भांगरभूंय | प्रतिनिधी
आंदोलनाचे फाटभुंयेर सामान्य लोकां मदीं चर्चा
पणजी : आमदार विरेश बोरकार आनी ग्रामस्थ आंदोलनाचो भाग म्हूण जेन्ना नगरनियोजन कार्यालयात रातभर राविल्ले तेन्ना सुरक्षा रक्षका सयत खात्याचो शिपाय आशिल्लो. हे भायर सीसीटीव्ही कॅमेऱ्यांची लेगीत नदर आशिल्ली. अशें आसून लेगीत ह्याच वेळार फायली गायब कशो जाल्यो? त्यो आंदोलकांनी काडल्यो जाल्यार सीसीटीव्ही कॅमेऱ्यात नोंद जावपाक जाय, अशा प्रकारच्यो चर्चा सामान्य लोकां मदीं सुरू आसा.
आमदार विरेश बोरकार आनी ग्रामस्थ कार्यालयात रातभर आशिल्ले तेन्नाच ह्यो फायली गायब जाल्या काय ताचे पयलीच जाल्या? नगरनियोजन खात्याच्या अधिकाऱ्यान मात कालांतरान कागाळ नोंद करपाची शक्यता काय जाण उक्तायतात. ही शक्यता आसली जाल्यार आंदोलना पयलीच कागाळ कित्याक करूंक ना? फायली आंदोलन करपी ग्रामस्थांनी काडल्यो जाल्यार शिपाय वा सुरक्षा रक्षक कितें करतालो? अशें तरेकवार शक्यतायेन चर्चा सुरू आसा.
फायली गायब जाल्ल्याची कागाळ बुधवारा नोंद जाले उपरांत पणजी पुलिसांनी बिरेस्तारा गुन्यांव नोंद केलो. आमदार विरेश बोरकार आनी ग्रामस्था आड गुन्यांव नोंद जाला. सुरक्षा रक्षक वा शिपाया आड गुन्यांव नोंद जावंक ना. गायब जाल्ले फायली विशीं हे दोगांरचेर दुबाव कित्याक आयलो ना? ह्या दोगांयची पुलीस चवकशी करतले काय? चवकशी वेळार सीसीटीव्ही फूटेजीची तपासणी जातली काय? अशें बरेच प्रस्न निर्माण जाल्या.
आमदार विरेश बोरकार हांचे फुडारपणा खाला पाळे – शिरदोनचे ग्रामस्थ शुक्रारा नगरनियोजन कार्यालयाचेर मोर्चा घेवन आयिल्ले. झोन बदलाचो प्रस्ताव रद्द करपाची तांची मागणी आशिल्ली. हे विशी ठोस आश्वासन मेळूंक नाशिल्ल्यान कार्यालयातूच रावपाचो निर्णय तांणी घेतलो. फाटल्या शुक्राराची रात कार्यालयात काडले उपरांत दुसरे दिसा शेनवारा आमदार विरेश बोरकार तशेंच ग्रामस्थांक पुलिसांनी भायर काडले. हाचे उपरांत आंदोलन आझाद मैदानाचेर पावले. हाचे उपरांत आंदोलनान वेगवेगळे मोडण घेतले. विरोधी पक्षांनी आंदोलकांक तेंको दिलो आनी आयतारा सकाळी सभा जाली. सोमारा अचकीत नगरनियोजन मंत्र्यांच्या घराचेर मोर्चा व्हेलो. आतां फायली गायब जाल्या विशीं गुन्यांव नोंद जाल्ल्यान आंदोलकां आड आतां कारवायेची प्रक्रिया सुरू जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
