भांगरभूंय | प्रतिनिधी
पुलीस म्हानिरिक्षक बिश्नोईः आनीक तीन दुबावितांक अटक
भांगरभूंय I प्रतिनिधी
पणजी : जमीन घोटाळो प्रकरणांत विशेश तपास पथकान (एसआयटी) आतां मेरेन अटक जाल्ल्यांनी जायत्या राजकारण्यांचीय नांवां उक्ताडार हाडल्यात. तांचीय चवकशी करून दोशी आसल्यार तांकांय अटक करतले. ते मेरेन आपूण तांची नांवां जाहीर करपाक शकना, अशें पुलीस म्हानिरिक्षक ओमवीर बिश्नोई हांणी शुक्रारा स्पश्ट केले.
राज्यांतल्या लाखांनी चौ. मि. जमनींतल्या 95 मालमत्तांची बनावट कागदां तयार करून जमनी बळकायिल्ल्या प्रकरणांतलो मुख्य दुबावीत रॉयसन रॉड्रिग्स हाका ‘एसआयटी’ न मुंबयंत अटक केल्या. जाल्यार ताचे दोन साथीदार राजकुमार मैथी आनी सेड्रीग फर्नांडीस हाका म्हापश्यां ताब्यांत घेवन अटक केल्या. हे विशीं सविस्तर म्हायती दिवपाक रायबंदरा घेतिल्ले पत्रकार परिशदेंत ते उलयताले.
‘एसआयटी’चे मुखेली निधीन वाल्सन आनी हेर वांगडी ह्या वेळार हाजीर आशिल्ले. गोंयांत तशेंच गोंया भायर आशिल्ल्या नागरिकांच्या जमनींची बनावट कागदां तयार करून त्यो बळकावप आनी तांची विक्री करपाच्या प्रकरणांत ‘एसआयटी’ न आतां मेरेन 15 जाणांक अटक केल्या. चवकशे मजगतीं, तांणी कांय राजकारण्यांचीय नांवां घेतल्यात व्हय? असो प्रस्न पत्रकारांनी बिश्नोई हांकां केलो. ताचेर अटक केल्ल्या कांय जाणांनी राजकारण्यांचीय नांवां घेतल्यात. पूण तांची नांवां आपूण आताच जाहीर करपाक शकना. तांकां अटक केले उपरांतूच तांचीं नांवां उक्ती करतलो, अशें तांणी स्पश्ट केले.
ह्या प्रकरणांत अटक केल्ले रॉयसन रॉड्रिग्स, राजकुमार मैथी आनी सेड्रीग फर्नांडीस हे तिगूय नावाडगे गुन्यांवकार आसात. रॉयसन हो हेर देशांत पळून वचपाचे तयारेंत आसतना पुलिसांनी सांपळो रचून ताका मुंबय विमानतळा वयल्यान अटक केली. ते उपरांत मैथी आनी सेड्रीग हांकाय अटक केल्या. राजकुमार मैथीक जमीन घोटाळे प्रकरणांत हाचे पयली अटक केल्ल्या विक्रांत शेट्टी आनी महम्मद सुहैल उर्फ मायकल हांचे वांगडा काम करतालो. तांचे मदीं वाद जाले उपरांत मैथीन तांचे वांगडा काम करप बंद करून रॉयसन आनी सेड्रीग हांचे वांगडा काम करपाक सुरवात केल्ली. ह्या तिगांयनी मेळून उत्तर गोंयांतल्या हणजूण, आसगांव, कळंगूट, म्हापशें, नेरूल, पर्रा आनी रेयश मागूश तशेंच दक्षीण गोंयांतल्या मडगांव आनी वास्को ह्या वाठारांतल्याे सुमार 95 मालमत्ता बळकायिल्ल्याचे स्पश्ट जाला, अशें बिश्नोई हांणी सांगलें.
दुबावितांक जामीन मेळचो न्हय हे खातीर यत्न करतलों
रॉयसन रॉड्रिग्स हांणें 1,30,425 चौ.मि. जमनींतल्यो 61 मालमत्ता, जाल्यार सेड्रीग फर्नांडीस हांणी 64,782 चौ. मि. जमनींतल्यो 26 मालमत्ता बनावट कागदां तयार करून बळकायल्यात. जाल्यार राजकुमार मैथी हांणें चार मालमत्ता बळकावन आपल्या कुटुंबियांच्या नांवार केल्यात. ह्या सगल्या प्रकरणांचो खोलायेन तपास करतले. ह्या दुबावितांक जामीन मेळचो न्हय, हे खातीर तांचे आडचे खटले अदीक घटमूट करतले, अशेंय ओमवीर सिंग बिश्नोई हांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
