तुरदाळ: फायलींची पडटाळणी सुरू

भांगरभूंय | प्रतिनिधी

संंचालका सयत अधिकाऱ्यांंची जातली चवकशी

भांगरभूंय I प्रतिनिधी
पणजी : तुरदाळ पेड्डेर प्रकरणांत दक्षता संंचालनालयान फायलीं तशेंच कागदपत्रांंची पडटाळणी सुरू केल्या. नागरी पुरवण खात्याचे आदले संंचालक सिद्धीविनायक नायक हांंचे सयत नागरी पुरवण खात्याच्या हेर अधिकाऱ्यांंची लेगीत चवकशी जातली. फुडल्या तीन म्हयन्यां भितर दक्षता संचालनालया वतीन चवकशी पुराय जातली, अशी म्हायती गोपांनी दिली.

कोवीड म्हामारी काळांत अतिरिक्त तुरदाळ खरेदी करपाचो निर्णय जाल्लो. ह्या निर्णयाक मंंत्रीमंंडळान मान्यताय दिल्ली. कोवीड म्हामारी काळांत कडण्णांचो उणाव जावपाची भिरांत आशिल्ल्यान अतिरिक्त तुरदाळ खरेदी करपाचो निर्णय जाल्लो. ह्या निर्णया विशीं कसलोच वाद ना. पूण 241 मेट्रीक टन तुरदाळ गुदांवांत दवरून पेड्डेर जाली, हाका जापसालदार कोण? हाचो तपास दक्षता संंचालनालय करता.
ह्या प्रकरणांत सध्या तेन्नाचे नागरी पुरवण खात्याचे संंचालक सिद्धीविनायक नायक हांंकां सरकारान निलंंबीत केल्या. दक्षता संंचालनालयाच्या शिफारसी उपरांंत ही कारवाय जाली. सिद्धीविनायक नायक हांंची आतां चवकशी जातली. नागरी पुरवण खात्यांत संंचालकांं सयत उपसंंचालक तशेंच निरिक्षक आसात. तुरदाळ पेड्डेर जावपाक जापसालदार आशिल्ल्या अधिकाऱ्यांंचो सोद घेवपा खातीर, सगल्यांची खोलायेन चवकशी जातली, अशी म्हायती दक्षता संंचालक मायकल डिसोझा हांंणी दिली.
सरकारा कडल्यान दक्षता संचालनालयाक मुळावो अहवाल ​दिला. मुळाव्या अहवालाच्या आदारान सध्या तपास चालू आसा. फायलीं तशेंच कागदपत्रांंची पडताळणी जाले उपरांत अधिकाऱ्यांंची चवकशी जातली. तुरदाळी विशीं कोणे कितें निर्णय घेतला, ते जाणून घेवपाची प्रक्रिया जातली. कागदपत्रांं तशेंच फायलींचेर कोणाचे शेरे आसात? आणी ते खंयच्या अधिकाऱ्यान मारल्यात, हाची पडताळणी चालू आसा. तुरदाळ सवाय धान्य दुकानदारांंक उदारीचेर दिवप वा ती उक्त्या बाजारांत विकपाक दिवप, हे विशीं निर्णय नागरी पुरवण खात्याच्या संंचालकांंनी घेतलो ना, ही एक गजाल. ती गुदांवांंत पेड्डेर जाता म्हणसर दवरप हाचेर कोणाचे लक्ष कशें गेलें ना? 241 मेट्रीक टन तुरदाळ पेड्डेर जाली, ते खात्याच्या उसरांं लक्षांंत आयलें. हाका जापसालदार कोण? हाचोय तपास जातलो.
सवाय धान्य दुकानदारांं कडेन अतिरिक्त म्हाल दवरपाक सुवात नासता. हाका लागून ते चड धान्य दवरपाक पळयनात. कांय जाण मंजूर जाल्लो कोठो लेगीत एकाच वेळार व्हरनात, ही गजाल चवकशी वेळार मुखार आयल्या.

तीन म्हयन्यां भितर चवकशी पुराय करपाचे खात्याचे यत्न
प्रकरणाची चवकशी तीन म्हयन्यांत पुराय जाली ना, जाल्यार निलंंबीत अधिकाऱ्याक परतून सेवेंत घेवचो पडटा. हाका लागून तुरदाळ पेड्डेर जावपी प्रकरणाची चवकशी तीन म्हयन्यांत पुराय करपाचे खात्याचे यत्न आसात. मजगतीं, तुरदाळ पेड्डेर जावपाक अधिकारी वर्ग जापसालदार आसात. हातूंत आपलो कसलोच हस्तक्षेप ना. आपूण खंयचेय चवकशेक तयार आसा, अशें आदले नागरी पुरवण खात्याचे मंत्री गोविंंद गावडे हांणी सांगून ह्या प्रकरणांतल्यान आपले हात वयर केले.

अधिकाऱ्यांच्या जापसालदारीचेर पडटलो उजवाड
गुदांवांंतल्या कड्डणांची तपासणी कोण करता? कड्डण पेड्डेर जावचे न्हय म्हूण खातें कितें उपाय येवजण आंखता? उपाय येवजण आंखपाची जापसालदारी कोणाची? हाची चवकशी जातली. हे निमतान नागरी पुरवण खात्याच्या दरेका अधिकाऱ्याच्या जापसालदारीचेर उजवाड पडटलो.