भांगरभूंय | प्रतिनिधी
पणजी : 39 ए खाला अंतर्गत सांत आंद्रें मतदारसंघातलो प्रस्तावीत तशेंच अधिसुचीत झोन बदल स्थगीत दवरपाचें, ३९ ए कलम रद्द करपाचें, तशेंच विधानसभेंत चर्चा करपाचें ठोस उतर मेळ्ळ्या उपरांत सांत आंद्रेंचे आमदार विरेश बोरकार हांणी उपोषण फाटीं घेतलें. फाटल्या स दिसां सावन विरेश आनी ताचे समर्थक, 39 ए कलम रद्द करात म्हणपी लोक आझाद मैदानाचेर आशिल्लें. बिरेस्तारा रातीं उसरां विरेशान उपोशण फाटीं घेतलें.
सांत आंन्द्रें मतदारसंघांतले प्रस्तावीत झोन बदल निलंबीत करता अशें नगर नियोजन खात्यान बरयिल्ले पत्र जिल्लोधिकाऱ्यांनी बोरकार हांकां दिल्ले. हें पत्र अधिकृत आसा हे सिध्द जायना. तशेंच निलंबीत करता हाचो कसलोच अर्थ लागना, असो युक्तीवाद करून बोरकार हांणी आपले उपोशण चालूच दवरिल्लें. निमाणें मुख्यमंत्री डॉ. प्रमोद सावंत हांणी उतर दिल्या उपरांत तांणी उपोषण सोडलें.
जिल्होधिकाऱ्यांचें अधिकृत पत्र मेळ्ळ्या उपरांत अॅड. नॉर्मा आल्वारीस हांचे कडल्यान कायदेशीर सल्लो घेवन आंदोकांक तें विशीं सांगून निर्णय जाहीर केलो. 39ए कलम रद्द करीना, मागण्यो मान्य जायना जाल्यार आंदोलन खर करपाची शिटकावणीय आमदार बोरकार हांणी दिली.
कलम 39 (अ) रद्द करप तशेंच धक्काबुक्की केल्ल्या पुलिसांक निलंबीत करपाची मागणी करपी विरेश बोरकार हांचें आंदोलन सेगीत सव्या दिसाचेर पावलें तेन्ना दीसभर वेगान घडामोडी जाल्यो. बोरकार हांची सद्या भलायकी सामकीच इबाडिल्ली. सेगीत 6 दीस कांय खावंक नाशिल्ल्यान ते अशक्त जाल्लें. पुराय दीस हातरुणाचेर पडून आशिल्लें. तांकां उलोवप लेगीत जायना जाल्लें.
बिरेस्तारा सांजे उत्तर गोंय जिल्लोधिकारी अंकीत यादव हांणी बोरकार हांची भेट घेतली आनी सांत आन्द्रें मतदारसंघांतले सगळे झोन बदलाचो प्रस्ताव बेगोबेग निलंबीत करता अशें मुखेल नगर नियोजकान बरयल्ले पत्र तांका भेटयले. पूण बोरकार हांणी हरकत घेवन निलंबीत करता हाचो अर्थ कितें? हे विशीं स्पश्टीकरण मागयले. पयली सांगिल्ले हे झोन बदलाचे प्रस्ताव स्थगीत करता म्हूण तेन्ना आमी ते मान्य करूंक ना. पूण ताचे बदला आतां निलंबीत शब्द वापरला. ह्या प्रस्तावाक परत मान्यताय मेळची ना हाची हमी कितें? असो प्रस्न बोरकार हांणी केलो. तशेंच सांत आन्द्रें मतदारसंघांत झोन बदलाची 9 प्रकरणा नोंद जाल्यात आनी त्या प्रकरणांचो उल्लेख ह्या पत्रांत कित्याक ना? असो प्रस्न करून हे पत्र खात्याच्या अधिकृत लेटर हेडार बरोवंक नाशिल्ले कारणान बोरकार हांणी हे पत्र मानून घेवंक ना. तशेंच बोरकार हांणी 39 (अ) खाला पुराय राज्यांत झोन बदलांच्या प्रकरणांचे कितें जातले? असो प्रस्न केलो. पूण हो विशय फकत विधानसभेत चर्चा करून तो सुटावो करपाक मेळटा अशी जाप जिल्होधिकाऱ्यान दिल्ली. जे प्रश्न बोरकार हांणी मांडल्यात ताचेर स्पश्टीकरण घेवन नवें पत्र जिल्होधिकारी बोरकार हांकां दितले म्हूण निमाणे उलोवप जाल्लें. ते मजगतीं, बोरकार हांणी आपले उपोशण सुरू दवरून आपले सहकाऱ्या वांगडा फुडली रणनीती थारावपा विशीं चर्चा सुरू केल्ली. ते उपरांत रातीं उसरां मेरेन वेगान घडामोडी जावन उपोशण फाटीं घेतलें.
