भांगरभूंय | प्रतिनिधी
कळंगूटे आयपीएल बेटिंगे खातीर आयिल्ल्या गुजराती तरणाट्याचो खून
दुबाविता सयत चार जाणांक अटक
मरड- म्हापश्यां कान कापिल्ले अवस्थेंत सांपडली कूड
म्हापशें: तिवायवाडो, कळंगूटे गेस्ट हावसांत आयपीएल बेटिंगे खातीर आयिल्ल्या गटांत जाल्ल्या वैयक्तीक वादांतल्यान राजभर रविनारायण रामदर्शनभाई (27, सुरत, गुजरात) ह्या तरणाट्याचो खून केलो. ह्या प्रकरणांत मुखेल दुबावीत आरोपी कोमल उत्तम बारसकर (28, मध्य प्रदेश) हाचे सयत चार जाणांक कळंगूट पुलिसांनी अटक केली. घरकान्नी विशीं आक्षेपार्ह टिप्पणी केल्ल्याचे तिडकीतल्यान दुबावितान हो खून केलो.
ही घडणूक शेनवारा, सकाळीं 6 वरांच्या सुमाराक तिवायवाडो हांगासरल्या रिसॉर्ट सांता मोनिकांत घडली. शेनवारा 28 सावन सुरू जावपी इंडियन प्रिमियर लीग सर्तींत सट्टेबाजी करपा खातीर 4 ते 5 जाणांचो पंगड गोंयांत आयिल्लो. तिवायवाडो- कळंगूटे कासा दी कॅजीनो गेस्ट हावसाच्यो चार कुडी तांणी आरक्षीत केल्ल्यो.
शेनवारा फांतोडेर ह्या पंगडा मदीं अचकीत वाद जालो. ह्या वेळार मयत राजभर हाणें दुबावीत कोमल हाचे घरकान्नी विशीं आक्षेपार्ह टिप्पणी केली. हाचे पयलीं तांचे मदीं मोबायलांतल्यो कांय गजाली पळोवपा वेल्यान हो वाद तेंगशेक पावलो. मयतान दुबाविता कडेन ताच्या घरकान्नीचे फोटे पळोवपाचो हट्ट धरलो, जी गजाल ताका मानवली ना. ह्या किरकोळ वादाचे रुपांतर ह्या खुनांत जालें.
दोगां मदीं लटाफट जातकच आनी दुबावीत सुरी घेवन फाटल्यान लागतकच मयतान गेस्ट हावसांतल्यान भायर धांव मारली. मुखा वेल्या रिसॉर्टांत तो पावलो आनी घडणूक थळार स्विमींग पुला कुशीक कोमल हाणें राजभर हाचेर चाकवान वार केले. राजभराचे हड्डें आनी पोटार घावे जाल्ल्यान रक्तस्राव जालो आनी ताका जाग्यारूच मरण आयलें.
घडणुके उपरांत आरोपीन वांगड्यां सयत थंय सावन पळ काडलो. घडणुकेची म्हायती मेळटकच कळंगूट पुलीस निरिक्षक लक्षी आमोणकार हांणी वांगडी पुलिसां सयत घडणूक थळार धांव घेतली आनी पंचनामो केलो.
पुलीस अधिक्षक हरिश्चंद्र मडकयकार, विश्वेश कर्पे हांणी घडणूक थळाक भैट दिवन पुलिसांक गरजेच्यो सुचोवण्यो केल्यो. वास घेवपी सुणें आनी ठशे तज्ञांकूय आपयले. पंचनाम्या उपरांत कूड मरणा उपरांतचे तपासणे खातीर बांबोळे गोमॅकाँत धाडून दिल्या.
रिसॉर्टाचो धनी जयंत बजाज हांचे कागाळीच्या आदारान पुलिसांनी गुन्यांव नोंद करून दुबावितांक अटक केली. फुडलो तपास पुलीस करतात.
पुलिसांनी मुखेल दुबावीत कमल बारसकर हाका दनपारां वास्को सावन ताब्यांत घेतलो आनी ताका अटक केली. दुबावीत आरोपी हो गोंयच्यान पळ काडपाचे तयारीत आशिल्लो. तशेंच पुलिसांनी हेर तिगांक अटक केल्या.
मयत राजभर हो स्वताचो जीव वाटावपा खातीर जखमी अवस्थेंत गेस्ट हावसाचे भायर सरलो. रस्तो हुपून मुखा वेल्या रिसॉर्टांत ताणें आलाशिरो घेवपाचो यत्न केलो. पूण तिडकल्लो दुबावीत कोमल हाणें ताचो फाटलाग केलो आनी ताका चाकवान सपासप वार करून जिवेशी मारलो. तशेंच खुना खातीर वापरिल्ली सुरी स्विमींग पुलांत उडोवन तो हेर वांगड्यां सयत घडणूक थळा वेल्यान पळून गेलो.
म्हापश्यां अनवळखी मनशाचो खून
बोडगिणी म्हापश्यां मरड वटेन शेत जमनीत एका अनवळखी मनशाची दुबावीत रितीन कूड सांपडली. मयताचो एक कापिल्लो कान गायब आसा. प्राथमीक नदरेन हो खुनाचो प्रकार आशिल्ल्याचें दिसून येता. मरणा उपरांतचे तपासणे उपरांत मरण आयिल्ल्याचें खरें करण मुखार येतलें. ही घडणूक शेनवारा 28 वेर सकाळीं 8 वरांच्या सुमाराक उक्तडार आयली. बोडगिणी मरडचे वटेन वचपी रस्त्याचे कुशीक कांय अंतराचेर शेत जमनींत एका मनशाची कूड आशिल्ल्याची म्हायती पुलिसांक मेळ्ळी. ही म्हायती मेळटकच म्हापशेंचे पुलीस निरिक्षक नवीन देसाय हांणी आपल्या वांगड्यां सयत घडणूक थळार धांव घेतली आनी पंचनामो केलो.
मयताच्या चेऱ्याचेर जखमो आशिल्ल्यो. तशेंच मयताचो एक कान गायब आशिल्लो. हो कान कापिल्ल्याच्यो खुणो तपासणे वेळार दिसून आयल्यो. पुलिसांनी पंचनामो करून कूड मरणा उपरांतचे तपासणे खातीर बांबोळे गोमॅकाँत धाडून दिल्या. पुलिसांनी असैमीक मरण म्हूण हें प्रकरण नोंद केलां. आयतारा मयताचे कुडीची मरणा उपरांतची तपासणी जातली, उपरांत ह्या अनवळखी मनशाच्या मरणा फाटलें कारण मुखार येतलें. ह्या प्रकरणाचो फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
