टॅक्सीकारांनी भिवपाची गरज नाः मुख्यमंत्री

भांगरभूंय | प्रतिनिधी

– डीजीटल टॅक्सी धोरणा उपरांत एग्रीगेटर्स मसुदो रद्द

– गोवा मायल्स, गोवा टॅक्सी एप उरतलेच …

– येरादारी मंत्री टॅक्सी एपाचेर ठाम, टॅक्सी भाड्याचे दर जातले डिजीटायज

पणजीः टॅक्सी विशया वेल्यान सभाघराचें वातावरण सोमारा बरेंच तापलें. गोवा टॅक्सी एग्रीगेटर्स गायडलायन्स मसुद्याक 90 टक्के टॅक्सीकारांनी विरोध केल्ल्यान हो मसुदो रद्द करपाची मागणी विरोधी पक्ष फुडारी युरी आलेमांव हांणी लावन धरली. डीजीटल टॅक्सी धोरण अस्तित्वांत आयले उपरांत गोवा टॅक्सी एग्रीगेटर्स गायडलायन्स मसुदो रद्द करतले, अशें आस्वासन मुख्यमंत्री डॉ. प्रमोद सावंत हांणी दिलें.

मजगती, गोंया खातीर टॅक्सी एप जाय हाचेर सरकार ठाम आसा. राज्यात गोवा मायल्स आनी गोवा टॅक्सी एप हे उरतलेच. ते भायर टॅक्सी भाड्यांत समानताय हाडपा खातीर थळाव्या टॅक्सीकारांक डिजीटल माचयेर हाडटले, अशें येरादीर मंत्री मावीन गुदीन्हो हांणी सांगले.

थळावे टॅक्सीकार आनी अॅप आधारीत टॅक्सीं खातीर सराकारान वेगवेगळ्यो यंत्रणां राबयल्यांत. थळाव्या टॅक्सीकारां खातीर मिटर सक्तीचे केल्यात. मात अॅप आदारीत टॅक्सीं खातीर मिटर सक्तीचें ना. अॅप टॅक्सी एग्रिगेटर्स हो वेवसाय नियंत्रीत करता काय कितें असो प्रस्न, आलेमांव हांणी विचारलो.

जेन्ना गोवा टॅक्सी एग्रिगेटर्स गायडलायन्स मसुद्या खातीर सरकारान आक्षेप आनी सुचोवण्यो आपयल्यो तेन्ना 3802 टॅक्सीकारांनी विरोध नोंद करीत फकत 290 जाणांनी ताचें समर्थन केलें. 93 टक्के टॅक्सीकारांनी ह्या ऍप एग्रिगेटर्साक विरोध करापाचें थारायलां. मात आठ म्हयने जाले अजूनय हो मसुदो रद्द करपा विशीं कांयच हालचाल ना. 9 म्हयने जातकच सरकार बाल्तिमाची वाट पळयता काय कितें, असो युक्तिवाद आलेमांव हांणी केलो.

फाटल्या सप्तकांत जाल्ले टॅक्सीकारांचे बसकेंत आमी टॅक्सी धनयांक स्पश्ट सांगलें, गोवा मायल्स आनी गोवा टॅक्सी अॅप हे दोनच अॅप उरतले. तशेंच टॅक्सीचें भाडें दर आसा तें समान लागू जावन डिजीटल जातलें, अशी जाप येरादारी मंत्री मावीन गुदीन्हो हांणी दिली.

हे बसकेंत चडशे टॅक्सी संघटणेच्या वांगड्यांनी ह्या निर्णयाक तेंको जाहीर केलो. मात एक चार-पांच लोकांचो गट आसलो तांणी हे विशीं कोफुसांव तयार करून भर बसकेंत दुसर्‍या गटाचेर ते हल्लो करपाक गेले. सुमार मार-बडय जावपाची स्थिती हे बसकेंत जाल्ली. देखून तीन येरादारी सहाय्यक संचालकांच्या फुडारपणा खाला 36 टॅक्सी संघटणेच्या प्रतिनिधींची आमी समिती तयार केल्या आनी हे समिती वरवीं जे विशय आसात ते आठ दिसां भितर सुटावे जातले, अशी म्हायती गुदिन्हो हांणी दिली.

गोवा मायल्साचेर भाडें 20 टक्के उणें आसा. अॅपाचे सुरवातेक वर्स 2018-19 त 2 हजार टॅक्सीकारांनी 39.9 लाख इतली जीएसटी भरल्या. जाल्यार अंदूं 2025-26 वर्सा टॅक्सीकारांनी 4.5 कोटी जीएसटी भरून तांची वट्ट येणावळ 28.39 कोटी इतली आसा. राज्यांतले 15 टक्के थळावी जनता ही गोवा मायल्साचो वापर करता. तशेंच 2 हजार टॅक्सीकारांची येणावळ पांच लाखां वयर गेल्या आनी ते कर भरतात. टॅक्सीकारांक आपली येणावळ लिपोवपाची आसा म्हण ते अॅपीचेर येनात, असो थोमणो मावीन हांणी मारलो.

फाटल्या सप्तकांत जाल्ले बसकेंत सत्ताधारी आमदार सोडल्यार विरोधी पक्षाच्या आमदारांक कित्याक बसकेंत आपोवंकना असो प्रस्न विरोधी पक्ष फुडारी युरी आलेमांव हांणी करत बोवाळ घातलो. ही फकत डिजीटल टॅक्सी धोरणा विशीं टॅक्सी धनयांचें आयकून घेवपा खातीरची बसका आपयल्ली. एकदां हें धोरण तयार जाले काय सगळ्या विरोधी आमदारांक बसके खातीर आपयतले, अशें आस्वासन मुख्यमंत्री डॉ. सावंत हांणी सांगलें.