भांगरभूंय | प्रतिनिधी
पणजीः पुर्तुगेज पासपोर्ट धारकांक दोट्टी नागरीकत्व प्रदान करचे. गोंयात बेरोजगारी चड आशिल्ले कारणान तांचे कडेन पुर्तुगेज पासपोर्ट घेवन गोंया भायर वचपाक दुसरो पर्याय ना. पुण तांची मुळा गोंयाक जोडून आसात देखून गोंय सरकारान हे विशींची फाटपुरवण केंद्र सरकारा कडे करची, अशी मागणी फातोड्डेंचे आमदार विजय सरदेसाय हांणी केल्या.
सभाघरांत शुन्य वरा वेळार सरदेसाय हांणी दोट्टी नागरीकत्वाचो विशय काडिल्लो. गोंय मुक्ती पयली पुर्तुगेज राजवटीक एक वेगळो इतिहास आसा आनी हे फाटभूंयेर गोंया खातीर दोट्टी नागरीकत्व फावो जाला, अशें सरदेसाय हांणी म्हणलें.
एतिहासीक परिस्थितीक लागून जे गोंयकारांनी दोट्टी नागरीकत्व घेतले. तांची फामिली आनी सांस्कृतीक नाते गोंया बरोबर आसा. देखून तांचे नाते भारता वांगडा तिगोवन दवरपा खातीर एक योग्य कायदेशीर आराखडो आसपांक जाय. युरीपीयन युनियनाचो मुखेली अभिमानान आपले ओसीआय कार्ड दाखयता आनी प्रधानमंत्री नरेंद्र मोदी ताळ्यो मारता देखून दोट्टी नागरिकत्व गोंया खातीर खाशेले कित्याक आसा ते दिसून येता, अशें सरदेसाय हांणी सांगलें.
पुर्तुगेज पासपोर्टा वरवीं तांकां 27 देशांनी प्रवेश मेळटा. सरकारान जारी केल्ले आंकडेवारी प्रमाण फाटल्या पांच वर्सात 8425 गोंयकार देश सोडून गेल्यात. गोंयात बेरोजगारीत दुसरे सुवातेर आशिल्ले कारणान तांकां आनीक दुसरो पर्याय ना. ते गोंय सोडून गेल्यात आसत खरें. पुण ते जोडिल्लो पयसो सगले गोंयांत धाडटात. तांची निश्ठा ही गोंया वांगडा आसा देखून तांकां दोट्टी नागरीकत्व मंजूर करचे, अशी मागणी सरदेसाय हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
