विधानसभा सोंपचे पयलीं मनीस- रानजीव संघर्श धोरणाची घोशणाः रानां मंत्री

भांगरभूंय | प्रतिनिधी

पणजीः मनीस- रानजीव संघर्श धोरण हें विधानसभा अधिवेशन सोंपचे पयलीं चालीक लायतले. ही यंत्रणा कशी चलता तें पळोवपा खातीर शेजारच्या राज्यांतल्यान आराखडो मागोवन मुख्यमंत्री डॉ प्रमोद सावंत हांचे वांगडा चर्चा केले उपरांत हें धोरण अंमलांत येतलें अशी म्हायती रानां मंत्री विश्वजीत राणे हांणी दिली.

दिवचलचे आमदार चंद्रकांत शेटये हांणी लोकवस्तींत खेत्यांनी घाल्ल्या उपद्रवा विशीं मांडिल्ले समस्येक मंत्री राणे जाप दिताले.

खेतीं लोकवस्तींत येवन आंबे, सुपारी, केळी हांचो विध्वंस करतात अश्यो कितल्योश्योच कागाळी येत आसात. हीं खेतीं कोणाक भियेनात तीं घरां भितर लेगीत घुसतात. रानां खात्यान अभ्यास करून जाप दिल्या पूण प्रत्यक्षांत काम कांयच ना. हे विशीं रानां खातें कसलीं पावलां उबारतले असो प्रस्न शेटये हांणी विचारलो.

राज्या कडेन मनीस- रानजीव संघर्श धोरण ना. कर्नाटक आनी केरळ सारकिल्ल्या राज्यांनी हें धोरण चालीक लायलां. हे खातीर सरकारान अर्थसंकल्पीय तरतूद केल्या काय कितें असो प्रस्न विरोधी पक्ष फुडारी युरी आलेमांव हांणी विचारलो.

रानां खातें आनी शेतकी खातें हांच्या समन्वयांत उणाव आसा. माकडांची संख्या आनी तांच्या पंगडा विशीं गोंय रानजीव मंडळा कडेन कसलोच अभ्यास ना. केरळ आनी कर्नाटकान हे विशीं कायदो तयार केला. ह्या राज्यां भशेन गोंय सरकार संघर्श वेवस्थापन धोरण हाडटलो काय कितें असो प्रस्न प्रश्न आलेमांव हांणी केलो.

प्रधान मुखेल रानां संरक्षकाक रान वाठारांत उदकाचे स्रोत तयार करपाक तशेंच फळांची झाडां लावपाचे निर्देश दिल्यात. सद्या 5 ते 6 लाख झाडां लायल्यांत. सद्या आमकां सर्व समावेक्षक आराखडो अस्तिवांत हाडपाक जाय आनी हो आराखडो वेळा भितर चालीक लावपाचे निर्देश प्रधान मुखेल रानां संरक्षकांक दिल्ल्याचें मंत्री राणे हांणी सांगलें.

रानवटी जनावरांची समस्या फक्त एका मतदारसंघा पुरती मर्यादीत ना. देखून मनीस- रानजीव संघर्श धोरण हाडपाक आमची कसलीच हरकत ना. हे विशीं मुख्यमंत्र्या कडेन चर्चा करून निर्णय घेतले. सद्या 3.5 कोटी आमचे कडेन कॅम्प निधी भितर आसात. हेर राज्यांचो अभ्यास करून वेवस्थीत आराखडो तयार करपाचे निर्देश रोखडेच मुखेल रानां संरक्षकांक दितले. विधानसभा सोंपचे पयलीं ह्या धोरणाची घोशणा जातली अशी म्हायती राणे हांणी दिली.