भांगरभूंय | प्रतिनिधी
पणजी : हडफडेंच्या ‘बर्च बाय रोमिओ लेन’ क्लबाक लागिल्ल्या भिरांकूळ उज्याच्या प्रकरणांतले मुखेल दुबावीत गौरव आनी सौरभ लुथरा ह्या दोगांकूय म्हापशें न्यायालयान 5 दिसांची पुलीस कोठडी फर्मायली. भलायकी सारकी ना, कोठडी दिवं नाकात, अशी मागणी लुथरा भावांनी न्यायालयाकडेन केल्ली. दुसरे वटेन पुलिसांनी तांची 10 दीस कस्टडी मेळची म्हूण नेट धरिल्लो.
कोठडी दिताच जाल्यार विशेश निवास वेवस्था करचीं, फाट दुखता तेन्ना न्हिदपाक गादी दिवची, अशी मागणी तांणी केल्ली. मजगतीं दोगांकूय म्हापशें जिल्हो हॉस्पिटलांत तपासणे खातीर धाडिल्लें. थंयच्या वैजकी अधिकाऱ्यांनी दोगूय तंदुरुस्त आसा म्हूण अहवाल दिलो. दुबावितांच्यो मागण्यो भायर मारतना न्यायालयान दोगांकूय वेळार वखदां दियात म्हूण पुलिसांक निर्देश दिलें.
काल सकाळीं 11क सुमार गोंय पुलिसांचो पंगड दिल्लीसावन दोगांकूय घेवन मोपा विमानतळार देंवलें. खर पुलीस बंदोबस्तांत तांकां हणजूण पुलीस स्टेशनार व्हेलं. चवकशी केल्या उपरांत तांकां न्यायालया मुखार हजर केल्लें. थंय तांची भलायकी हाल्ल्यान तांकां म्हापशें जिल्हो हॉस्पिटलांत दाखल केल्लें. तपासणी जाल्या उपरांत तांचे आड सुनावणी जावन तांकां 5 दिसांची पुलीस कोठडी फर्मायली.
दिल्लीसावन गोंयांत हाडल्या उपरांत दोगांयनी भलायकी सारकी ना म्हूण पुलीस अधिकाऱ्यांक सांगलें. तांणी तांकां शिवोले भलायकी केंद्रांत तपासपाक व्हेल्लें. थंय तांणी छातयेंत आनी फाटींत चडूच दुखता म्हूण सांगलें. ते खातीर तांकां म्हापश्यां जिल्हो हॉस्पिटलांत व्हेलें थंय सुमार वरभर तपासणी केल्या उपरांत दोगांकूय हणजूण पुलीस स्टेशनांत व्हेलें.
दनपारां 3.30क सुमार दोगांकूय म्हापश्यां न्यायालयांत हजर केलें तेन्ना दोगांयनी तांकां भलायकी समस्या आसा म्हूण सांगलें. सौरभान आपणाक टेलबोन फ्रॅक्चर आसा, जाल्यार गौरवान आपलो दावो पांय सुन्न जाला म्हूण सांगलें. ते आयकून न्यायालायन दोगांकूय म्हापशें जिल्हो हॉस्पिटलांत परत तपासणे खातीर म्हूण धाडिल्लें.
गोंय पुलिसांनी तांचेर सदोश मनीस बळी हाचे सयत विवीध गुन्यांव दाखल केल्यात, हाचे पयलीं तांचे अटकपूर्व जामीन अर्ज न्यायालयान भायर मारिल्लें.
ह्या प्रकरणां आतां मेरेन पुलिसांनी अजय गुप्ता, राजीव मोडक, प्रियांशू ठाकूर, राजवीर सिंघानिया, विवेक सिंग आनी भारत कोहली ह्या हेर वांगड्यां अटक केल्या. उजो लागलो तेन्ना क्लबांत १५० परस चड पर्यटक हाजीर आशिल्ले. ह्या प्रकरणाचो खोलायेन तपास सुरू आशिल्ल्यान लुथरा भावांच्या अटकेक लागून आतां खुबश्यो धक्को दिवपी गजाली मुखार येवपाची शक्यताय आसा.
बर्च घडणूक
नरसंहारूच : अॅड. जोशी
मजगतीं, ह्या अपघातांत दिल्लींतल्या जोशी कुटुंबांतल्या चार वांगड्यांक मरण आयिल्लें. पिडेस्त कुटुंबा वतीन वकील विष्णू जोशी हांणी म्हापशें न्यायालयांत लेखी निवेदन सादर केलें. लुथरा भावांक कसलीच खाशेली सवलत दिनासतना पुलीस कस्टडी दिवची अशी तांणी मागणी केली.
रणनितीचो एक भाग म्हूण कोठडी चुकोवपाक लुथरा भावांनी भलायकी सारकी ना म्हूण दावो केला, अशेंय तांणी म्हणलें.
बर्च अपघात हो एक नरसंहारूच. तातूंत 25 निरपराध लोकांक मरण आयलें. दुबावितांक चडांत चड ख्यास्त मेळची ही आमची मागणी आसा. तशेंच दुबावितांच्या जामीन अर्जांक आमी विरोध करतात. दुबावीत आनी तांचे सांगाती वैध परवाने नासतना हो क्लब चलयताले. ह्या भ्रश्टाचारांत कोण कोण आशिल्ले हाची पुराय चवकशी जावपाक जाय, अशी तांणी मागणी केली.
…जाल्यार ते पळून कित्याक गेले?
दुबावितांच्या वांगड्यांची भुमिका, निर्णय घेवपाची प्रक्रिया, अर्थीक गजाली, कार्यावळींक मान्यता, हेर भागीदार, वेवस्थापकांचो आनी आयोजकांचो सहभाग हाचो योग्य सोद घेवपाक दुबावितांक पुलीस कस्टडींत दिवपाक जाय. तशेंच बनावट वेवसाया संबंदीत कागदपत्रां तयार करपा खातीर वापरिल्लीं कागदपत्रां, डिजिटल पुरावे आनी उपकरणां जप्त करपाची गरज आसा, अशें सरकारी वकिलांनी म्हणलें. वैजकी कारणांक लागून दुबावीत न्हिदपा खातीर गादी मागतात. भलायकेचे प्रस्न आसून लेगीत ते कित्याक पळून गेले?, असो युक्तिवादूय सरकारी वकिलांनी केलो.
कोहलीचो जामिना खातीर अर्ज
हडफडें उज्या लोळ प्रकरणांत अटक केल्ल्या भरतसिंग कोहलीन मेरशेंच्या सत्र न्यायालयांत जामीना खातीर अर्ज केला. आरोपी विवेक सिंग, प्रियांशु ठाकूर आनी राजवीर सिंघानिया हांच्या जामीन अर्जाचेर 18 तारखेक म्हापशेंच्या अतिरिक्त सत्र न्यायालयांत सुनावणी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
