आवाज वरिश्ठांचो….

भांगरभूंय | प्रतिनिधी

केरळांत भारतीय वरिश्ठ पत्रकार म्हासंघाचे (एसजेएफआय) बसकेची बुन्याद वरिश्ठ पत्रकारांनी सात म्हयन्यां आदीं घाल्ली. गोंयचे वरिश्ठ पत्रकार केरळांत गेल्ले. आमकां उपाध्यक्षपद, गोंयच्या तीन पत्रकारांक राश्ट्रीय मंडळ वांगडीपद मेळ्ळां. बसका सोंपून गोंयांत येतना मेळिल्ले नवे उमेदीन कितें तरी ज्येश्ठ, वरिश्ठांक दिवचें अशें दिसलें.
गूगल बसकेंतल्यान हालींच गोंयांत जाल्ल्या महासंघाच्या (एसजेएफ आयच्या) जापसालदारकी आयली.
पिरायेन ज्येश्ठ नागरीक आशिल्ल्यान आमकां बसकेक कोण आदार दितलो म्हणून आमी चिंतेस्त आशिल्लीं. गोंय वरिश्ठ पत्रकार संघटनेन एसजेएफआयचे बसकेची जबाबदारी आंगार घेतली. तेन्ना आमच्या दोळ्यां मुखार मुख्यमंत्री डॉ. प्रमोद सावंत आशिल्ले. आदींच्या बसकांनी सरकाराचो पालव मेळिल्लो आतांय मेळटलो हे आशेर तयारेक सुरुवात जाली. व्यस्त मुख्यमंत्र्यांची अपॉयंटमँट मेळपाक कळाव लागलो. आपोवणें आयलें तेन्ना पणजे महालक्ष्मीचेर आमी चार वांगडी गेले. अर्थसंकल्पाच्यो बसका जानेवारीचे अखेरेक सुरू आशिल्ल्यो. आमकां चड वेळ बसचें पडलेंना. मुख्यमंत्र्यांक कित्याक आयल्यांत ताची म्हायती दिली. मुख्यमंत्र्यांनी दिल्ल्या आत्मविश्वासान आमी वावराक लागलीं.
गोंयच्या पत्रकारां खातीर आशिल्ली कल्याण निधी येवजण बरी आसा. ती देशांत समान वेतन येवजण म्हणून पावची. पत्रकारांचें नेतृत्व तुमकां करचें पडटलें, पत्रकारांक प्रधानमंत्र्या मेरेन व्हरचें अशें आमचे मागणेकय मुख्यमंत्र्यांनी येवकार दिलो.
मुख्यमंत्र्यांच्या तेंक्यार गोंय वरिश्ठ पत्रकार संघटना मुखार गेली. देड म्हयन्या भितर बसका जाली, चड बोवाळ, प्रसिद्धीचे वाटेक वचनासतना. वरिश्ठ पत्रकार गुरुदास सावळ कशेच आयोजन समितीची जापसालदारकी घेवंक तयार नाशिल्ले. मुख्यमंत्र्यांचे भेटे उपरांत आयोजन समितीपद तांणी घेतलें. बसके पासत चड वावुरले सुभाष कृष्णा नायक, सावळबाब, सुधाकर नायक. कांय आप वावुरपी, सुभाषाचे इश्ट. गोंय श्रमीक पत्रकार संघटनेन दिल्ल्या बळग्याचेर एसजेएफ आय बसका जाली.
कमी उतरांनी वॉटस अॅप ग्रुपांतल्यान केरळचे वरिश्ठ पत्रकार म्हासंघाचे पदाधिकारी फ्रँको लुईस हांणी देसभरांतल्या वांगड्यांक उलो मारलो. ते भारतीय वरिश्ठ पत्रकार म्हासंघाच्या राश्ट्रीय मंडळाचे वांगडी. म्हासंघाचे म्हाचिटणीस एन चेकुट्टी हाणी वरिश्ठ पत्रकारांक जागयलें. दोनशे अडिचशेंवयर वांगडी बसकेक हाडपाची तांची तयारी. म्हजी सुचोवणी बसका ल्हान जावची, चडांत चड शंभर, गोंयचे 25 -30. झुजाचें वारें, भलायकेच्यो अडचणी आसतनाय काश्मीर ते कन्याकुमारीमेरेनचे वरिश्ठ पत्रकार गोंयांत आयले. जम्मू काश्मीरांत पत्रकार निधी येवजण ना ती आतां जावपाची आस्त आसा. कांय राज्यांनी पत्रकार निधीच न्हय आनीकय येवजण्यो आसात. एसजेएफआयचे केरळ बसकेंतल्यान सगल्या राज्यांक जाग येवंक लागल्या. गोंय कूसभर फुडें गेलां मुख्यमंत्र्यांच्या बळग्यार.
गोंयांत एसजेएफआयचे बसकेक ते पावलेना पूण तेंको आशिल्लो. तांची, गोंय सरकाराची खूब तोखणाय बसकेंत जाली. देशांतल्या सगल्या वरिश्ठ पत्रकारांक तांकां मेळपाचें आशिल्लें. तांची “भिवपाची गरज ना” ही उतरां देसाचीं जाल्यांत. आतां ते चड शिटूक जाल्यात, हेरांचे मार्गदर्शी जातात हें वरिश्ठांक म्हज्या लेखांतल्यान कळ्ळां. थरथरपी हातांक बळगें कोण दितलो? अशें आमकां दिशिल्लें, तरीय संपर्क केल्लो. बसका लागीं पावतना हजार हात मजत दिवपाक मुखार आयले, व्हड कंपन्योय. मुख्यमंत्र्यांच्या आधाराचेर आमी फुडें वतात, फुडारांत तुमचो तेंको जाय अशें तांकां सांगचें पडलें.
