भांगरभूंय | प्रतिनिधी
पणजी : स्मार्ट मीटराक लागून गिरायकांक तांचो वीज वापर, व्होल्टेज अश्यो गजाली कळटल्यो. वीज खात्याकूय अचूक म्हायती मेळटली. स्मार्ट मिटर ही काळाची गरज. पूण कांय लोक फक्त राजकी फायद्या खातीर स्मार्ट मिटरांक विरोध करतात, अशें खात्याचे मुखेल अभियंतो स्टिफन फर्नांडीस हांणी सांगलें.
संयुक्त वीज नियामक आयोगान आयोजीत केल्ले भौशीक सुनावणे वेळार ते उलयताले. त्या वेळार आयोगाचे आलोक टंडन आनी ज्योती प्रसाद हेर भागधारकां सयत हाजीर आशिल्ले.
स्मार्ट मिटर बसयल्या उपरांत वीज दर, विजेचो वापर वाडटलो, मिटर चुकीच्यो नोंदी घेतलो अशें कांय लोक म्हणटात, तें चुकीचें आसा. गिरायकांनी अश्या गजालींचेर विस्वास दवरचो न्हय. स्मार्ट मिटराक लागून गिरायकांक वीज वापराचेर नियंत्रण दवरप सोंपें जातलें. आतां मेरेन 5800 सरकारी संस्था, इमारतींनी 1020 फिडर, स्मार्ट मिटर जोडणी पुराय जाल्या. 9 हजार ट्रान्सफॉर्मर स्टेशनांक जोडणी दिवप चल्लां. ऑगस्ट 2027 मेरेन सगल्या गिरायकांक स्मार्ट मिटर जोडणी दितलें.
कांय कारणांक लागून बंच केबल प्रकल्प येसस्वी जालो ना. सध्या चालू आशिल्लो भूंयगत चॅनल प्रकल्प उपेगी पडटलो. वीज मिटरांचें रिडींग सहजपणान घेवपाक मेळपाक जाय, अशें सुवातेर मीटर आसपाक जाय. जेईआरसीच्या नेमा प्रमाण राज्यांतल्या 25 हजार गिरायकांक तांचें मिटर स्थलांतरीत करचें पडटलें. हे भौशीक सुनावणींत जेईआरसीन 2024-25 वर्सा खात्या खातीर मान्य केल्ल्या खर्चाचो आनी प्रत्यक्ष खर्चाचो अदमास दिला. चडशा सुवातांनी खात्यान मान्यताये परस उणो खर्च केला, अशेंय तांणी सांगलें.
2024-25 वर्सा वीज खात्याची येणावळ तूट 181 कोटी रुपया उरल्या अशें फर्नांडीस हांणी सांगलें. पूण हाचो भार राज्य सरकारान घेतलो. गिरायकांचेर हो भार आसचो ना. फाटल्या वर्सांत मुळावी बांदावळ बांदपाच्या वावराक लागून मान्यतायेचे तुळेंत भांडवल खर्च वाडला. ह्या खर्चाची म्हायती खात्याचे संकेतथळार अपलोड जातली, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
