भांगरभूंय | प्रतिनिधी
पणजी : गोंयांत जमीन रूपांतरणाच्या प्रस्तावा वेल्यान आंदोलन सुरू आसतनाच फ्लोर एरीया रेशो (एफएआर) संबंदीचे वेव्हार बंद दवरपाचे निर्देश नगरनियोजन खात्यान दिल्या. हे विशींचे आदेश मुखेल नगरनियोजकांनी अधिकाऱ्यांक दिल्या. हाका लागून हे फुडें एफएआर विशीं परवाने दिवप वा शुल्क घेवपाचें वेव्हार बंद जातले.
प्लॉटाची जमीन आनी बांदकामाचे क्षेत्रफळ हाचे जे प्रमाण आसता ताका एफएआर म्हणटा. शारी वाठार आनी गांवगिऱ्या वाठारा खातीर प्रमाण वेगवेगळे आसा. तरेकवार शारा खातीर लेगीत वेगवेगळो एफएआर आसता. बांदकाम वेवसायिकां कडल्यान एफएआर प्रमाण वाडोवपाची मागणी जाता.
हे फांटभुयेर हो महत्वाचो निर्णय सरकारान घेतला. मंगळारा राती नगरनियोजन मंत्री विश्वजीत राणे आनी मुख्यमंत्री डॉ. प्रमोद सावंंत हांचे मदी बसका जाली. हे बसकेक मुखेल नगरनियोजक हाजीर आशिल्ले. कलम 16 बी खाला दिल्ले प्रस्तावा सयत एफएएआर विशीं निर्णय जालो. हाचे उपरांत दुसरेच दिसा मुखेल नगरनियोजकानी अधिकाऱ्यांक निर्देश दिले.
एफएआर खातीर परवान्याचे बरेच अर्ज कार्यालयांनी आयल्या. ह्या अर्जांक नव्यान परवानगी दिवची न्हय. काय जाणांनी एफएआरचें शुल्क फारीक करूंक ना. हे शुल्क वसूल करप वा शुल्क भरपाची प्रक्रिया लेगीत बंद दवरपाचे निर्देश आसा. हाका लागून एफएआर संंबंदीचे सगळे वेव्हार फुडले आदेशा मेरेन बंद उरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
