचो प्रशासक, श्रीकांत पेडणेंकार पेडणें नगरपालिकेचो प्रशासक, विकास कांबळे हांचो कुंकळ्ळी आनी राजू देसाय हांची वाळपयचे प्रशासक म्हूण नेमणूक केल्या. हे संबंदी हो आदेश नगरपालिका प्रशासन संचालक बृजेश मणेरकार हांणी जारी केला.
मजगतीं, केपें पालिकेची मुजत 9 मेक सोंपता, जाल्यार म्हापशें, मुरगांव, मडगांव आनी सांगें नगरपालिकांची मुजत 26 मेक सोंपता. मजगतीं, फोंडें विधानसभेचे पोटवेंचणुके खातीर मतदान 9 एप्रीलाक जातलें, मतांची मेजणी 4 मेक जातली, देखून दक्षिण गोंयांत आदर्श आचारसंहिता लागू आसा. देखून मे म्हयन्यांत 11 नगरपालिकांची वेंचणूक एकठांय जातली. मजगतीं, राज्य वेंचणूक आयोगान हालींच वयल्या 11 पालिकेंतल्या वॉर्डांचो आंकडो उणो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
