भांगरभूंय | प्रतिनिधी
पणजी : मोरजेच्या दर्यादेग वाठारांत एके कडेन ऑलिव्ह रिडले कांसव सांबाळपा खातीर रान खातें मेहनत घेता, दुसरे कडेन शापोरा न्हंये मुखार सुरू आशिल्ल्या ड्रेझिंगाक लागून हे मोहिमे मुखार व्हड संकश्ट येवन उबें रावलां. ह्या हंगामांत आतां मेरेन १८ दर्यांतल्या कांसवांनी सुमार १९०० तांतयां घातिल्ल्यान ती सुरक्षित दवरपाचें काम सुरू आसा. मात, शापोरा न्हंयेंत सुरू आशिल्ल्या रेंव उसपपाच्या कामाक लागून कांसव सांबाळ वाठारांतले जमनींत व्हड फोंडकुलां पडल्यांत. दर्याचें उदक सरळ कांसवांच्या घोटेरां मेरेन पाविल्ल्यान ही जमीन घट्ट जाल्या. हाका लागून तांतयांचे सुरक्षिततायेचो गंभीर प्रस्न निर्माण जाला.
पोरा न्हंये मुखार ३० डिसेंबर २०२५ सावन सांबाळपा खातीर ड्रेझिंग सुरू केलां. ह्या कामांत जायते फावटीं तांत्रिक इबाडाक लागून खंड जरी पडला तरी, २१ जानेवारी सावन हें काम परत वेगान सुरू जालां. धक्को दिवपी गजाल म्हळ्यार, निविदेंतले अटीं प्रमाण रातीं ९ वरां मेरेन काम करपाक मनाय आसून लेगीत हांगा रातच्या वेळार व्हडा प्रमाणांत ड्रेझिंग सुरू आशिल्ल्याचें वृत्त मुखार आयलां. नुस्तेंमार्यांच्या बोटींच्या सुरळीत येरादारी खातीर रेंव उसपप जरी गरजेचें आसलें तरी हें काम कांसवांच्या प्रजननाच्या हंगामांत इतल्या नेटान कित्याक करतात, असो प्रस्न थळावे नागरीक आनी निसर्ग मोगी विचारतात.
रानजीव तज्ज्ञांच्या मतान, ऑलिव्ह रिडले कांसव हे भारतीय रानजीव संरक्षण कायदो १९७२ च्या ’अनुसूची १’ खाला संरक्षीत आसा. हे कांसव हजारांनी मैल प्रवास करून तांतयां घालपाक तेच दर्यादेगेर परततात जंय तांचो जल्म जाल्लो. प्रजनना खातीर हे कांसव दर्यादेगे लागसारच्या उदकांत वावुरतात. अशा वेळार ड्रेझिंगाक लागून जावपी आवाज आनी दर्याच्या पात्रांत जावपी बदल हे प्रजातींच्या अस्तित्वा खातीर सामके घातकी थारूंक शकता. प्रजनन वाठारांत आडखळ निर्माण जाल्यार ह्या संरक्षित जीवांच्या जीविताक धोको निर्माण जाता.
शासनान कांसव संवर्धना खातीर जी जमीन आरक्षित केल्या थंयच आतां ड्रेझिंगच्या कामाक लागून सैमीक समतोल इबाडटा अशें चित्र आसा. जमिनीचो थर घट्ट जाल्ल्यान तांतयांतल्यान पिलां भायर येवपाचे सैमीक प्रक्रियेंत आडमेळीं येवपाक शकतात. हाका लागून सरकारान ह्या प्रकरणाची गंभीर दखल घेवन, कांसव संवर्धन क्षेत्राचें रक्षण करपाक ड्रेझिंगच्या कामार बेगोबेग मर्यादा घालची वा योग्य पर्यायी वेवस्था करची, अशी मागणी पर्यावरणवादी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
