भांगरभूंय | प्रतिनिधी
पणजीः राज्य सरकार सामुहीक शेती खातीर यत्न करता. हाचो एक भाग म्हूण सामुहीक शेती खातीर अनुदान येवजण सुरू करतले. हातूंत 90 टक्के निधी सरकार दितलें. जाल्यार 10 टक्के निधी लावार्थ्यांक दिवचो पडटलो. हे खातीर इत्सूक आमदारांनी आपल्या मतदारसंघांतल्यान प्रस्ताव कृशी खात्याक धाडचे अशी म्हायती मुख्यमंत्री डॉ. प्रमोद सावंत हांणी दिली. सोमारा विधानसभा अधिवेशनांत आमदार डॉ. देविया राणे हांणी केल्ले लक्षवेधी सुचोवणेचेर ते उलयताले.
सुरवेक ही येवजण पायलट तत्वाचेर चालीक लायतले अशें मुख्यमंत्र्यान सांगलें. हाचे उपरांत ताचो नियाळ घेतले उपरांत फुडलो निर्णय घेतले. ते खातीर उण्यांत उणें 2 लाख चौखण मिटर शेतवडीची गरज आसा. येवजणेची अंमलबजावणी करपा खातीर विभागीय कृशी अधिकाऱ्यांची नेमणूक जातली. शेतकारांक आल्वारा जमनीच्या कॉलतांत तांचीं नांवां आसल्यार राज्य सरकारान शेतकी कार्डां दिवपाक सुरवात केल्या.
रान खात्या कडल्यान भाड्यान जमीन घेतिल्ल्या शेतकारांक शेतकी कार्डांचो फायदो मेळोवपा खातीर विचारांत घेतले.
हाचे आदीं देविया राणे हांणी आपल्या नांवान शेतकी जमीन नाशिल्ल्या ल्हान शेतकारांक शेतकी कार्ड दिवपाची मागणी केल्या. शेतकी कार्डांचो उणाव आशिल्ल्यान अशा शेतकारांक वेगवेगळ्या येवजण्यांचो फायदो घेवंक मेळना आनी तांकां वणत घालपाक अनुदान मेळना अशें तांणी सांगलें. आमदार विरेश बोरकार हांणी कृशी खात्या खातीर अर्थसंकल्पीय तजवीज वाडोवपाची मागणी केल्या. गरजेच्यो कागदपत्रां नाशिल्ल्या शेतकारांकय येवजण्यो दिवच्यो अशी मागणी प्रेमेंद्र शेट हांणी केल्या. शेतकी क्षेत्राची उदरगत करपाक सरकाराक अपेस आयिल्ल्याचो आरोप विरोधी फुडारी युरी आलेमांव हांणी केलाे.
सभाघर समिती स्थापन करा
राज्यांतल्या शेतकी क्षेत्राची उदरगत करपा खातीर सभाघर समिती स्थापन करची अशें आमदार मायकल लोबो हांणी सांगलें. समिती ह्या क्षेत्राचो खोलायेन अभ्यास करतली आनी गरजेचें उपाय करतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
