भांगरभूंय | प्रतिनिधी
32 राज्यां आनी दोन केंद्र शासीत प्रदेशांनी ई चलन प्रणाली सुरू
पणजी: गोंयांत फाटल्या तीन वर्सांत येरादारी नेमांक पाळो दिवंक नाशिल्ल्यांक 14 लाख 33 हजार 906 ई चलनां जारी केल्यांत. हे वरवीं दंडाच्या रकमेच्या स्वरुपांत सरकारान 99.75 कोटींचो महसूल जमा केला. हाचोच अर्थ वर्साक सरासरी 33.25 कोटी जाल्यार म्हयन्याक सरासरी 2.77 कोटी रुपया दंड वसूल केला. सद्या देशभरांतलीं 32 राज्यां आनी दोन केंद्र शासीत प्रदेशांनी ई चलन प्रणाली सुरू आसा. वयल्या काळांत पुराय देशांतल्यान 12 हजार कोटी रुपया दंड वसूल केला.
मेळिल्ले म्हायती प्रमाण गोंयांत 2023त 5 लाख 58 हजार 485 ई चलनां जारी केल्लीं. हे वरवीं 37.45 कोटी रुपया दंड वसूल केल्लो. 2024त 5 लाख 17 हजार 892 ई चलनां वरवीं 39.17 कोटी रुपया दंड वसूल केल्लो. जाल्यार 2025त चलन आनी दंडाची रक्कम हाचे तुळेन उणी जाली. 2025त 3 लाख 56 हजार 429 ई चलनां जारी केल्लीं. हे वरवीं 23.13 कोटी रुपया दंड वसूल केल्लो. जाल्यार 1 जानेवारी ते 8 फेब्रुवारी 2026 मजगतीं गोंयांत 1.36 कोटी रुपया दंड वसूल केल्लो.
पुराय देशाची आंकडेवारी पळयत जाल्यार 2023त 6.79 कोटी चलना वरवीं 4,243 कोटी रुपयांचो दंड वसूल केल्लो. 2024त 8.18 कोटी चलना वरवीं 3,996 कोटी रुपया जाल्यार 2025त 9.78 कोटी चलना वरवीं 3,761 कोटी रुपयांचो दंड वसूल केलो.
1 जानेवारी ते 8 फेब्रवारी 2026 मजगतीं, देशांत 256 कोटी रुपया दंड वसूल केल्लो. वयल्या काळांत केरळ, तामीळनाडू, उत्तर प्रदेश ह्या राज्यांनी ई चलन जारी करपाचे आनी हे वरवीं दंडाची रक्कम वसूल करपाचें प्रमाण चड आशिल्लें. जाल्यार सिक्कीम, अरुणाचल प्रदेश राज्यांनी हें प्रमाण उणें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
