मडगांवां उणो केल्ल्या एक प्रभागाची म्हायती जनतेक मेळपाक जाय: सरदेसाय

भांगरभूंय | प्रतिनिधी

मडगांवः राज्य सरकारान मंत्रीमंडळ बसकेंत मडगांव पालिकेचे प्रभाग वाडोवपाचो निर्णय घेतिल्लो. मात आतां वेंचणूक आयोगान एक प्रभाग उणो केल्ल्यान प्रभाग रचणूक आनी प्रभागा प्रमाण आरक्षणाच्या प्रस्नांत पारदर्शकताय आसप खूब गरजेचें, अशें मत आमदार विजय सरदेसाय हांणी मांडलें. हे प्रक्रियेची म्हायती जनतेक आनी लोकप्रतिनिधींक वेळार मेळपाक जाय, अशी मागणीय तांणी केली.
राज्य वेंचणूक आयोगान हालींच अधिसुचोवणी जारी केल्या, तातूंत मडगांव पालिकेचो एक प्रभाग उणो केला. हे विशीं टिप्पणी करतना सरदेसाय हांणी सांगलें, मडगांव पालिकेचे प्रभाग वाडोवपाचो निर्णय मंत्रीमंडळान घेतला आनी ताचे कडेन संबंदीत विधेयक विधानसभेंत हाडपाचें आशिल्लें. मात अधिवेशन बेगीन सोंपिल्ल्यान ताचेर चर्चा जावंक ना. सध्याचे अधिसुचोवणे प्रमाण मडगांवां २५ प्रभागां बदला २४ प्रभाग केल्यात. ‘एसआयआर’ प्रक्रिये उपरांत मतदारांचो आंकडो उणो जाल्ल्यान हो निर्णय घेतला आसतलो, असो अदमास तांणी उक्तायला. पूण भौगोलिक नदरेन उणो केल्ल्या वाड्याचो खंयच्या प्रभागांत आस्पाव जातलो ह्या प्रस्नाची आजूनय जाप मेळूंक ना अशें तांणी सांगलें.
वेंचणुकेची प्रक्रिया पुरायेन पारदर्शक आसची अशें सांगून तांणी सिमांकन आनी आरक्षणाच्या प्रस्नाचेरूय भर दिली. सध्या फकत वेंचणूक आयोग आनी सत्ताधारी पक्षा कडेन नव्या प्रभागाची रचणूक आनी आरक्षणाची म्हायती आसा असो आरोप सरदेसाय हांणी केला. मर्यादे उपरांत आरक्षणाचो प्रस्न म्हत्वाचो आसतलो आनी ओबीसी, अनुसूचित जाती आनी अनुसूचित जनजाती वर्गा खातीर कितल्यो सुवातो आसपाक जाय हाची अचूक म्हायती ओबीसी आयोगा कडेन आसप गरजेचें. २५ प्रभागांचीच म्हायती तांचे कडेन उपलब्ध नाशिल्ली, मागीर २४ सुवातांची म्हायती केन्ना मेळटली, असो प्रस्न तांणी हाजीर केलो.
तशेंच प्रभागांचे नंबर बदल्ल्यार थारावीक घटकांचेर अन्याय जावपाचो भंय तांणी उक्तायलो. वेंचणूक प्रक्रियेंत पारदर्शकताय येवची, हे खातीर न्यायालयांत याचिकाय दाखल केली. पालिकेचो कार्यकाळ सोंपले उपरांत थंय प्रशासकाची नेमणूक करतले. हाका लागून वेंचणुकां पयलीं सिमांकन, प्रभाग रचणूक आनी आरक्षण हे विशीं सरकारान स्पश्टीकरण दिवन सगली म्हायती वेळार उपलब्ध करून दिवची, अशें सरदेसाय हांणी स्पश्ट केलें.