भांगरभूंय | प्रतिनिधी
नवे रस्ते करतना गरजेच्या सेवां खातीर पयलींच डक्ट बी तयार करप आतां बंधनकारक. म्हत्वाचें म्हणल्यार….
गोंयांत खाची – कोनशांनी रस्ते जाल्यात, मात लोक खूश नात. सदांच कागाळी करतात. कारण ह्या रस्त्यांची स्थिती सारकी ना. रस्त्यार फोंडकुलां काय फोंडकुलांनी रस्तो, तेंच कळना. रस्तो खणपाचें काम तर वर्साचे बाराय म्हयने चालू आसता. पावसांत पसून!! मात, आतां 16 मे ते 31 आॅक्टोबर मेरेन, स म्हयने रस्ते खणपाचेर बंदी आसतली. खणपाचो परवानो दिवपाचो अधिकार फक्त बांदकाम खात्याकूच आसतलो. ते खातीर समन्वय समितीय स्थापन केल्या. हो कल्पक उपक्रम येसस्वी थारल्यार गोंयकारांक थाकाय मेळटली. पूण रस्तो खणपी कांय खातीं वयल्यान चेपण हाडीत जाल्यार बांदकाम खातें बागवतलें काय तें पयस मोखून मारतलें, हाचेर सगलें कितें अवलंबून आसा.
रस्ते ही उदरगतीची कुरू. राज्याची रक्तवाहिनी. रस्त्यां वयल्यान येरादारी घोळटा आनी राज्याक गिरेस्तकाय हाडटा. रस्ते नात थंय उदरगत पावताच अशें ना. पूण हे रस्ते दर्जेदार आसचे. उणेंच पांच वर्सां तिगचे. कारण लोकांच्या पयशांनी ते बांदतात. भ्रश्टाचार जालो काय तेच पयशे फोंडांत वतात. रस्ते खणपाचें कामूय समन्वयान जावचें. कारण समन्वय नाशिल्ली उदरगत म्हणल्यार पयश्यांचो इबाड. उदरगत आनी शिस्त एकठांय चल्ल्यारूच त्या शाराक, गांवांक अर्थ. नाजाल्यार सगलें रेब्याचें कोंड. रस्ते मेळत तेन्ना खणिल्ल्यान फक्त पयश्यांचो धुंवर जायना, तर अपघात जावन लोक मरतात, घराबे त्रासांत पडटा. स्राप हो अंधविस्वास मानलो तरी कोण तो दीत अशें कर्तूब कोणेंच करपाक जायना. निश्पाप मनशांचो स्राप, वायट उतरां घेवप तर मनीसपणा भायली कृती.
नव्या निर्णया प्रमाण, भुंयगत लायट, उदकाचीं पायपां, इंटरनेट सारक्यो सेवा दिवपाक हाचे मुखार बांदकाम खात्यान परवानगी दिल्यारूच रस्तो खणपाक मेळटलो. समिती कितें तो निर्णय घेतली. फोन, आयटी, सिवरेज, वीज, उदक सगल्या विभागांचे अधिकारी समितींत आसात. रस्तो रुंदीकरण, हाॅटमिक्स डांबरीकरण हे खातीर 31 मे मेरेन आराखडो तयार करचो पडटलो. सगल्या खात्यांक युटीलीटी सेवांच्या कामाचो वर्सुकी आराखडो 30 जून मेरेन दिवचो पडटलो. ह्या सेवां खातीर रस्तो खणपाचें वेळापत्रक 31 जुलया मेरेन तयार जातलें. नवे रस्ते करतना गरजेच्या सेवां खातीर पयलींच डक्ट बी तयार करप आतां बंधनकारक. म्हत्वाचें म्हणल्यार रस्तो हाॅटमिक्स जालो काय पांच वर्सां मेरेन खणपाक बंदी आसतली. मात नळाचें कनेक्शन घेतना, तें इबाडल्यार दुरुस्त करतना रस्ते खणटले काय नात, तें स्पश्ट करचें पडटलें. ह्याच स्तंभांत रस्त्यां कडेन संबंदीत कामां एकाच वेळार निविदा काडून म्हयन्यां भितर पुराय करप शक्य ना, असो प्रस्न कांय म्हयन्यां पयलीं केल्लो. कोणे एकल्यान निविदा काडूंक ना वा निधी ना जाल्यार बाकींच्यांचीय कामां मुखार धुकलपाचीं आनी फुडें एकाच वेळार करपाचीं.
रस्ते खणिल्ल्यान येरादारी कोंयडी, अपघात जातात. दुचाकी चलोवप्यांक हें धोक्याचें. धुल्लाचें प्रदुशण, वेळ आनी इंधन फुकट वता. थळाव्या वेपाऱ्यांचेर परिणाम जाता. एका खात्यान रस्तो खणून काम जातकच तो डांबरी केलो काय दुसरें खातें येता. मागीर तिसरें. कसलेंच नियोजन ना. डांबराचीं कपयाळीं मारपाची नवी पद्दत रुढ जाल्या. रस्तो वयर सकयल जाता. आतां थारायलां तशें जातलें अशी अपेक्षा. कारण खंयच्याच खात्याक शिस्तीन काम करपाची संवय ना. परवानगे बगर रस्ते खणपाक मेळनात, ही तशी नवी कल्पना न्हय. कांय राज्यांनी ती आसा खंय. आतां अचकीत दुरुस्ती करची पडली जाल्यार कितें करतले, ताचेरूय विचार जाय.
बांदकाम खात्यान थारायलां तें प्रत्यक्षांत येवचें. ती फक्त घोशणा थारची न्हय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
