भांगरभूंय | प्रतिनिधी
डॉ. रोहित फळगांवकार हांचो विश्व कोंकणी केंद्रा वतीन खासा भोवमान
पेडणें: संत सोहिरोबानाथ आंबिये सरकारी महाविद्यालय आनी संशोधन केंद्रांतल्या इतिहास विभागांतले प्राध्यापक डॉ. रोहित आर. फळगांवकार हांणी गोंयच्या मातृदेवतांचेर केल्लें संशोधन हे राष्ट्रीय पांवड्यार पयलें आनी आगळें वेगळें अशें संशोधन थारलां. विश्व कोंकणी केंद्र मंगळुरू हांची वर्धनी फेलोशिप डॉ. फळगांवकर हांकां २०२३ वर्सा दिल्ली. हाचे खाला तांणी हो संशोधन प्रकल्प पुराय करून २० डिसेंबर २०२५ दिसा मंगळुरू जाल्ले अधिकृत कार्यावळींत विश्व कोंकणी केंद्राक सादर केलो.
ह्या वेळार विश्व कोंकणी केंद्राचे अध्यक्ष नंदगोपाळ शेणॉय हांणी ह्या प्रकल्पाचेर आदारीत ग्रंथ प्रकाशीत करपाची येवजण केंद्राची आशिल्ल्याचें जाहीर केलें. ह्या ग्रंथाक लागून गोंयच्या मातृदेवतां विशींची इतिहासीक म्हायती सामान्य जनतेमेरेन पावतली, अशें तांणी नमूद केलें. तशेंच डॉ. फळगावकार हांणी मेहनत घेवन केल्ल्या संशोधनकार्याची तांणी खासा तोखणाय केली.
ह्या संशोधन प्रकल्पा खातीर फोटवांचें योगदान अन्नू मंगळुरू हांणी दिलें. सुत्रसंचालन सुचित्रा शेणॉय हांणी केलें, जाल्यार उपकार विश्व कोंकणी केंद्राचे सचिव भट हांणी मानले.
नवे पिळगे खातीर उपेगी संशोधन
ह्या संशोधनांत गोंयचे ‘सांतेर’ देवीची संकल्पना आनी तिचें मुर्तिशास्त्र सविस्तरपणान मांडलां. हाका लागून गोवा राज्य अभिलेखागारांतल्या १६व्या शेकड्यांतल्या दस्तऐवजांचो अभ्यास केला.
तशेंच गोंयांत मेळपी विवीध तरेच्यो महिषासुरमर्दिनी मूर्ती, दुर्गा आनी नवदुर्गा उपासना, चामुंडेश्वरी, काळिका, कामाक्षी, महालक्ष्मी, गजलक्ष्मी आनी गजगौरी ह्या देवतांच्या उपासनेचो अभ्यासूय ह्या संशोधनांत केला. गोंयच्या धर्मीक, सांस्कृतीक आनी लोकपरंपरेचो इतिहास उलगडपी हें संशोधन कार्य अभ्यासक, संशोधक आनी सामान्य वाचकां खातीर म्हत्वाचें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
