भांगरभूंय | प्रतिनिधी
सरकाराच्या मतान, जुवारी न्हंये वयलो हो बांद उदरगती खातिरूच आशिल्लो. मात….
अखेरेक चिंबला उपरांत मिराबाग बांद प्रकल्पूय रद्द करपाचें आस्वासन राज्य सरकारान दिलें. फाटले बसके वेळार तें दिल्लें. मात, काल प्रकल्पाचे फायलीचेर तो रद्द जाल्ल्याची म्होर मारतले, अशें उतर मुख्यमंत्र्यान दिलें. थंयचे दोन व्हडले फोंड पुरपाची, साडेचार कोटींची रस्तो हाॅटमिक्स करपाची येवजण चालीक लावपाची आनी विधानसभेंत आवाज काडपी चारूय आंदोलकां वयल्यो केशी फाटी घेवपाची मागणी मुख्यमंत्र्यान मान्य केल्या. दोन दिसांनी आयटीआय वरवीं फायलीचेर कितें म्होर मारल्या, ते आमी तपासतले. तुर्ताक 49 दिसांनी आंदोलन फाटीं घेतलां, अशें आंदोलकांनी सांगलें. कालच्यान ते पणजे आझाद मैदानाचेर येवपाचे आशिल्ले. पूण, थंय जमावबंदी कलम लायिल्लें. ताचे आड खर प्रतिक्रिया आयिल्ल्यो. पणजे येवपाक भायर सरिल्ल्या आंदोलकांक पुलिसांनी गांवांतूच आडायिल्ले. थंय एका भुरग्याची भलायकी इबाडली, तेन्ना पुलीस आनी एका आंदोलकाचें तोंडाक तोंड लागलें. आतां प्रकल्प रद्द जाल्ल्यान ही सगली कोडसाण पयस जातली अशी आस्त. चिंबला फाटोफाट लोकांचें जाल्लें हें व्हडलें जैत, म्हणचें पडटलें. वेंचणुको लागीं पावल्यात, देखून हो निर्णय जाला, अशेंय थोड्यांक दिसता. फुडाराक लोकांक नाका आशिल्ले प्रकल्प, कलमांय रद्द जातलीं, असोय तांचो दावो.
सगलींच सरकारां शिंपणावळ, उदका पुरवण, हुंवाराचेर नियंत्रण, उद्देगीक विकास हे खातीर प्रकल्पांक मान्यताय दितात. सरकाराच्या मतान, जुवारी न्हंये वयलो हो बांद उदरगती खातिरूच आशिल्लो. मात, प्रकल्प सैम आनी गांवाचेर हावळ हाडटलो, अशें थळाव्यांक दिसलें आनी तांणी आंदोलन सुरू केलें. खरें म्हणल्यार खंयचोय प्रकल्प चालीक लायतना शेतकार, गांवकार हांचो सल्लो घेवपाक जाय. भासाभास करपाक जाय. तांकां पटोवन दिवपाक जाय. मात कांय प्रकल्प अचकीत सुरू जातात आनी तो आमचेर लादला, अशें थळाव्यांक दिसता. भायल्या अभियंत्यांक प्रकल्पाक लागून गांवांत नेमकें कितें जातलें, तें कळना. मात, अणभवी गांवकारांक येवपी धोके, संकश्टां रोखडींच दिसतात. अधिकृत अहवालांत तीं आसताच अशें ना. कांय वेळार प्रकल्प मंजूर जाल्ले आसतात. खर्च जाल्लो आसता. वयल्यान आदेश आयिल्लो आसता, लागींच्या मनशा कडेन ताचे हितसंबंद जोडिल्ले आसतात. ताका लागून ते रद्द जावपाक उशीर लागता. गोंयांत हालींच्या कांय वर्सांनी प्रकल्पाचो ‘प्र’ उच्चारचे पयलींच विरोध जावंक लागला. ताका लागून लोकांचो विस्वास जोडपाचें काम लोकप्रतिनिधींक पयलीं करचें पडटलें. कारण लोकांचो सहभाग आसले बगर प्रकल्प चालीक लागप तशें कठिणूच.
ह्या प्रकल्पा वरवीं जुवारींतलें उदक शेतां खातीर वापरप, धरणांत उदकाचो सांठो वाडोवप, खारें उदक न्हंयेंत येता तें आडावप, उद्देगांक उदका पुरवण करप, हीं कामां जातलीं, अशें बांद समर्थक म्हणटात. तर विरोधक म्हणटात, हो प्रकल्प कोणा खातीर तरी बांदतात. बांदाक लागून उदक तुंबतलें आनी शेतां, भाटां, घरां बुडटलीं. न्हंयेचो प्रवाह बदलतलो. पर्यावरणाचें लुकसाण जातलें. थळाव्यांक प्रकल्पाचो फायदो उणो आनी लुकसाण चड जातलें. धर्मीक विधी करपाचीं थळां, राखणदाराचीं देवळां बुडटलीं. उदक तुंबल्यार मानग्या सारके प्राणी वाडटले….!! समर्थकांक तो बांद लोकहिता खातीर दिसता, तर विरोधकांक लोकहिता विरोधांत.
आंदोलनाच्या काळांत आंदोलकांनी बांद घालिनासतना ह्या प्रकल्पा खातीर उदक व्हरपाक आमची हरकत ना अशें म्हणिल्लें. बांदा विणें हो प्रकल्प येसस्वी कसो करप, हे विशीं तांच्यो, तज्ञांच्यो सुचोवण्यो घेवं येतात. गोंयांतल्या सगल्या धरणांनी एप्रील, मे म्हयन्यांनीय फावो तितलो उदका सांठो आसतलो, हे खातीर यत्न करूं येतात. न्हंयो, व्हाळ नितळ करपाचेरूय भर दिवंक जाय. निदान ते इबाडप्यांक जल्माची बुद्द शिकोवंक जाय….. म्हादय प्रकरण खंय पावलां?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
