भांगरभूंय | प्रतिनिधी
उत्तर गोंयच्या चडश्या मुखेल पंपांवेलो सांठो सोंपलो
पणजी: आखाती देशांतल्या झुजाचे परिस्थितीचे फाटभूंयेर निर्माण जाल्ल्या इंधन नाशिल्ल्याच्या वावड्यांक लागून पुराय गोंयांत लोकां मदीं पेत्रोल सोंपिल्ल्याचो भंय पातळ्ळा. फुडाराक पेत्रोल आनी डिजल मेळचें ना ह्या भंयान नागरिकांनी पेत्रोल पंपांचेर गर्दी केल्ल्यान पुराय सप्तकभराचो सांठो तीन दिसांनीच सोंपलो. हे अनपेक्षीत मागणेक लागून पेत्रोल पंप चालकांचें गणित पुरायेन इबाडलां. उत्तर गोंयच्या चडश्या मुखेल पंपांवेलो सांठो सोंपिल्ल्यान ते बंद दवरल्यात. सध्याचे स्थितींत फकत फकत पेडणें म्हालांतल्या धारगळच्या पेत्रोल पंपाचेर पेत्रोल उपलब्ध आशिल्ल्या हांग वाहनांच्यो लांबचे लांब रांको लागल्यात. मुख्यमंत्र्यांनी काल मंत्रिमंडळाचे बसके उपरांत घेतिल्ले पत्रकार परिशदेंतूय एकंदर स्थिती स्पश्ट केल्ली. मात लोक सध्या पॅनीक मोडांत गेल्ल्याचें दिसता.
मजगतीं, राजधानी पणजेंत चडशे पेत्रोल पंप चालू आसात. तांचेर कालचे परस गर्दी उणी आसा. कांय पंपांचेर पेत्रोल सोंपलां. जाल्यार कांय पंपांचेर फकत डिझेल मेळटा.
मुळांत दर दिसा पेत्रोल आनी डिजेल कितलें विकपाचें हाचो हिशेब पक्को आसता. इंधनाचो सांठो थारावीक मर्यादे परस उणो जाल्यार तो रिफील करतात. केन्नाच एमर्जन्सी आयल्यार ते खातीरूय वेगळी वेवस्था आसता. आतां जो सांठो आशिल्लो तो आठ दीस चलतलो अश्या हिशेबान पेत्रोल पंप चालकांनी रिफील केल्लो. तो सांठो आतां तीन दिसांनीच सोंपला.
प्रधानमंत्री नरेंद्र मोदी हांणी झुजाचे फाटभूंयेर केल्ल्या विधानाचो चुकीचो अर्थ लायिल्ल्यान नागरीक ‘पॅनीक मोडा’र गेल्यात. कळंगूटे, बागा आनी मिरामार अश्या दर्यादेग वाठारांनी इंधना खातीर वाहनांच्यो रांको रस्त्यार पाविल्ल्यान हांगा येरादारी कोयंडी निर्माण जाल्या. महाराष्ट्र आनी कर्नाटक राज्यांतल्या पर्यटकांनीय सवाय इंधनाच्या हांयसान कॅन भरून सांठो करपाक सुरवात केल्या. मजगतीं, गोंय पेत्रोल डीलर्स असोसिएशनाचे अध्यक्ष नरहर ठाकूर हांणी स्पश्ट केलां, राज्यांत इंधनाचो उणाव ना. डेपोंत सात ते आठ दीस पावतलो इतलो सांठो उपलब्ध आसा. फकत नागरिकांनी घाई केल्ल्यान कांय पंपांचेर सांठो तात्पुरतो सोंपला.
कदंब म्हामंडळाकय ह्या इंधन संकश्टाचो व्हड फटको बसला. तेल कंपन्यां कडल्यान सरळ मेळपी डिझेल ११० रुपयांनी लिटर पडटा, जाल्यार भायर पंपांचेर तें ८८.२० रुपया आसा. हाका लागून कदंब बस चालक सवाय डिझेला खातीर भायल्या पंपांचेर रांको लायतात, हाचो परिणाम म्हळ्यार बस वेळार पावपाक कळाव जाता. हाका लागून पणजे बस स्टॅण्डाचेर प्रवाशांचे बरेच हाल जाल्यात. येरादारी मंत्र्यान हातूंत लक्ष घालचें अशी लोकांची मागणी आसा.
दुसरे वटेन राज्यभरांतल्या उत्तर-दक्षिण दर्यादेगेवेले वाठार, पणजी-मडगांव- वास्को ह्या सारक्या जायत्या सुवातींनी वेपारी गॅस सिलिंडरांचो खर उणाव निर्माण जाला. सध्या कोटांतली फकत २० टक्के पुरवण सुरू आसा, जाका लागून हॉटेलकारां मदीं भंय निर्माण जाला. गॅसाच्या उणावाक लागून जायत्या रेस्टॉरंटांनी मेनू मर्यादीत केला आनी कांय सुवातींनी पारंपारीक चुलीचेर रांदपाक सुरवात केल्या. काळ्या बाजारांत सिलिंडराची मागणी पांच ते सात हजार रुपया आसा. नागरी पुरवण खात्यान खर पावलां उखलून काळो बाजार आडावपाचो जरी यत्न केला तरी गॅस पुरवण सुरळीत नाशिल्ल्यान पर्यटन हंगामांत हॉटेल उद्देगा सामकार व्हड संकट येवन उबें रावलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
