भांगरभूंय | प्रतिनिधी
पणजीः गोंयांत वट्ट मरणां मदली सुमार 17 टक्के मरणां ही काळाजाच्या आताकाक लागून येतात. हे राज्यांतल्या मरणां फाटल्यान सगल्यांत व्हडलें कारण थारला. फाटल्या 10 वर्साच्या काळांत तरणाट्यां मदीं काळाजाच्या आताकाचें प्रमाण वाडलां, अशें गोंय वैजकी म्हाविद्यालयाचे पॅथॉलोजी विभागाचे आदले मुखेली तशेंच युरोपीयन सायोटोलॉजी काँग्रेसचे वांगडी डॉ. रॉक वायझमेन पिंटो हांणी सांगलें.
क्लूब टेनीस दे गास्पर डियासच्या शंबराच्या वर्सा निमतान घडोवन हाडिल्ले लायव्ह्स जर्नी- द लोंग हॉल ह्या संवादात्मक परिशदेत उलयताले.
‘वैजकी नोंद विभागात कार्यरत आसतना हावेन पोस्टमार्टेम अहवाल, पॅथॉलॉजी निष्कर्श आनी मरण प्रमाणपत्रांचो खोलायेन अभ्यास केलो. ह्या विश्लेषणांतल्यान गोंयात मरणाचें सामान्य कारण हे काळजाचो आताक हे स्पष्ट जाले. वट्ट मरणां मदले काळाजाचो आताक येवन मरपाचें प्रमाण हे 17 टक्के आसा, अशें डॉ. पिंटो हांणी सांगलें.
सिगार ओडप, सोरो पियेवप, घुंवळी वखदांचें सेवन करप तशेंच रगताचो उच्चदाब आनी गोडेमूत ह्या दिर्घ काळाच्या दुयेसांक लागून काळजाच्या आताकाचो धोको वाडटा. मायोकार्डियल इन्फार्क्शन, अरिदमिया आनी काळीज निकामी जावप ही सारकिल्ली दुयेंसां आतां तरणाट्यां मदीं वाडत आसात. पयली काळजाचो आताक हो चडशे 60 वर्सा पिराये वेल्या लोकांक येतलो. पूण फाटल्या धा वर्साच्या काळांत तरणाट्यां मदीं ताचें प्रमाण वाडला, अशी म्हायती पिंटो हांणी दिली.
भायल्यान जिवान घटमूट आनी निरोगी दिसपी व्यक्तीक स्टेरॉइड्स व हार्मोन्सच्या वापराक लागून भलायके खातीर गंभीर धोको तयार जावपाक शकता. देखून अश्या परिस्थितींत वेळार वैजकी तपासणी करप तशेंच नेमान भलायकेचेर पाळत दवरप गरजेचें आसा, असो सल्लो डॉ. पिंटो हांणी दिलो.
———————-
30 टक्के कांक्राच्या दुयेंसाचें प्रमाण सिगरेटीक लागूनः डॉ. पिंटो
कांक्राच्या दुयेंसाचें सुमार 30 टक्के संबंद सिगारेट ओडप तशेंच निश्क्रीय सिगारेट ओडपा फाटल्यान आसा. जिणेतल्यो कटकटी, प्रदुशण, सोरो पियेवप, संसर्ग आनी रसायनाक लागून धोकाे वाडटा. दिल्लींत वाडत वचपी वायू प्रदूशण तशेंच गोंयांत खणकाम आनी उद्देगीक कामां खातीर हो धोको वाडत अासा आनी हे खातीर भलायकी खातीर बरी अशी जिणशैली गरजेची आसा, अशें डॉ. पिंटो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
