भांगरभूंय | प्रतिनिधी
मामलेदार राहुल देसाय, रायसन रॉड्रिग्सा सयत हेरां आड गुन्यांव
म्हापशेंः जमीन बळकावप प्रकरणांत विशेश तपास पथकान (एसआयटी) अटक केल्ल्या रायसन रॉड्रिग्स हांणी हेरांच्या मजतीन आसगांव बार्देसांतलीं जमीन बनावट कागदां तयार करून वाळपय उपनिबंधक (सब रजिस्ट्रार) कार्यालया कडल्यान हस्तांतरीत केल्या. ह्या प्रकरणांत एसआयटीन रायसन आनी हेरां आड आनीक चार गुन्यांव दाखल केल्यात. एका गुन्यांवांत बार्देसाचे मामलेदार राहुल देसाय हांचोय दुबावितांत आस्पाव आसा.
शुक्रारा एसआयटीन रायसन रॉड्रिग्स हाका मुंबयंतल्यान अटक केल्ली. जाल्यार राजकुमार मैथी आनी सेड्रीग फर्नांडीस ह्या त्याच्या साथीदारांक म्हापश्यां अटक केल्ली. दुबावितां आड फाटल्या 19 ऑगस्ट दिसा एसआयटीन जमीन बळकावप प्रकरणांत गुन्यांव दाखल केल्यात.
नायकवाडो वेर्ला-पर्रा हांगाची फिर्यादी अंजू फेलिसीया डिसिल्वा हांच्या आसगांव बार्देसांतलीं सर्वे क्रमांक 37, 4 तल्या जमनीची बनावट कागदां तयार करून दुबावितांनी वाळपय उपनिबंधक कार्यालयांत सादर केली आनी ताचे वरवीं फिर्यादींच्या जमनीचो मालकी हक्क दुबावितांनी आपल्या नांवार हस्तांतरीत केलो. हो प्रकार ऑक्टोबर 2021 पयलीं घडलां. ह्या प्रकरणांत 13 जाणां आड गुन्यांव नोंद केला.
दुबावितां मदीं ब्रांका दिनीझ, रायसन रॉड्रिग्स, पावलिना ज्युलियाना दिनीझ, मारियाना आंतोनिओ तेलीस गोन्साल्वीस (सगले बामणवाडाे मार्ना शिवोली), विष्णू बाळकृष्ण काळे, हिना विष्णू काळे, गुरूदास गांवकार, जेराम सेबास्तीयन (सगले सोनाळ सत्तरी), विना बालगिरी गोस्वामी (मुंबय), रामा मातोंडकर (बादें आसगांव), लिएंड्रा संतोष तोरसेकार, रूपेश पट्टे (बादें), ब्रायन आल्वारीस हांचो आस्पाव आसा.
दुसरो गुन्यांव विल्मा डिसोझा (गौरावाडे- कळंगूट) हांच्या कागाळे प्रमाण नोंद जाला. फिर्यादींच्या आसगांवांतल्या सर्वे क्रमांक 47,1 तल्या जमनीचीं बनावट कागदां तयार करून मालकी हस्तांतरण म्हापशें सब रजिस्ट्रारांतल्यान जून 2022 पयलीं जाल्लें. ह्या प्रकरणांत ब्रांकां दिनीझ, रायझन रॉड्रिग्स, पावलिना दिनीझ, मारियानो तेलीस रॉड्रिग्स आनी हेरां आड गुन्यांव नोंद जाला.
तिसरो गुन्यांव आलितेरीओ अँथनी कार्व्हालो उर्फ आंतोनियो जोस कार्व्हालो (बादें आसगांव) हांचे कागाळे प्रमाण हो गुन्यांव नोंद जाला. आसगांवांतली सर्वे क्रमांक 44,2तलीं जमीन बळकावप प्रकरण जून 2022 पयलीं घडिल्लें. ह्या प्रकरणांत ब्रायन दिनीझ, रायसन रॉड्रिग्स, पालविना दिनीझ, मारियानो तेलीस रॉड्रिग्स रायसन आनी हेरां आड गुन्यांव नोंद जाला.
चवथो गुन्यांव मातिल्डा लिओपोल्डीना कुतिन्हो (अहमदाबाद) आनी आलितेरीओ अँथनी कार्व्हालो उर्फ आंतोनियो जोस कार्व्हालो (बादें आसगांव) हांचे कागाळे प्रमाण नोंद जाला. फिर्यादींच्या मालकीची बादें आसगांवांतली सर्वे क्रमांक 47, 1 ही जमीन बळकायल्या. दुबावितांनी वयल्या जमनींची बनावट कागदां तयार करून म्हापशें उपनिबंधक कार्यालया वरवीं जमनीचो मालकी हक्क हस्तांतरीत केलो.
हो प्रकार जून 2022 पयलीं घडिल्लो. ह्या प्रकरणांत ब्रान्का दिनीझ, रायसन रॉड्रिग्स, तशेंच बार्देसचे मामलेदार राहुल देसाय आनी हेरां आड गुन्यांव नोंद जाला.
दुबावितांची जामिना खातीर न्यायालयांत धांव
एसआयटीन शुक्रारा अटक केल्लो दुबावीत रायसन रॉड्रिग्स, राजकुमार मैथी आनी सेड्रीक फर्नांडीस हांणी जामिना खातीर न्यायालयांत धांव घेतल्या. ह्या जामीन अर्जाचेर सोमारा सुनावणी जातली. ह्या वेळार पुलीस आपले म्हणणें न्यायालया मुखार मांडटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
