भांगरभूंय | प्रतिनिधी
बर्मिंगहॅमांत जाल्ले राष्ट्रकूल सर्तींत आमी 22 भांगरा पदकां सयत वट्ट 61 पदकां जिखलीं. देशभरांत सगल्यांनी खोस मनयली. पयरूच जाल्ल्या स्वातंत्र्यदिस सुवाळ्यांतूय प्रधानमंत्री नरेंद्र मोदी हांणी सगल्या खेळगड्यांची तुस्त केली. हालींच्या कांय वर्सांनी भारतीय खेळा मळाचेर पारदर्शकताय आयल्या, अशेंय तांणी सांगलें. मात 15 आॅगस्टाचे रातीं भारतीय खेळगडे आनी खेळां मोगींक खर धपको दिवपी बातमी आयली. ती म्हणल्यार आंतरराष्ट्रीय फुटबाॅल म्हासंघान (फिफा) आमच्या अखिल भारतीय फुटबाॅल म्हासंघाक (एआयएफएफ) निलंबीत केला. आमकां गोंयकारांक हे घडणुकेचें चड दुख्ख. कारण फुटबाॅल म्हणल्यार गोंयचो जीव. आमच्या सुपुल्ल्या राज्यान राष्ट्रीय फुटबाॅल मळाक बरेच खेळगडे दिल्यात. फुटबाॅलाच्या बळग्याचेर आमच्या कांय खेळगड्यांनी जिविताक आकार दिला. ‘झक मारली ती फिफा. आमचे कडेन भीक मागत येतली ती’ अशें कांय जाणांक दिसता. मात जर ही बंदी चड काळ उरली जाल्यार ताचो अर्थीक धपको आमच्या देशाक बसतलो हें आमी विसरूंक फावना. हें प्रकरण वयले वयर घेवन सोडून दिवंक मेळचें ना, हें भारतीय खेळां खात्याक समजलांच आसतलें.
फिफान आमच्या फुटबाॅल म्हासंघाचे निलंबन करतना ‘तिसऱ्या पक्षा’ चो हस्तक्षेप वाडला, अशें कारण दिलां. तांकां नेमकें कोणाक बोट दाखोवपाचें आसा तें स्पश्ट नासलें तरी सरकारी यंत्रणांचेर (आनी घडये न्यायालयाचेरुय) तांचो रोख आसतलो, अशें दिसता. घडये न्यायालयाचो निर्णयूच तांकां आवडुंक ना जातलो. 2017 पाकिस्तानाचेरुय फिफान बंदी घाल्ली, तेन्ना न्यायालय आपले नेम पाळिना, अशें कारण तांणी दिल्लें.
मे म्हयन्यांत भारतीय फुटबाॅल म्हासंघ सर्वोच्च न्यायालयान बरखास्त केल्लो. संघाचे घटनेंत दुरुस्ती, खेळाच्या नियोजनां विशीं पावलां उखलपाक सांगिल्लीं. फाटलें देड वर्स वेंचणूक जावंक ना. ती घेवपाक आनी दिसपट्ट्या कामाचेर लक्ष दवरपाक आदले मुख्य वेंचणूक आयुक्त एस. वाय. कुरेशी, आदले न्यायमूर्ती अनिल दवे आनी आदले फुटबाॅल कॅप्टन भास्कर गांगुली हांची समिती नेमिल्ली. तिका लागून म्हासंघाचे अध्यक्षपद प्रफुल्ल पटेल हांकां सोडचें पडिल्लें. उपरांत फिफाच्या एका पंगडान हांगा येवन म्हासंघान कायदे सुदारचे, 15 सप्टेंबर मेरेन वेंचणूक घेवची, अशें सांगिल्लें. मात, कांयच हालचाल नाशिल्ल्यान आतां फिफा रातयां हो निलंबनाचो निर्णय जाहीर केला.
इराकाचेर हाचे पयलीं दोन खेपे बंदी घाल्ली. मात, फिफा मुखार लोटांगण घालून बाबा- पुता करतकच ती बंदी काडिल्ली. आतां झुजा पांवड्याचेर हें निलंबन काडचें म्हूण आमकां यत्न करचे पडटले. नाजाल्यार भारतीय फुटबाॅल हवेंतूच तरंगत उरतलो. 11 ते 30 आॅक्टोबर मेरेन भारतांत 17 वर्सां सकयल्या बायलांच्या संवसारीक करंड सर्तीचें येजमानपद मेळ्ळां. ताचो आमच्या देशाक कोट्यांनी रुपया फायदो जातलो. ताचे परस म्हत्वाचें म्हणल्यार भारतीय बायलां खेळगड्यांची कारकिर्द फुलतली. ह्या निलंबनाक लागून ही सर्तूच रद्द जावं येता. ती दुसऱ्या देशांत व्हेल्यार थंय भारताक खेळपाक मेळचें ना. कारण आमकां येजमान म्हूण सर्तींत प्रवेश मेळ्ळा. गुणवत्तेच्या बळग्याचेर न्हय, अशें जाणकारांक दिसता. भारतीय पंगडांक आंतरराष्ट्रीय मॅची खेळपाक मेळच्यो नात. सप्टेंबरांत दोन मॅची आसात. भायले खेळगडे हाडपाक मेळचे ना, हांगाच्या खेळगड्यांक भायर खेळपाक मेळचें ना. आयएफएलाचेरुय परिणाम जावं येता. एआयएफएफाचे समितीचे अधिकार वेगळ्या प्रशासकांचे समितीक दिवपाक मेळटात. तशें केलें जाल्यार निलंबन फाटीं घेतले, अशें फिफान जाहीर केलां. एआयएफएफाचे दिसपट्टे वेव्हार फिफाच्या देखरेखी खाला जावंचे, अशेंय तांकां दिसता.
हो निलंबनाचो निर्णय आमच्या देशाक धपको दिवपी आसा, हातूंत दुबाव ना. आमी फुटबाॅल मळाचेर मुखार येवपाक लागल्यात. बायचुंग भुतिया, सुनील खेत्री सारक्या नव्या- पोरण्यां बऱ्याच खेळगड्यांनी आंतरराष्ट्रीय मळाचेर नांव केलां. 1983 मेरेन भारत संवसारीक करंड क्रिकेट सर्तींत फाटीं आशिल्लो. मात 1983 त वर्ल्ड कप जिखतकच मुखार वचत रावलो. तशे फुटबाॅलांत मुखार आशिल्ल्या ल्हान देशां प्रमाण आमकां फुडें वचप कठीण न्हय. पूण, फिफाच्या ह्या निर्णया सारके धक्के बसत रावल्यार आमचो फुटबाॅल फुडें वच्चो सोडून फाटल्यान येतलो. फिफान केल्लो हो गोल काय आमीच आमचेर केल्लो सेल्फ गोल?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