आमदार बोरकार सयत
38 थळाव्यां आड गुन्यांव नोंद
नगर नियोजन खात्यांत घुसघोरी करून 10 फायली चोरिल्ल्याचो आरोप करून पणजी पुलिसांनी सांत आन्द्रेंचे आमदार विरेश बोरकार सयत पाळे-शिरदोनच्या 38 थळाव्या आड भारतीय न्याय संहीता कलम 392 (4) आनी 305 खाला गुन्यांव दाखल केला. ह्या आंदोलनाक रातच्या वेळार तेंको दिवपाक आयल्ले आरजीपीचे मुखेली मनोज परब तशेंच समाज वावुरपी स्वप्नेश शेर्लेकार हांचे आड लेगीत गुन्यांव नोंद जाला. पणजी पुलीस स्टेशनांत दाखल केल्ले कागाळीत नगर नियोजक विजय कुमार चंद्रा हांणी म्हणला, खात्याच्या कर्मचाऱ्यांनी सांगिल्ले प्रमाण आंदोलक कचेरीच्या दरेक विभागांनी भोंवत आसले. तांणी उबे आशिल्ले फॅन काडले आनी परवानगी घे नासतना ताचो वापर केलो. तशेंच आंदोलकांनी कर्मचाऱ्यांक एका जाग्यार आडावन तांका काम करपाक अाडखळी हाडल्यो. 21 फेब्रुवारीक पुलिसांनी आंदोलकांक भायर काडले उपरांत खात्याच्या कर्मचाऱ्यांनी कचेरीक लॉक केले. पूण 23 फेब्रुवारीक जेन्ना आमचें कर्मचारी सकाळी 9.00 वरांचेर परत कामाक रूजू जाले तेन्ना 10 फायली गायब जाल्ल्याचे तांच्या लक्षांत आयलें, अशें चंद्रा हांणी कागाळेंत बरयला.
कागाळेंत बरयिल्ले प्रमाण गोंय प्रादेशीक आराखडो 2021 विशींची पेडणें म्हाल, बार्देस, दिवचल आनी सत्तरी, तिसवाडी, मुरगांव, साश्ट, काणकोण, फोंडें, केपें, सांगें आनी धारबोंदाडें म्हालाची अंतर्गत फायल चोरयेक गेल्ल्याचे कळीत केला.
चोर सोडून…
आंदोलकांनी फॅन आनी गवेत चोरिल्ल्याचो आरोप केला. पूण आंदोलना वेळार सगळी सुरक्षा आसली, पुलीस आसले तशेंच सीसीटीव्ही कॅमेरा आसले. ते भायर दारा लेगीत बंद आसली. हाचो अर्थ जे सुरक्षा कर्मचारी हजर आसले तांणी आपले कर्तव्य सारके करूंक ना आनी आरोप थळाव्यांचेर घातला. ह्या आंदोलनांत 90 टक्के एसटी समुदाय आसा आनी हे आरोप म्हज्या लोकांचेर जाल्यात, अशें गाकुवेधचे अध्यक्ष गोविंद शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
