भांगरभूंय | प्रतिनिधी
पणजीः फाटल्या कांय वर्सांत गोंयांत रियल इस्टेट प्रकल्पांचो आंकडो वाडत आसा. 2020-21 ते 2024-25 ह्या काळांत गोंय रियल इस्टेट नियामक प्राधिकरणांत वट्ट 841 रियल इस्टेट बांदकाम प्रकल्प नोंद जाल्यात. हाचो अर्थ वर्साक सरासरी 168 प्रकल्प नोंद जाल्यात, म्हळ्यार दर म्हयन्याक सरासरी 14 प्रकल्प. वयल्या काळांत नोंदणी करपी रियल इस्टेट एजंटांचो आंकडो व्हड प्रमाणांत 72 टक्क्यांनी वाडून 146 जाला.
मेळिल्ले म्हायती प्रमाण 2020-21 वित्तीय वर्सा प्राधिकरणांत 121 रियल इस्टेट प्रकल्प आनी 85 एजंट नोंद जाल्यात. 2021-22 वर्सा 174 प्रकल्प आनी 62 एजंटांची नोंदणी जाल्ली.
2022-23 वर्सा प्रकल्प नोंदणींचो आंकडो वाडून 240 जालो. फाटल्या पांच वर्सांतली ही सगळ्यांत चड प्रकल्प नोंदणी आशिल्ली. त्या वर्सा 108 एजंटांनी प्राधिकरणांत नोंदणी केली. हाचे उपरांत 2023-24 वर्सा 154 प्रकल्प आनी 108 एजंट नोंद जाले आनी 2024-25 वर्सा 152 प्रकल्प आनी 146 एजंट नोंद जाले.
वयल्या काळांत सरकाराक वेगवेगळ्या रियल इस्टेट प्रकल्पां वरवीं आनी एजंट नोंदणी वरवीं 9.69 कोटी रुपयांची येणावळ मेळ्ळ्या. हाचो अर्थ वर्साक सरासरी 1.93 कोटी रुपया म्हळ्यार म्हयन्याक 16.15 लाख रुपया येणावळ मेळ्ळ्या. एप्रील ते डिसेंबर 2025 ह्या काळांत राज्यांत वट्ट 116 रियल इस्टेट प्रकल्पांची नोंदणी जाल्ली. ह्या काळांत 74 एजंटांनी प्राधिकरणांत नोंदणी केल्या. हाका लागून सरकाराक एक कोटी 48 लाख 9 हजार रुपया येणावळ मेळ्ळ्या.
————————-
98 एजंटांची नोंदणी रद्द
2020 ते 2025 ह्या काळांत राज्यांत नोंद जाल्ले 20 प्रकल्प वेगवेगळ्या कारणांक लागून रद्द जाले. मजगतीं, ह्या काळांत 98 एजंटांची नोंदणी रद्द जाली. हाचे भायर नेमांक पाळो दिवंक नाशिल्ल्यान 29 प्रकल्पांची नोंदणी रद्द केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
