भांगरभूंय | प्रतिनिधी
कदंब बायपासार जाल्लो अपघात
पणजी: कदंब बायपासार मारुती व्हॅगन आर मोटारीन धपको दिल्ल्यान आनी ट्रॅक्टर आंगा वेल्यान गेल्ल्यान दुचाकी चालक गंभीर जखमी जाल्लो. मजगतीं, बांबोळे गोमॅकाँत उपचारा वेळार ताका मरण आयलें. ह्या प्रकरणांत पोरणें गोंय पुलिसांनी अनवळखी मारुती व्हॅगन आर मोटार आनी ट्रॅक्टर चालकां आड गुन्यांव दाखल करून तपास सुरू केला.
पोरणें गोंय पुलिसांनी दिल्ले म्हायती प्रमाण, ह्या प्रकरणांत आडपय- फोंडेंची आश्विनी नायक हांणी कागाळ दाखल केल्या ते प्रमाण, 28 फेब्रुवारी 2026 दिसा सांजवेळा 6 ते 6.30 वरां मजगतीं कदंब बायपासार फर्न कदंबा हॉटेला मुखार, अनवळखी मारुती व्हॅगन आर मोटारीत पयलीं कागाळदाराचो घरकार चलयतल्या दुचाकीक धापको दिलो. उपरांत तीं दोगांय रस्त्यार पडलीं. ह्याच वेळार फाटल्यान येवपी ट्रॅक्टर दुचाकी चलयतल्याच्या आंगा वेल्यान गेलो. तातूंत तो गंभीर जखमी जालो.
उपरांत 108 एम्बुलन्सीचे मजतीन कागाळदार आनी तिच्या घरकाराक बांबोळे गोंय वैजकी म्हाविद्यालय हॉस्पिटलांत दाखल केले. मजगतीं, उपचार सुरू आसतना दुचाकी चालकाक मरण आयलें.
ह्या प्रकरणांत पोरणें गोंय पुलिसांनी अनवळखी मारुती व्हॅगन आर मोटार आनी ट्रॅक्टर चालकां आड भारतीय न्याय संहितेच्या कलम 281, 125(बी) आनी 106(2) तशेंच मोटार वाहन कायद्याचें कलम 134 (ए)(बी) खाला गुन्यांव दाखल केला.
ह्या प्रकरणांत पुलीस निरिक्षक गौरीश मळीक हांच्या मार्गदर्शना खाला उपनिरिक्षक संकेत पोखरे फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
