भांगरभूंय | प्रतिनिधी
पणजे सयत हेर शारांनीय येरादारीची कोंयडी; तिरंगा रॅलींचोय परिणाम
पणजी : फाटोफाटच्या सुटयांक लागून गोंयांत सद्या पर्यटकांची गर्दी जाल्या. पर्यटकांची वाहनां तशेंच तिरंगा रॅलींक लागून आयतारा सगल्याक येरादारीची कोंयडी जाली. पणजेंत सांजवेळार सगल्या रस्त्यांचेर वाहनांच्यो रांगो लागिल्ल्यो.
सद्या श्रावण म्हयनो सुरू आसा. पावसाचें प्रमाण उणें आसा. शेनवार, आयतार आनी आयचो सोमार अशी तीन दीस सुटी आसा. ह्या सुटयांची संद घेवन खूबशे देशी पर्यटक गोंयांत आयल्यात. हॉटेलांंतल्यो कुडी लागीं लागीं 90 टक्के फूल जाल्यात. सुटयेच्या निमतान आझादी का अमृत महोत्सव बरेच जाण आयज गोंयांत मनयतले.
शेनवार आनी आयतारा सरकारी कचेऱ्यांक सुटी आसता. पणजे सयत शारांतली मुखेल दुकानां लेगीत आयतारा बंद आसता. हाका लागून आयतारा वाहनांची संख्या सामकी उणीं आसता. सदचे परस ती लागीं लागीं पन्नास टक्के उणी आसतात. स्वातंत्र्य दिसाचे आदले दिसाचो आयतार मात हाका अाडवाद थारलो. आझादी का अमृत महोत्सवा निमतान शेनवार सावन कार्यावळी सुरू जाल्यात. आयतारा आल्तिन्यार सबस्टेशनाच्या उक्तावणा सयत तिरंगा रॅली जाल्यो. सांजे मुख्यमंत्री डॉ. प्रमोद सावंत हांचे हाजेरींत मूक मोर्चा जालो. हाका लागून वाहनां तशेंच लोकांची गर्दी वाडली. पुलिसांनी पणजेंतल्या येरादारी वेवस्थेंत बदल केल्लो. मुंबय, पुणें तशेंच कोंकणांतले पर्यटक गाडयो घेवन गोंयांत आयल्यात. ह्या सगल्यांचो परिणाम म्हूण पणजेंत सांजेवेळा वाहनांचो आंकडो वाडलो. हाका लागून येरादारीची कोंयडी जाली. पणजे सयत मडगांव, वास्को, म्हापशें, फोंडें ह्या शारांनी लेगीत तिरंगा रॅली जाल्यो. हाका लागून हेर शारांनी लेगीत आयतारा गर्दी आशिल्ली.
पावसाचें प्रमाण उणें आशिल्ल्यान दर्यादेगांचेर गर्दी वाडल्या. हॉटेलांंतल्यो कुडी 90 टक्के फुल्ल जाल्यात अशी म्हायती टीटीएजी संघटणेन दिल्या. पावसांत पर्यटकांचो आंकडो उणो आसता. हाका लागून हॉटेलांतल्याे कुडी रित्यो आसतात. फाटोफाट सुटयो आयल्यो जाल्यार मात देशी पर्यटकांचो आंकडो वाडटा. आतां नेमकी हीच स्थिती आसा. आयज स्वातंत्र्य दिसा निमतान सगल्यांक कार्यावळी जातल्यो. हाका लागून सकाळीं तशेंच सांजेवेळा मुखेल रस्त्यांचेर वाहनांचो आंकडो वाडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
