भांगरभूंय | प्रतिनिधी
पणजीः फाल्यां 11 मार्चाक पणजी नगरपालिकेची वेंचणूक जातली, हे फाटभुंयेर उमेदवारांच्या शिक्षणाची आनी वेवसायाची म्हायती घेतली तेन्ना 69 उमेदवारांतले 57.97 टक्के (40) उमेदवार उच्च शिक्षीत आसात. जाल्यार 50.72 टक्के (35) उमेदवार वेवसायीक आसात. जाल्यार एक उमेदवार बेकार आसा. हाचे भायर सगळ्यांत जाण्ट्या उमेदवाराची पिराय 73 वर्सां आनी धाकल्या उमेदवाराची पिराय 24 वर्सां अशें उक्तें जालां.
पणजी पालिका म्हामंडळाच्या 30 वाड्यां खातीर 11 मार्चाक मतदान जातलें. ते उपरांत 13 मार्चाक मतांची मेजणी जातली. भाजपाच्या आदारान बाबूश मोंसेरात पॅनल आनी उत्पल पर्रीकार हांच्या फुडारपणा खाला ‘आमी पणजेकर’ पॅनल हांचे मदीं थेट लडत जातली. हातूंत 69 उमेदवार वेंचणूक रिंगणांत आसात.
वेंचणुके खातीर उबे रावपी उमेदवारांनी प्रतिज्ञापत्र सादर करप आनी शिक्षण, गुन्यांव, वेवसाय, मालमत्ता आनी हेर म्हायती विशीं म्हायती दिवप सक्तीचें आसा. ते प्रमाण सगल्या 69 उमेदवारांनी प्रतिज्ञापत्रा वरवीं शिक्षणीक म्हायती सादर केल्या. प्रतिज्ञापत्रांत उमेदवारांनी दिल्ले म्हायती प्रमाण एका उमेदवारान युनायटेड किंगडम ह्या देशांतल्यान उच्च शिक्षण घेतलां हें उजवाडाक आयलां. हेर लोकांनी गोंय, महाराष्ट्र, कर्नाटक हांगा शिक्षण घेतलां. उमेदवारांनी धावी, बारावी, तशेंच नियमीत कला, वेवसायीक, विज्ञान, वाणिज्य, कायद्याची पदवी, वेगवेगळ्या विशयांत डॉक्टरेट, चार्टर्ड अकावंटंट, तशेंच कॉम्प्युटर सायन्सांत मास्टर्स ऑफ टेक्नॉलॉजी, इलेक्ट्रिकल इंजिनीअरिंगांत मास्टर ऑफ सायन्स तशेंच हेर विद्युत अभियांत्रिकी आनी अभियांत्रिकी हातूंत हेर विशयांत पदवी मेळयल्या अशें उक्तें जालां.
वॉर्ड नंबर 1 ची युतिका जांबावलीकार आनी वॉर्ड नंबर 3 च्या जॉन पो हे सगळ्यांत तरणाटे उमेदवार आसात. ताची पिराय 24 वर्सां आसा. 9 व्या वॉर्डांतलो सगळ्यांत जाण्टो उमेदवार सुरेंद्र फुर्तादो आसा. हाचे भायर 69 उमेदवारांतले 12 ज्येश्ठ नागरीक आसात.
पणजी नगरपालिकेचे वेंचणुकेंत रिंगणांत आशिल्ल्या 69 उमेदवारांतले 57.97 टक्के (40) उमेदवार उंच्च शिक्षित आसात. तातूंतल्या 4 जाणांनी णवी पर परस उणें शिक्षण घेतला. 24 उमेदवारांनी 10 वी ते 12 वी मेरेन आनी आयटीआय मेरेन अभ्यासक्रम पुराय केल्यात. 28 उमेदवारांनी कला, विज्ञान, वाणिज्य, कायदो, वैजकी आनी हेर वेगवेगळ्या विशयांत पदवी मेळयल्या. जाल्यार 12 उमेदवारांनी अभियांत्रिकी आनी हेर नियमीत विशयांत पदव्युत्तर शिक्षण मेळयलां.
उमेदवारांनी दिल्ले म्हायती प्रमाण एक उमेदवार बेरोजगार आनी 35 वेवसायीक आसात. पांच उमेदवार खाजगी नोकऱ्यांनी काम करतात. दोन विद्यार्थी आसात. आठ उमेदवार वकील आनी दोन सल्लागार, दोन शिक्षक, एक दोतोर, आठ गृहीणी, दोन तारवटी आनी तीन उमेदवार निवृत्त कर्मचारी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
