भांगरभूंय | प्रतिनिधी
गुन्यांवांचो तपासचो दर 80 टक्केः मुख्यमंत्री
पणजीः गोंयांत वाडपी गुन्यांवकारी घडणुकांचेर सभाघरांत आयज गंभीर चर्चा जाली. विरोधी पक्ष फुडारी युरी आलेमांव हांणी वाडट्या गुन्यांवकारी घडणुकांचो पाडो वाचलो. हे विशीं जाप दितना मुख्यमंत्री डॉ. प्रमोद सावंत हांणी सांगलें, गोंयच्या गुन्यांवांचो तपासाचो दर 80 टक्के आसा. तशेंच फाटल्या वर्सा 2025त सगल्यांत चड 163 ड्रग्साचीं प्रकरणां नोंद जाल्यांत.
प्रस्न जापेच्या वरा वेळार विरोधी पक्ष फुडारी युरी आलेमांव आनी हळदोणेंचे आमदार कार्लुस फेरेरा हांणी बिट्स पिलानींत विद्यार्थ्यांची आत्महत्या, ड्रग्स, अपघात, बलात्कार आनी खून सारकिल्ल्या विशयाचेर मुख्यमंत्र्याक घेरपाचो यत्न केलो.
बिट्स पिलानींत जावपी आत्महत्यांचे घडणुकेक ड्रग्साचो संबंध येता. संस्थे भायर जेवण डिलिव्हर करपी एका भुरग्याक ड्रग्साची पुरवणक करतना धरिल्लो, असो आरोप फेरेरा हांणी केलो.
केंद्र सरकाराच्या मानसीक भलायकी धोराणाची अंमलबजावणी करून शिक्षणीक संस्थांनी वाडत वचपी आत्महत्येचे प्रकार नियंत्रणांत हाडपाक जाय. ड्रग्साचो आतां शिक्षणीक संस्थांनी अतिरेक जावंक लागला. सरकारान हे भुरग्यांचो आत्मविश्वास वाडोवपा खातीर पुराय वर्सभरा खातीर समुपदेशक नेमचे, अशी सुचोवणी फेरेरा हांणी केली.
हे विशीं जाप दितना मुख्यमंत्री डॉ. प्रमोद सावंत हांणी सांगलें, घुंवळे वखदां प्रतिबंद विभाग (एएनसी) सगल्या शाळांनी आनी म्हाविद्यालयांनी जागृताय मोहिमो घडोवन हाडटात. तशेंच सगल्या शाळांनी आनी म्हाविद्यालयांनी समुपदेशक नेमल्यात. पूण बिट्स पिलानी ही सरकारी संस्था न्हय. पूण फाटले खेपे पांच आत्महत्येच्यो घडणुको घडले उपरांत आमी बिट्स पिलानी हांकां समुपदेशक नेमपाचो आदेश दिला. हे समुपदेशक तज्ञ आसात आनी ज्यो गजाली भुरगीं आपल्या पालकां कडेन उघड करपाक शकनात तांणी त्यो गजाली समुपदेशकां कडेन उघड केल्यात अशें मुख्यमंत्र्यांनी सांगलें.
वर्स 2021त 26 खून जाल्ले आनी 2022त ह्यो घडणुको 44 खुनाचेर पावल्यो. वर्स 2025त 27 खुनाच्यो घडणुको नोंद जाल्यात. बलात्काराच्यो घडणुको 2022त 75 आसल्यो त्यो आतां 2025त 102 बलात्कारांचेर पावला. दरोडो घालपाच्या प्रकरणांत 42 टक्क्यांनी वाड जाल्या. बायलां आड अत्याचारांच्या प्रकरणांत वाड जाल्या. सरकाराचे प्रतिबंधात्मक धोरण अपेशी थारलां असो आरोप युरी आलेमांव हांणी केलो.
तशेंच फाटल्या पांच वर्सात वर्स 2021 ते 2025 मजगतीं ड्रग्साच्या प्रकरणांत 35 टक्क्यांनी वाड जाल्या. ह्या ड्रग्साची पुरवण कोण करता तांकां अर्थीक फाटबळ कोण दिता, अांतरराज्य आनी अांतरराष्ट्रीय नेटवर्क बंद जावपाक जाय. तशेंच इडीचे मजगतीन ह्या ड्रग्सा फाटल्यान जावपी अर्थीक धागेदोऱ्यांचो तपास जावपाक जाय, अशी मागणी आलेमांव हांणी केली.
आलेमांव हांकां जाप दितना मुख्यमंत्र्यांनी सांगलें, की राज्याच्या गुन्यांवकारी तपासाचो दर 80 टक्के आसा आनी देशांत सगल्यांत व्हडलो दर हो फक्त गोंय राज्याचो आसा. बिगर गोंयकारांचो उच्छेद वाडून व्हड प्रमाणांत कामगार गोंयांत येतात. ह्या कारणांक लागून ह्यो घडणुको वाडल्यात. देखून तांची पुलीस पडटाळणी करप गरजेची आसा. पुलीस हॅल्पलायन 102 फोन केल्यार 5 मिणटां भितर पुलीस पावतात, अशें मुख्यमंत्र्यांनी सांगलें.
वर्स 2025त सगल्यांत चड 163 ड्रग्साची प्रकरणां नोंद करुन 212 जाणांक अटक केल्या. आंतरराज्य ड्रग्स तस्करीचेर एनसी पाळत दवरून आसा तशेंच एनसीबी, इडी हांचे वांगडा काम करता. केंद्रीय गृह मंत्री अमीत शाह हांणी ड्रग्स मुक्त भारत हें लक्ष दवरलां आनी 2026 मेरेन गोंय ड्रग्स मुक्त करपा खातीर आमी पावलां उबारल्यांत. ड्रग्सांक कसोच थारो दिवचे नात, अशें आश्वासन मुख्यमंत्री डॉ प्रमोद सावंत हांणी दिलें.
गोंयांत दर वर्सा सरासरी 100 जीव घेवपी अपघात जातात. दुचाकी अपघातांनी वाड जावन मरण येवपाच्या आनी गंभीर जखमी जावपाच्या प्रमाणांत वाड जाल्या. दुचाकीचेर दोगांनीय हॅल्मेट वापरचे असो आदेश सर्वोच्च न्यायालयाचो आसा. सर्वोच्च न्यायालयाच्या आदेशाची अंमलबजावणी करपा खातीर कितलो वेळ लागतलो, असो प्रस्न कार्लुस फेरेरा हांणी केलो. हे विशीं जाप दितना मुख्यमंत्र्यांनी सांगलें, भायल्या राज्यांतले लोक व्हड प्रमाणांत गतीन गाडयो चलयतांत. ताचेर नियंत्रण दवरपा खातीर आमी पुलीस तैनात केल्यात. बॉडी कॅम आशिल्ले पुलीस निरिक्षक आनी उपनिरिक्षक तालांव दितात. दुचाकीचेर दोगांय जाणांक हॅल्मेट घालपाची सक्ती विशींचें परिपत्रक येरादारी खात्यान काडलां ते पळोवन घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
