भांगरभूंय | प्रतिनिधी
जो मेरेन पावस पडटा, तो मेरेन उदकाची कसलीच भिरांत ना. हे तज्ञ, जाणकार ओगीच भंय घालतात, असो एक समज लोकां मदीं पयलीं सावन पातळ्ळा. नुस्त्यां विशींय लोक अशेंच उलयताले. आतां नुस्त्याच्या बाजारांत गेल्यार नुस्त्याचो नेमको कितलो दुकळ पडला तें दिसता. उदकाचेंय तशेंच जावचें न्हय. तज्ञांचो अभ्यास आसता, ताचे वयल्यान ते अदमास उक्तायतात. बरेच फावटीं तो खरो थारला. आयज सगलेच नळाच्या उदकाचेर अवलंबून आसात. गोंयां सारक्या ल्हान राज्यांनी तर घराघरांनी नळ. 24 वरां उदका पुरवण जायना आसली तरी दिसांतल्यान वरभर तरी सगल्यांक उदक मेळटा. अदींमदीं उदक नासता, हीय गजाल खरी. तेन्ना लोक बेजारतात, कारण बांयचें, न्हंयेचें उदक हाडपाच्या कश्टांची संवकळ तांकां ना. नवे पिळगेक तर नाच्च. भोंवतेकांनी बांय खणून पंप बसयल्यात.
मात, ह्या नळाच्या मोनेळान आमी भौशीक बांयो पुरयल्यात, तळ्यां कडेन आडनदर केल्या, व्हाळ, न्हंयो बुरश्यो केल्यात. उदकाची टांकी बसयिल्ल्यांचो आडवाद सोडल्यार आमकां उदका खातीर, खास करून पिवपाच्या उदका खातीर सरकारी नळांकूच शरण वच्चें पडटा. उदक कितलेंय मेळूं, ताचो योग्य वापर, सांबाळ जावंक जाय. जाल्यारुच तें तिगतलें आनी फुडल्या पिळग्यांक जगयतलें.
फुडल्या वर्स- देड वर्सांत सरकारान राज्यांतल्या 150 तळयांक, हेर उदका स्रोतांक परत जिवे करपाचें थारायलां. ह्या कामाचो समाजाक फायदो जातलो, हे नदरेन सरकारी यंत्रणांनी पावलां उडोवचीं. खास तज्ञ हाडपाची वा तें काम आवटसोर्स करपाची गरज ना. अंत्रुज आनी हेर म्हालांतूच उदक वाटावपाक, तळीं, व्हाळ नितळ करपाक कांय संस्था वावुरतात, तांची मजत जांव येता. गांवांतल्या न्हंयांचेर लोकांचे चडशे वेव्हार चलताले. फाटल्या 25-30 वर्सांनी घरांत आयतें उदक पाविल्ल्यान न्हंयांचेर, भौशीक बांयचेर कपडे उमळूंक, न्हांवपाक, गाडयो धुंवपाक वचप लागींलागीं बंद जालां. गांवांनी अजून वतात. तेन्ना सरकार तळयो, व्हाळांचें पुनरुज्जीवन करता, ताचो फायदो समाजाक जावंक जाय, हें मतींत दवरचें पडटलें. कारण हें काम सरकारी पयशांनी जातलें. 50 कोटी खर्च केले आनी ताचो फायदो कोणूच घेना, जाल्यार पयसो, मेहनत उदकांत वतली.
कांय वर्सां पयलीं ट्यूब वेल खणून तिचें उदक
नळ, पायपां वरवीं गांवांतल्या कांय वाड्यांक दिसांतल्यान 2- 3 वरां दिवपाचो यशस्वी प्रयोग बार्देश तालुक्यांत जाल्लो. 150 उदकां स्रोतांचें पुनरुज्जीवन करतकच उदकाचो घरांक, कुळागरांक, शेतांक जातलो, हाचेर सरकाराक भर दिवचो पडटलो.
दुसरें, पावसाचें उदक. घरा कुशीक वा पोंदा टांकी बांदून तें साठोवन पोरसूं, घरांत वापरूं येता. कांय उदका मोगींनी हो उपक्रम चालीक लायला. मात राज्यांतल्या दरेका वाड्यार, काॅलनींत चडांत चड लोक सैमाचें हें देणें सांबाळटले, वापरतले हाचेर सरकारी यंत्रणांनी लक्ष दवरूंक फावो. सरकाराची रेन वाॅटर हार्वेस्ट येवजण आसा. सुरवेक सगल्या शाळा, शिक्षण संस्थांनी, उद्देगीक, घर वसणुकांनी, धर्मिक थळांनी ती चालीक लावंक जाय. हें जायत जाल्यार राज्यांतल्या उदका प्रकल्पां वयलो ताण बरोच उणो जातलो. दोंगरांचेर आडवे चर मारून उदक आडायतात, उदक जिरयतात. हे येवजणेक लागून जमनींत तें वर्सुयभर सांठून उरता. बांयो, न्हंयो आटपाचे प्रकार जायनात. आमचे कडेन हो प्रयोग जाल्लो. पूण तो मुखार गेलो ना.
गोंयांत दर्याचें खारें उदक घुसून साव्या उदकाचे स्रोत इबाडपाक लागल्यात. शेत रोंवपाचो आंकडो देंवत आसा. मानशी आनीक हात -पांय पातळच्यो नात, हें सरकारी यंत्रणांक पळोवचें पडटलें. राज्यांतल्यो कांय न्हंयो बुरश्यो जाल्यात, ताचे फाटलीं कारणां सोदचीं पडटलीं. सांतिनेझ खारजाची एक देख पुरो. म्हादयचेरुय एक दोळो दवरचो पडटलो. कारण न्यायालयाचे आदेश आयिल्ले आसतना धरणां, बांदाचीं कामां चल्ल्यांत. कर्नाटकान अमूकच एमएलडी उदक घेतलें अशें म्हणलां खरें, पूण हालीं कोणाचेर विस्वास दवरूं नज. सांगलें एक, केलें भलतेंच अशें जाल्यार ताचे थेट परिणाम गोंयकारांचेर, गोंयचे अर्थवेवस्थेचेर जातले. उदक वांटावप, तें सांबाळून वापर हें सरकाराचें काम…. आनी सरकार म्हणजे आमी सगले नागरिक. खबर आसा न्हय?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
