भांगरभूंय | प्रतिनिधी
मडगांवां बालसाहित्य परिशदेचो समारोप
भांगरभूंय । विशाल खांडेपारकार
मडगांवः सैमान नटिल्लें गोंय म्हाका आवटडा. फुडारांत म्हज्या चित्रांनी गोंयच्यो दर्यावेळो, सैम आनी इगर्जींची चित्रां तशेंच रेखटनां आसतलीं. ग्राफिक्स, रेखाटण आनी चित्रकला हीं मळां दिसपाक वेग-वेगळी आसली तरीय तांचो उद्देश आनी मोख ही बोध आनी मजरिजवण करपाची आसता अशें जेश्ठ चित्रकार चंद्र मोहन कुलकर्णी हांणी सांगलें.
मडगांवच्या रवींद्र भवनांत कोंकणी भाशा मंडळ गोंय आयोजीत सातवी बाल साहित्य परिशदेंत ते ‘बाल साहित्यांतली चित्रकला प्रक्रिया आनी म्हत्व’ ह्या विशया वयल्या सत्रांत उलयताले. ह्या वेळार बंगाली चित्रकार इंद्रप्रोमीत रॉय आनी लेखक सुशील शुक्ल हाजीर आशिल्ले.
अप्लायड कलेंत पुणे आनी मुंबय आनी हेर शारांनी दुडू मेळटा. पूण सुख नासता. पूण त्या मनान पाठ्य पुस्तकांत रेखाटन आनी चित्रण करपाक चड आवडटालें. चित्रां पुस्तकांत बरीं आसल्यार पुस्तकां चड खपतात. साहित्यांत संवेदनां आसूंक फावो. आयज ग्राफिक्सांचें दालन तरणाट्यां पासत ओपन जालां. जर्मन आनी अमेरिका हांच्या पुस्तकांतल्या चित्रांचो अभ्यास करून ह्या क्षेत्रांत रिगलो, अशें कुलकर्णी हांणी सांगलें.
आयज कांय लोक चित्रकला आनी रेखाटन हांचे मदीं उच्च आनी नीच असो वाद चलयतात. कलेंत असल्या वादाक सुवात नासता. काणयो वाचून चित्रां काडप खूब कठीण पूण स्वतंत्र आनी आपल्या विचारांनी भावना प्रकट करून चित्रकला करपाक आपल्याक खूब आवडटा. मेरे दिल की बात है अशे तरेन चित्रकार व्यक्त जाता, अशें तांणी म्हणलें.
आयज फायन आर्ट आनी शाळांनी चित्रकलेक चड म्हत्व दिनात ही खंतीची गजाल आसा. सगळ्यां विशयां सारकोच चित्रकला हो विशय आसा अशें पालक आनी शिक्षकांनी समजूंक जाय. तेन्ना ग्राफिक्स, रेखाटण आनी चित्रकला हीं मळां दिसपाक वेग-वेगळी आसली तरीय तांचो उद्देश आनी मोख बोध आनी मजरिजवण करप आसता अशें जेश्ठ चित्रकार चंद्र मोहन कुलकर्णी हांणी सांगलें.
मजकुरांत ना ते कल्पने भायल्या गजालींचें रेखाटन करता तोच खरो चित्रकार अशें चित्रकार इंद्रप्रोमीत रॉय हांणी सांगले. रेखाटनाचो उदय 19 व्या शेंकड्यांत जालो. रेखाटन आनी चित्रकला एका नाण्यांच्यो दोन बाजू आसात. बापायचो आदर्श घेवन बरो चित्रकार जावंक पावलो. जीन, जपान रोम आदी देशांनी रेखाटन चित्रांक व्हड मागणी आसा. कलेंत केन्नाच उंच आनी ल्हान असो भेदभाव आसना. म्हाका एआ शास्त्र समजना देखून ताचेर चित्रां काडूंक आवडना. भावना नासतात. रंग आनी पिशोल हांचे लागीं खेळपाक आपल्याक चड आवडटा अशें रॉय हांणी सांगलें. सुशील शुक्ल हांणी येवकार दिवन कार्यावळीचें संयोजन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
