भांगरभूंय | प्रतिनिधी
– गोंयभर खवदळ, इंधन सांठो करपाचेर भर
– पर्यटक काचाबूल, गाडयांच्यो टांकयो फूल
-डिझेलाचें कोफुसांव : कदंब सेवेंत आडखळ
पणजी : इंधनाचो उणाव आसा, इंधन सोंपतलें, अशी वावडी पातळिल्ल्यान गोंयभर खवदळ पडला. जो तो गाडयो घेवन पेट्रोल पंपांचेर लायनीक उबो राविल्लो दिसता. कांय लोक पंपांचेर गॅलन, बाटल्यांनी पेट्रोल दिना, तरी लेगीत गॅलन, बाटल्यो घेवन पंपांचेर भरून घेवपाक पावतात. गोंयांत भोंवपाक आयिल्लें पर्यटक काचाबूल जाल्यात. आपल्यो गाडयो फूल करून घेवपा खातीर तेंवूय रांकेंत दिसताले. घरा पावपा खातीर गाडयेंत इंधन आसचें म्हूण तांची धडपड चालू आसा. राज्यांतले सगलें पेट्रोल पंप फूल. गोंयांत 8 दीस पावतलो इतलो इंधन सांठो आसा. भिवपाची गरज ना म्हूण मुख्यमंत्र्यान आवाहन केलें. तरीय इंधन संकश्टाक तोंड दिवपाक नाका म्हूण लोक काचाबूल जावन पेट्रोल पंपांचेर पावपाक लागले.
आखाती देशांत चालू आशिल्ल्या झुजाचे फाटभुंयेर भारतांत इंधन पावपाक आडमेळी येवपाक लागल्यात. प्रधानमंत्री नरेंद्र मोदी हांणी ह्या संक्श्टाची तुळा कोव्हीड अरिश्टा कडेन करून सगल्यांनी एकठांय झूज दिवपाचो उलो मारिल्लो. तशेंच पावतलो इतलो कच्च्या तेलाचो सांठो आसा, अशेंय सांगलें. मात, इंधन सोंपता म्हूण वावडी पातळून देशभर पेट्रोल पंपांचेर लायनी लागल्यात. मंगळार मेरेन सुशेगाद आशिल्लें गोंय मंगळारा अकस्मात काचाबूल जालें. सकाळ सावन पेट्रोल पंपांचेर घिट्ट्यो पडपाक लागल्यो. पेट्रोल आनी डिझेल सगल्यांक वेवस्थीत जाय तितलें मेळटाले. कांय पंपांनी बाटल्यो, गॅलनानी इंधन दिवचें ना म्हूण बरयिल्लें.
…………
पर्यटकांची धांवपळ
फाटल्या कांय दिसां सावन राज्यांत पर्यटकांचो आंकडो वाडला. डिसेंबर म्हयन्या परस चड पर्यटक ह्या म्हयन्यांत दिसतात. पंपांचेर गर्दी पळोवन, तशेंच पेट्रोलाचो उणाव जातलो ह्या भंयान तेंवूय पंपांचेर रांकेंत रावले. घरा पावपाक गाडयांनी पेट्रोल आसचें म्हूण तांची धांवपळ चालू आशिल्लीं. गोंयांत पेट्रोल सवाय म्हूण गोंयांत पावता म्हणसर तांच्या गाडयांच्यो टाकयो रिकामी करून येतात हांगां भरतात, कांय गाडयांनी गॅलनूय आशिल्लें. पेट्रोल भरपाक पंपांचेर ना थंयच्यान लोक पावपाक लागिल्लो. कांय पंपांचेर 100-150 मीटर मेरेन गाडयांच्यो रांको लागिल्ल्यो.
…………….
सवाय डिझेला खातीर
कदंबा खाजगी पंपांचेर
कदंबांचे डिझेल सोंपला ते खातीर कदंबा येना म्हूण कळटाच पणजे बस स्टँडार बोवाळ पडलो. कितल्योश्योच कदंबा येवंक ना म्हूण नेमान कदंबान वचपी लोक बस स्टँडाचेर बसींची वाट पळयत उरिल्लो. बसी नाशिल्ल्यान कदंबा बस स्टँडाचेर बुधवारा सांजें घे गर्दी जाल्ली.
इंधन कंपनींनी भौशीक संस्थांक लागपी डिझेलाचे दरांत वाड केल्या. जाल्यार लोकांक लागपी डिझेलाचे दर आसा तशेंच दवरल्यात. कदंबा भौशीक संस्था आशिल्ल्यान तांकां थेट पुरवण करपी तेल कंपनीन डिझेलाचे दर रु. 110 मेरेन वाडयल्यात. जाल्यार खाजगी पंपांचेर डिझेलाचे दर 88 रुपया 20 पयशे दवरला, अशी म्हायती कदंब येरादारी म्हामंडळाचे अध्यक्ष उल्हास तुयेंकार हांणी दिली.
110 रुपयांचे डिझेल भरचें पडटा म्हूण कदंबाच्यो बशी खाजगी पंपांचेर डिझेल भरपाक लागल्यो. भायल्या पंपांचेर डिझेल भरपाक रांकेंत रावचें पडटा, देखून बशींक बस स्टँडांचेर पावपाक कळाव जाता, अशी म्हायतीय तुयेंकार हांणी दिली.
हॉटेलांनी चुली वयलें जेवण
दर्यादेग वाठारांनी वेवसायीक सिलिंडरांचो सामकोच उणाव जाला. चडश्या हॉटेल – रॅस्टोरंटांनी आता चुलीर रांदपाक चालू केलां. हॉटेलवाल्यांक जाय तितले सिलिंडर मेळना, पर्यटक वाडल्यात, गिरायक तर जाय, ते खातीर हॉटेल-रेस्टोरंटांनी तांच्या उक्त्या सुवातांचेर चुली घालून रांदपाक सुरवात केल्या. मर्यादीत खाणां-जेवणां करतात. सुरवेक मेळटा तांचे कडल्यान सांगता त्या दरान सिलिंडर घेतले. मात, हें परवडपाचें ना अशें दिशिल्ल्यान हॉटेलवाले चूल उबारपाचेर भर दितात. दाळ, बिर्याणी, शीत, रसम अशी खाणां चुलीर रांदतात. शिवराक थाळी लेगीत मर्यादीत स्वरूपांत मेळटा. इडली, उथ्थप्पा, डोसा सारकिल्ल्या पदार्थांचे दर वाडयल्यात.
दर्यादेग वाठारांतली कांय हॉटेलां-रॅस्टोरंटां बंद दवरिल्ली दिसतात.
सिलिंडराचो काळो बाजार?
सिलिंडर नाशिल्ल्यान कांय लोक 3-3 हजार रुपया फारीक करून मेळटा तांचे कडल्यान सिलिंडर घेवपाक लागल्यात म्हूण अखील गोंय परंपरीक शॅक धनी संघटणेचे अध्यक्ष मॅन्युएल कार्दोज हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
