भाजपाची केंद्रीय वेंचणूक समिती, संसदीय मंडळ जाहीर
भांगरभूंय | प्रतिनिधी
नितीन गडकरी, शिवराज सिंह चौहान हांकां वगळ्ळे
नवी दिल्लीः भाजपाध्यक्ष जे. पी. नड्डा हांणी पक्षाचे संसदीय मंडळ आनी केंद्रीय वेंचणूक समिती नव्यान तयार केल्या. पक्षाचे ज्येश्ठ फुडारी शिवराज सिंह चौहान आनी नितीन गडकरी हांकां मात वगळ्ळ्या. जे. पी. नड्डा संसदीय मंडळाचे आनी भाजपाच्या वेंचणूक समितीचे अध्यक्ष आसतले.
विशेश म्हणल्यार वेंचणूक समितींत महाराष्ट्राचे उपमुख्यमंत्री देवेंद्र फडणवीस हांचो आस्पाव केला. भाजपाच्या संसदीय मंडळांत कांय नव्या नांवांचोय आस्पाव केला. हातूंत कर्नाटकाचे आदले मुख्यमंत्री बी. एस. युडियुरप्पा, सुधा यादव, इक्बाल सिंग लालपूरा, सर्बानंद सोनोवाल, के. लक्ष्मण आनी सत्यनारायण जातिया हांचो आस्पाव आसा.
केंद्रीय मंत्री नितीन गडकरी अानी ज्येश्ठ फुडारी शिवराज सिंह चौहान हांकां केंद्रीय वेंचणूक समिती आनी भाजपाच्या संसदीय मंडळांतल्यान वगळ्ळ्या. तांचे सुवातेर कर्नाटकाचे आदले मुख्यमंत्री बी. एस. येडियुरप्पा आनी सर्बानंद सोनोवाल हांकां संसदीय मंडळांत सुवात दिल्या.
भाजपाच्या संसदीय मंडळांत प्रधानमंत्री नरेंद्र मोदी, भाजपा अध्यक्ष जे. पी. नड्डा, संरक्षण मंत्री राजनाथ सिंह, गृह मंत्री अमीत शाह, के. लक्ष्मण, इक्बाल सिंग लालपुरा, सुधा यादव, सत्यनारायण जातिया, आनी बी. एल. संतोष ह्या फुडाऱ्यांचो आस्पाव आसा.
येडियुरप्पा, सत्यनारायण जातिया आनी के. लक्ष्मण हांकां संद दिवन भाजपान आपूण आपले पोरणें कार्यकर्ते आनी तांच्या अणभवाचो कितलो आदर केला हे दाखोवन दिल्ल्याचे भाजपा सुत्रांचें म्हणणें आसा. तेच वांगडा भाजपान फेरबदल करतना विवीधतायेचेर भर दिला. इशान्येंतल्यान सर्बानंद सोनोवाल हांकां संद दिल्या. एल. लक्ष्मण आनी बी. एस. युडियुरप्पा हे दक्षिणेंतले आसात.
देवेंद्र फडणवीस राष्ट्रीय राजकारणांत
भाजपान केंद्रीय वेंचणूक समितीच्या वांगड्यांची वळेरी लेगीत जाहीर केल्या. हे समितींत महाराष्ट्राचे उपमुख्यमंत्री देवेंद्र फडणवीस हांकां सुवात दिल्या. भाजपा ओबीसी मोर्चाचे राष्ट्रीय अध्यक्ष के. लक्ष्मण हांचो लेगीत हे वळेरेंत आस्पाव केला. मजगतीं, देवेंद्र फडणवीस हांचे सयत भुपेंद्र यादव आनी ओम माथूर ह्या दोन नव्या चेऱ्यांक संद दिल्या. शाहनवाज हुसेन हांकां वेंचणूक समितींत सुवात मेळूंक ना. दुसरे वटेन सोनोवाल आनी येडियुरप्पा ह्या दोगांचोय वेंचणूक समितींत आस्पाव केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