58 ते 79 पिरायेचे वरिश्ठ पत्रकार गोंयांतले बसकेक आयिल्ले. एसजेएफआय चे विचारवंतांचे स्मरणीकेंत म्हजो लेख आसपावला. बी प्रुडंट अशें लेखांत सांगतना, दसकांत गोंयचे पत्रकारितेंत कितें घडलें ती म्हायती दिल्या.
देशभरांतल्या पत्रकारांक गोंयचे बसकेन आवाज मेळ्ळो ही खोस आमकां आसा. राज्यपाल अशोक पुसापती राजू हांचेमेरेन पत्रकारांचें एक शिश्टमंडळ पावलें. एसजेएफआयचो आवाज, पत्रकारांच्यो मागण्यो तांचे मेरेन पावोवपाचे लागणुकेक आमी पाळो दिला. तेच लागणुकेंतल्यान तेलंगण पत्रकारांच्या शिश्टमंडळावांगडा हांवय गेलें. गोंयचे पत्रकार कल्याण येवजणेची म्हायती दिली, व्यक्तींत्वां शिमे पलतडीं पुस्तक दिलें. ताणीय पत्रकारांचो आवाज प्रधानमंत्र्या मेरेन पावोवपाचें उतर दिलां.
कशी जातली आशिल्ली एसजेएफआयची बसका गोंयांत मुख्यमंत्र्यांच्या तेंक्या विणें? एसजेएफआयची पयली कार्यकारीणी, राश्ट्रीय मंडळ बसका गोंयांत जावपाफाटल्यान इतिहास आसा. सावळबाबान तो बसकेंत सांगलो. बसकेंत कार्यकारीणीच्या वावराची दिका ठरल्या. म्हासंघाच्या वांगड्यां खातीर म्हयन्या भितर ज्येश्ठ वांगडी शास्त्री रामचंदरन हाणी सोशल मिडीया धोरण केलां. तेखातीर वॉटस अॅप ग्रुपांतल्यान मांडिल्ले विचार धोरणात आसपावल्यात. धोरण देसापासत उपेगी जावंक येता. बसकेंत अचकित अध्यक्षपद सांबाळपाचो वगत येता तेन्ना माची सोडपाची नासता, कमीच उतरां उलोवन जागोवप, वॉचडॉग कशें जावप हें म्हाका बसकेंतल्यान होलमलें. बसका सोंपतना एसजेएफआय झिंदाबादच्यो घोशणा जाल्यो.
वगत झुजाचो, फुडें कशें वचप हो प्रस्न आसलो तरी एकवटाचो मार्ग आमकां दिसला, ल्हानाक म्हान जावपाची संद आसा. म्हासंघाचे अध्यक्ष संदिप दिक्षीत, आंतरराश्ट्रीय पावंड्याचे ज्येश्ठ पत्रकार गौरीदासन नायर, महाराश्ट्रांत आपत्ती वेवस्थापनाच्यो कार्यशाळा घेवपी जयपाल पाटील, बसका चलतना खबर देसभरांत दोन तीन वाक्यांनी चार भासांनी धाडपी उत्तराखंडांतलें पत्रकार प्रदिप फुटेला हांचो आवाज बसकेंत केरळ, कर्नाटक,
तामीळनाडून आयकलो. जम्मूच्या अश्वीनीकुमारांची संजीवनी मेळ्ळी.
ते गोंयांत पत्रकार, नगरसेवक शमी प्रभु साळकार हांचे बराबरीन काम करताले. कितलो आनंद जाल्लो तांकां गोंयांत येवपाचो, तेंच उत्तराखंड आनी दिल्लीच्या जॉर्ज कालीयाविल, संदिपाचेंय. साबा नायकनवरी पत्रकार बसकेक मुद्दम आयिल्ले.
केरळांत संदीप अध्यक्ष जाले तेन्ना ते काँग्रेसीचेच अशी खबर दिसाळ्यांत छापून आयली. सावळबाबांकय ते शिलामामीचे पूत अशें दिसतालें. तांकाय थाकाय आयल्या भौमाध्यमी पत्रकारीतेंतल्यान. ते दुसऱ्यांक संद दिवपी, गौरीदासनय तांचेच वाटेन वतात, आमचीय वाट तीच, दुसऱ्यांक आवाज दिवपाची. मुख्यमंत्री डॉ. सावंत हांचेवरी. कोविडा वेळार तांणी आमकां शिकयलें, तेय अजून शिकतात, ज्येश्ठ, युवांचो ते आवाज.
बसकेक प्रसिद्ध स्तंभलेखक, पत्रकार सीमा मुस्ताफा खासा आयिल्ल्यो. समाजिक सुरक्षतेच्यो येवजण्यो पत्रकारांक कित्याक जाय? पत्रकारीता खंयचे वाटेन वता हें तांचे उलोवपी आमकांय जागोवपी. केंद्रीय मंत्री श्रीपादबाब नायक पत्रकार पॅन्शन विशयांत लक्ष घालतले अशी आस्त आसा. बसका जैतवंत करपांत म्हायती खात्याचो व्हड वांटो.

सुहासिनी प्रभुगांवकार